Yeremia 25 - ŊMALƐ KRƆŊKRƆŊ LƐ

Kooyigbɛ henyɛlɔi lɛ

¹ Afi nɔ ni Yosia bi Yehoiakim na afii ejwɛ akɛ Yuda maŋtsɛ, ni Nebukadnezar hu na afi akɛ Babilon maŋtsɛ lɛ, Yehowa kɛ mi wie Yuda maŋbii fɛɛ ahe;

² ni mikɛɛ Yuda shikpɔŋ lɛ nɔ bii lɛ kɛ Yerusalɛm maŋbii lɛ hu akɛ,

³ “Afii nyɔŋmai enyɔ kɛ etɛ̃ nɛ, kɛjɛ Amon bi Yuda Maŋtsɛ Yosia yinɔ afi ni ji nyɔŋma kɛ etɛ̃ lɛ nɔ kɛbashi ŋmɛnɛ gbi nɛɛ nɔ lɛ, Yehowa kɛ mi wieɔ, ni mi hu mikɛɔ nyɛ be fɛɛ be nɔ ni ekɛɛ lɛ, shi nyɛbooo toi.

⁴ Yehowa etsu etsuji fɛɛ ni ji gbalɔi lɛ kɛba nyɛŋɔɔ nɔŋŋ; shi nyɛbooo toi lɛ, nyɛyeee nɔ hu.

⁵ Amɛbakɛɛ nyɛ akɛ, ‘Nyɛteŋ mɔ fɛɛ mɔ akpa ejeŋba gbonyo kɛ enifeemɔnii gbohii lɛ, bɔ ni afee ni nyɛhi shikpɔŋ ni Yehowa kɛhã nyɛ kɛ nyɛtsɛmɛi lɛ kɛjɛ naanɔ aahu kɛmiiya naanɔ lɛ nɔ.

⁶ Nyɛkasɔ̃mɔa ni nyɛkajaa nyɔŋmɔi krokomɛi, asaŋ nyɛkɛ nyɛniji akafee amãgãi ni nyɛja amɛ nyɛkɛwo mimli la, ni mifee nyɛ efɔŋ.’

⁷ ‘Shi Yehowa kɛɛ nyɛbooo lɛ toi, shi moŋ nyɛkɛ nyɛninenaa amãgãi ni nyɛfee lɛ wo emli la, ni nyɛkɛye nyɛ nɔŋŋ nyɛhe awui.’

⁸ “No hewɔ lɛ, Yehowa Taiatsɛ, lɛ, kɛɛ akɛ, ‘Akɛni nyɛbooo miwiemɔi lɛ toi hewɔ lɛ,

⁹ naa, mibatsu koni ayaŋɔ kooyigbɛ shikpɔji lɛ anɔ bii lɛ kɛ Babilon Maŋtsɛ Nebukadnezar hu abahã mi, ni mahã amɛfã ta kɛbatua Yuda shikpɔŋ nɛɛ kɛ enɔ bii lɛ kɛ shikpɔji krokomɛi fɛɛ ni bɔle lɛ lɛ. Mibakpãtã amɛhiɛ butuu, ni amɛaatsɔ̃ nyaŋemɔnɔ ni aboɔ lɛ ‘tsia!’ Ni amɛhiɛ aaashwie shi kɛya naanɔ.

¹⁰ Asaŋ mibahã nyamɔ kɛ miishɛɛ kɛ ayɛmforowu kɛ ayɛmforo gbee lɛ fɛɛ sɛɛ afo yɛ jɛi; anaŋ mɔ ko ni koto wiɛ sɛɛ yɛ jɛi lɛ, anaŋ kane ni asu yɛ jɛi he ko he ko.

¹¹ Shikpɔŋ tso muu nɛɛ fɛɛ baatsɔ̃ amaŋfɔ̃ kɛ shiaŋa tete; ni majimaji nɛɛ baasɔ̃mɔ Babilon maŋtsɛ lɛ afii nyɔŋmai kpawo.

¹² Shi afii nyɔŋmai kpawo lɛ sɛɛ lɛ, mibagbala Babilon maŋtsɛ lɛ kɛ Babilon shikpɔŋ lɛ fɛɛ toi yɛ nifɔɔjianii ni amɛbaafee lɛ hewɔ; ni mahã amɛshikpɔŋ lɛ atsɔ̃ amaŋfɔ̃ kɛya naanɔ. Mi Yehowa, mikɛɛ.

¹³ Mahã wiemɔi fɛɛ ni miwie mishi shikpɔŋ nɛɛ, ni ji nii fɛɛ ni Yeremia gba shi majimaji lɛ, ni aŋmã yɛ wolo nɛɛ mli lɛ, aba mli.

¹⁴ Ejaakɛ mawo Babilonbii lɛ nyɔmɔ yɛ amɛnifeemɔnii kɛ amɛninenaa nitsumɔi lɛ ahewɔ, ejaakɛ majimaji kɛ maŋtsɛmɛi wuji baaye amɛ nyɔŋ.’ ”

Fɔ ni Nyɔŋmɔ bu maji lɛ

¹⁵ Yehowa, Israel Nyɔŋmɔ lɛ, kɛɛ mi akɛ, “Hemɔ wain kpulu nɛɛ yɛ midɛŋ; mlifu ji wain ni yɔɔ mli lɛ; ni ohã majimaji fɛɛ ni mibatsu bo amɛŋɔɔ lɛ anu eko.

¹⁶ Amɛbaanu, ni amɛbaadidãa, ni amɛbaaye sɛkɛ tete yɛ ta ni mibahã afã kɛbatua amɛ lɛ hewɔ.”

¹⁷ Kɛkɛ ni mihe kpulu lɛ yɛ Yehowa dɛŋ; ni mihã majimaji fɛɛ ni Yehowa tsu mi amɛŋɔɔ lɛ nu wain lɛ. Mɛi ni nu ji,

¹⁸ Yerusalɛm kɛ Yuda shikpɔŋ lɛ nɔ maji wuji lɛ kɛ amɛmaŋtsɛmɛi kɛ lumɛi lɛ fɛɛ koni amɛtsɔ̃mɔ amaŋfɔ̃ kɛ shiaŋa kɛ nɔ ni aboɔ lɛ ‘tsia!’ Kɛ loomɔnɔ tamɔ bɔ ni eyɔɔ ŋmɛnɛ gbi nɛɛ.

¹⁹ Mɛi krokomɛi hu ni nu Yehowa mlifu lɛ eko nɛ: Ijipt maŋtsɛ lɛ kɛ etsuji lɛ kɛ elumɛi lɛ kɛ emaŋbii lɛ fɛɛ,

²⁰ kɛ maŋsɛɛbii ni yɔɔ amɛteŋ lɛ hu. Uz shikpɔŋ lɛ nɔ maŋtsɛmɛi lɛ fɛɛ kɛ Filistibii ashikpɔŋ lɛ nɔ maŋtsɛmɛi lɛ ni yɔɔ Ashkelon kɛ Gaza kɛ Ekron kɛ mɛi ni eshwɛ yɛ Ashdod maŋ lɛ mli lɛ hu fɛɛ nu eko.

²¹ Mɛi komɛi hu ji Edombii kɛ Moabbii kɛ Amonbii lɛ,

²² kɛ Tiro maŋtsɛmɛi lɛ fɛɛ kɛ Sidon maŋtsɛmɛi lɛ fɛɛ, kɛ ŋshɔnaa maji lɛ amli maŋtsɛmɛi lɛ fɛɛ,

²³ kɛ Dedan maŋ lɛ kɛ Tema maŋ lɛ kɛ Buz maŋ lɛ hu kɛ gbɔmɛi komɛi ni shɛɔ amɛyitsei ahe lɛ.

²⁴ Mɛi krokomɛi hu ji Arabia maŋtsɛmɛi lɛ fɛɛ kɛ futufutu gbɔmɛi ni yɔɔ shiaŋa lɛ mli lɛ amaŋtsɛmɛi lɛ fɛɛ,

²⁵ kɛ Zimri maŋtsɛmɛi lɛ fɛɛ kɛ Elam maŋtsɛmɛi lɛ fɛɛ kɛ Media maŋtsɛmɛi lɛ fɛɛ,

²⁶ kɛ kooyigbɛ shikpɔŋ lɛ nɔ maŋtsɛmɛi fɛɛ, mɛi ni bɛŋkɛ kɛ mɛi ni yɔɔ shɔŋŋ, eko nyiɛ eko sɛɛ. Je lɛ mli maŋtsɛyelihei fɛɛ ni yɔɔ shikpɔŋ lɛ nɔ lɛ asa amɛnaa mlifu wain lɛ eko. Ni amɛ fɛɛ amɛsɛɛ lɛ Babilon maŋtsɛ lɛ hu aaanu eko.

²⁷ “Kɛkɛ lɛ okɛɛ amɛ akɛ, ‘Bɔ ni Yehowa Taiatsɛ, Israel Nyɔŋmɔ lɛ, kɛɛ nɛ, nyɛnua, nyɛtɔrɔa dãa, ni nyɛshwea, ni nyɛgbegbea shi ni nyɛkanyɛ shi nyɛte dɔŋŋ yɛ ta ni mibahã afã kɛbatua nyɛ lɛ hewɔ.’

²⁸ Shi kɛji amɛmiii akɛ amɛaahe kpulu lɛ yɛ odɛ̃ŋ ni amɛnu lɛ, no lɛ, okɛɛ amɛ akɛ, bɔ ni Yehowa Taiatsɛ, lɛ, kɛɛ ji, ‘Ja nyɛna nyɛnu kɛ̃!

²⁹ Ejaakɛ naa, kɛ mije shishi miifee maŋ wulu ni akɛ mi diɛŋtsɛ migbɛi ewo lɛ lɛ efɔŋ lɛ, te feɔ tɛŋŋ ni nyɛ lɛ ni nyɛŋɔɔ nyɛhe nyɛyeɔ tswaa hu?’ Nyɛŋɔŋ nyɛhe nyɛyeŋ nakai, ejaakɛ miihã afã ta kɛbatua nyɛ shikpɔŋ lɛ nɔ bii fɛɛ. Mi Yehowa Taiatsɛ lɛ mikɛɛ.

³⁰ “No hewɔ lɛ, bo Yeremia, gbaa nɛkɛ gbalɛ nɛɛ oshi gbɔmɛi nɛɛ. Okɛɛ amɛ akɛ, ‘Yehowa aaajɛ ŋwɛi ehũu, ni ebaawo egbee kɛaajɛ eshihilɛhe krɔŋkrɔŋ lɛ. Eeehũu waa ewo ewebii lɛ ni eeebolɔ tamɔ wainŋalɔi, eeehũu ewo shikpɔŋ lɛ nɔ bii fɛɛ.

³¹ Ehũumɔ lɛ aaajije kɛaashɛ shikpɔŋ lɛ naagbeehei fɛɛ; ejaakɛ Yehowa yɛ sane ni ekɛbaashi majimaji lɛ. Ekɛ heloo fɛɛ baakojo, ni eeehã mɛi fɔ̃ji anyɔnyɔi yɛ klante naa. Yehowa kɛɛ.’ ”

³² Yehowa Taiatsɛ lɛ, kɛɛ akɛ, “Naa sane fɔŋ miijɛ maŋ kome nɔ kɛyanina maŋ kroko. Ahum kpeteŋkple ko aaate shi kɛaajɛ shikpɔŋ lɛ naagbeehe tɔ̃ɔ.

³³ Ni Yehowa baagbe mɛi yɛ nakai gbi lɛ nɔ kɛjɛ shikpɔŋ lɛ naagbeehe kome kɛyashi enaagbeehe kroko. Afoŋ amɛ, ni abuaŋ amɛnaa, ni afuŋ amɛ tete; amɛaatsɔ̃ wamɔ yɛ shikpɔŋ lɛ nɔ.

³⁴ “Nyɛ maŋ onukpai, ni ji miwebii lɛ akwɛlɔi, nyɛwoa yara nyɛfoa, ni nyɛkɛ nyɛhe akoklo lamlu mli ejaakɛ be ni abaagbegbee nyɛ, asaŋ be ni abaagbɛ nyɛ ashwã lɛ eshɛ; ni nyɛbaagboi tamɔ too gwantɛŋi osaii.

³⁵ Maŋ onukpai lɛ naŋ abobaahe ko lɛ, miwebii lɛ alumɛi lɛ naŋ he ko atsɔ̃ kɛjo foi hu.

³⁶ Bo maŋbii akwɛlɔi lɛ abolɔmɔ lɛ toi kɛ lele ni miwebii lɛ alumɛi lɛ hu ewo lɛ, ejaakɛ Yehowa miikpãtã amɛjwɛifɔ shikpɔji lɛ ahiɛ,

³⁷ ni ewebii ni yɔɔ kpoo lɛ ahiɛ ekpãtã yɛ Yehowa mlifu ni naa wa lɛ naa.

³⁸ Yehowa eshi emɛi lɛ tamɔ jata shiɔ ebu efɔ̃ɔ shi; ejaakɛ amɛshikpɔŋ lɛ etsɔ̃ amaŋfɔ̃ yɛ klante ni henyɛlɔ fã yɛ amɛnɔ kɛ Yehowa mlifu ni naa wa lɛ hewɔ.”