Yeremia 22 - ŊMALƐ KRƆŊKRƆŊ LƐ

Abɔ Yuda Maŋtsɛ Weku lɛ kɔkɔ

¹ Yehowa kɛɛ mi akɛ, “Okɛ wiemɔ nɛɛ aya Yuda maŋtsɛ we lɛ,

² ni oyakɛɛ akɛ, ‘Bo Yuda maŋtsɛ ni ota Maŋtsɛ David sɛi lɛ nɔ, bo kɛ otsuji kɛ omaŋbii ni tsɔ̃ɔ agboi nɛɛ amli kɛyaa kɛbaa, nyɛboa nɔ ni Yehowa kɛɛ toi.

³ Yehowa kɛɛ nyɛkojo yɛ jalɛ naa, ni nyɛye jalɛ sane; ni nyɛhere mɔ ni aaye lɛ amim lɛ yɛ mɔ ni yeɔ lɛ amim lɛ dɛŋ; ni nyɛkafee gbɔ loo awusa loo okulafo efɔŋ; asaŋ nyɛkawa amɛyi; ni nyɛkashwie mɔ ni efeko nɔ fɔŋ ko lá shi yɛ biɛ.

⁴ Anɔkwa, kɛji nyɛye wiemɔ nɛɛ nɔ lɛ, no lɛ David shwiei lɛ baaya nɔ ata David maŋtsɛ sɛi lɛ nɔ akɛ maŋtsɛmɛi, ni amɛ kɛ amɛtsuji lɛ kɛ amɛmaŋbii lɛ baaya nɔ atara tayaa shwiilii amli kɛ okpɔŋɔi anɔ kɛtsɔ̃ maŋtsɛ we nɛɛ agboi nɛɛ amli kɛya kɛba.

⁵ Shi kɛji nyɛbuuu nɛkɛ wiemɔi nɛɛ lɛ, no lɛ mi Yehowa, miikɛɛ akɛ, mikã mi diɛŋtsɛ mihe kitã akɛ maŋtsɛ we nɛɛ baatsɔ̃ amaŋfɔ̃.’ ”

⁶ Nɔ ni Yehowa kɛɛ yɛ Yuda maŋtsɛ we nɛɛ he ji akɛ, “Maŋtsɛ we nɛɛ, otamɔ Gilead kɛhã mi; asaŋ otamɔ Lebanon gɔji lɛ hu moŋ nɛ; shi kɛ̃lɛ mahã otsɔ̃ shiaŋa, maŋ ni adesa ko adesa ko ehiii mli.

⁷ Majie nifitelɔi ni amɛteŋ mɔ fɛɛ mɔ hiɛ elema mawo bo; ni amɛbaatoo otsenedru tsei fɛɛfɛji lɛ, ni amɛbaaloo amɛwo la mli.

⁸ “Ni majimaji anɔ bii pii aaabatsɔ̃ maŋ nɛɛ he kɛho, ni amɛteŋ mɔ fɛɛ mɔ aaabi akɛ, ‘Mɛni hewɔ ni Yehowa fee maŋ kpeteŋkple nɛɛ nɛkɛ nɛɛ?’

⁹ Abaajie naa akɛ, ‘Ejaakɛ amɛkwa kpãŋmɔ ni yɔɔ amɛ kɛ Yehowa, amɛNyɔŋmɔ lɛ, teŋ lɛ, ni amɛyaja nyɔŋmɔi krokomɛi moŋ, ni amɛsɔ̃mɔ amɛ.’ ”

Maŋtsɛ Yoahaz he wiemɔ ni Yeremia wie

¹⁰ Nyɛ Yudabii, nyɛkafoa Maŋtsɛ Yosia mɔ ni egbo lɛ, ni nyɛkayea ehe ŋkɔmɔ hu. Shi moŋ nyɛfoa waa nyɛhãa Yoahaz mɔ ni yaa nomŋɔɔ mli lɛ, ejaakɛ ekuŋ esɛɛ ebaŋ dɔŋŋ. Ni enaŋ ejaku shikpɔŋ lɛ dɔŋŋ.

¹¹ Ejaakɛ nɔ ni Yehowa kɛɛ yɛ Yuda Maŋtsɛ Yosia bi Yoahaz mɔ ni baye etsɛ sɛɛ akɛ, “Yuda maŋtsɛ ni aŋɔ lɛ nom kɛtee lɛ he nɛ, ekuŋ esɛɛ ebaŋ biɛ dɔŋŋ,

¹² shi he ni aŋɔ lɛ nom kɛtee lɛ jɛi eeegbo yɛ, ni ehiŋmɛi enaŋ shikpɔŋ nɛɛ dɔŋŋ!”

Maŋtsɛ Yehoiakim he wiemɔ ni Yeremia wie

¹³ Kpoo hã mɔ ni tsɔ̃ɔ juu kɛfɔ̃ nɔ emaa eshĩa, ni egbeleɔ mli kɛtsɔ̃ɔ shishiumɔ nɔ; mɔ ni hãa enaanyo tsuɔ nii hãa lɛ efolo, ni ewooo lɛ nyɔmɔ lɛ.

¹⁴ Kpoo hã mɔ ni kɛɔ akɛ, “Mama shĩa kpeteŋkple kɛ emli ŋwɛitsui ni dara.” Ejieɔ samfɛji ewoɔ he ni ekɛ tsenedrutso kaa mli, ni eshaa he kɛ ama tsuru fɔɔ.

¹⁵ Ani osusuɔ akɛ tsenedru mple ni oshiɔ lɛ no feɔ bo maŋtsɛ? Otsɛ hi shi, ni eye nii, ni enu nii, ni ekojo jalɛ naa, ni eye jalɛ sane, ni no hewɔ lɛ, ehi ehã lɛ!

¹⁶ Eye nɔnalɔ kɛ ohiafo sane ehã lɛ; ni no hã ehi ehã lɛ lɛ.

¹⁷ Shi bo lɛ, ohiŋmɛi kɛ otsui kã juukɛfɔ̃ nii kɛ mɛi ni efeko efɔŋ lá shishwiemɔ nɔ. Ni owaa mɛi ayi keketee.

¹⁸ No hewɔ lɛ, nɔ ni Yehowa kɛɛ yɛ Yuda Maŋtsɛ Yosia bi Yehoakim he nɛ, “Awoŋ yara afoŋ lɛ; akɛŋ lɛ akɛ ‘Kpoo Nuŋtsɔ! Ao, kpoo, Maŋtsɛ!’

¹⁹ Aaafu lɛ tamɔ afuɔ teji; aaashãtã lɛ ayashɛ afɔ̃ Yerusalɛm agboi lɛ asɛɛ.”

Yeremia tsɔ̃ɔ nɔ ni baaba Yerusalɛm nɔ

²⁰ Yerusalɛm maŋbii, nyɛkwɔa nyɛyaa Lebanon ni nyɛyabolɔa; nyɛyaa Bashan nyɛyabolɔa, kɛ Moab gɔji lɛ hu anɔ, ejaakɛ akpãtã nyɛsuɔlɔi lɛ fɛɛ ahiɛ.

²¹ Be ni oyɔɔ nii pii lɛ, mikɛ bo wie; shi okɛɛ akɛ obooo mi toi. Ojeŋba kwraa nɛ kɛjɛ oblahiiaŋ, oboko mi toi dã.

²² Kɔɔyɔɔ lɛ baaloo olumɛi lɛ kɛya, abaaloo onanemɛi akɛ nomii kɛya; kɛkɛ lɛ ohiɛ aaagbo ni ohiɛ aaashwie shi yɛ onifɔɔjianii lɛ fɛɛ ahewɔ.

²³ Nyɛ mɛi ni nyɛkãmɔ Lebanon tsenedru tsui amli shweshweeshwe ŋmɛnɛ nɛɛ, kɛji hejaramɔ ba lɛ, nyɛaana nɔ tamɔ yoo ni baafɔ.

Nyɔŋmɔ gbala Yehoiakim toi

²⁴ Yehowa kɛɛ akɛ, “Gbii abɔ ni mihiɛ kã nɛɛ lɛ, kɛji bo Yuda Maŋtsɛ Yehoiakim bi Maŋtsɛ Yehoiakin tete po ji wolonaasɔomɔ ga ni yɔɔ mininejurɔ lɛ, mibakpɔ bo yɛ miwao,

²⁵ ni matu bo mawo Babilon Maŋtsɛ Nebukadnezar kɛ emaŋbii Babilonbii ni taoɔ bo amɛgbe ni osheɔ amɛ gbeyei hu lɛ adɛŋ.

²⁶ Mibashɛ bo kɛ onyɛ ni fɔ bo lɛ fɛɛ mafɔ̃ shikpɔŋ ko nɔ, he ni jeee jɛmɛ afɔ nyɛyi enyɔ lɛ fɛɛ yɛ, ni jɛi nyɛbaagboi yɛ.

²⁷ Ni shikpɔŋ lɛ ni amɛbaashwe akɛ amɛaaku amɛsɛɛ kɛba nɔ ekoŋŋ lɛ, amɛkuŋ amɛsɛɛ kɛbaŋ jɛi dɔŋŋ.”

²⁸ Kɛkɛ ni mikɛɛ akɛ, “Aso Yehoiakin etsɔ̃ mɔ ni abuuu tamɔ nu gbɛ ko ni mɔ ko taooo dɔŋŋ lo? Mɛni hewɔ mɔ ni ashwie lɛ kɛ ebii ni ashɛrɛ amɛ ashwie shikpɔŋ ko ni amɛleee nɔ nɛɛ?”

²⁹ Ao Shikpɔŋ, Shikpɔŋ, Shikpɔŋ! Bo nɔ ni Yehowa kɛɛ toi.

³⁰ Yehowa kɛɛ akɛ, “Nyɛŋɔa nuu nɛɛ akɛ mɔ ko ni bɛ bi; mɔ ko ni shwereŋ ewala be mli fɛɛ, ejaakɛ eshwie ko eshwie ko naŋ David sɛ̃i lɛ nɔ eta eye maŋtsɛ yɛ Yuda dɔŋŋ kɔkɔɔkɔ.”