Yeremia 2 - ŊMALƐ KRƆŊKRƆŊ LƐ

Nyɔŋmɔ kwɛɔ Israelbii

¹ Yehowa kɛɛ mi akɛ,

² “Yaa, koni oyashiɛ owo Yerusalɛmbii atoiiaŋ, ni okɛɛ amɛ akɛ, nɔ ni Yehowa kɛɛ nɛ, ‘Mikaiɔ oblayeiaŋ anɔkwa ni oye mi lɛ, kɛ osuɔmɔ tamɔ ayɛmforo suɔmɔ lɛ. Mikaiɔ bɔ ni onyiɛ misɛɛ yɛ shiaŋa lɛ nɔ, ni ji shikpɔŋ ni aduko nii yɛ nɔ lɛ nɔ lɛ.

³ Mɔ krɔŋkrɔŋ ji Israel hã Yehowa, eŋmãakpamɔ mli klɛŋklɛŋ yibii ni. Mɛi fɛɛ ni aaata ehe lɛ baaye sɔ̃. Ni sane fɔŋ baaye amɛ, Mi, Yehowa, mi mikɛɛ.’ ”

Esha ni Israelbii ablema tsɛmɛi lɛ fee

⁴ Nyɛ Yakob shwiei, nyɛ Israel akutseiaŋ wekui, nyɛboa Yehowa wiemɔ toi.

⁵ Yehowa kɛɛ akɛ, “Mɛɛ tɔ̃mɔ nyɛtsɛmɛi lɛ na yɛ mihe; hewɔ ni amɛtse amɛhe yɛ mihe kɛtee flɛŋŋ, ni amɛyadi yakayakanii asɛɛ ni ehã amɛtsɔ̃mɔ yakayakanii nɛɛ?

⁶ Amɛbiii akɛ, ‘Nɛgbɛ Yehowa mɔ ni jie wɔ kɛje Ijipt shikpɔŋ lɛ nɔ lɛ yɔɔ, mɔ ni nyiɛ wɔhiɛ yɛ ŋa lɛ nɔ, mɔ ni nyiɛ wɔhiɛ yɛ shiaŋa kɛ enɔ buibui lɛ nɔ, shikpɔŋ ko ni nu bɛ nɔ ni enɔ ewo duŋ kpii, shikpɔŋ ko ni mɔ ko mɔ ko nyɛɛɛ nɔ atsɔ̃ kɛho, he ni mɔ ko mɔ ko nyɛɛɛ ahi lɛ?’

⁷ Mikɛ nyɛ ba shikpɔŋ ni baa nii nɔ koni nyɛye enɔ ŋmãa kɛ enɔ nibii kpakpai lɛ. Shi be ni nyɛbashɛ nɔ lɛ, nyɛbule mishikpɔŋ lɛ, ni nyɛhã migboshinii lɛ tsɔ̃ musubɔɔnii.

⁸ Osɔfoi lɛ po biii akɛ, ‘Nɛgbɛ Yehowa yɔɔ?’ Mɛi ni tsɔ̃ɔ mɛi mla lɛ tete leee mi; maŋnɔyelɔi lɛ tɔ̃ minɔ, ni gbalɔi lɛ gba yɛ Baal hewalɛ naa; ni amɛyadi nibii ni ahe bɛ sɛɛnamɔ lɛ asɛɛ.”

Sane ni Yehowa kɛshiɔ ewebii

⁹ “Enɛɛmɛi ahewɔ lɛ mi, Yehowa, mikɛ nyɛ yɛ nɔ ko ni mikɛɔ, ni mikɛ nyɛbii abii hu baatao naa.

¹⁰ Nyɛfoa mli kɛyaa Kipro ŋshɔnaa maji amli nyɛyakwɛa, aloo nyɛtsua kɛyaa Kedar hu, ni nyɛyatao mli fitsofitso nyɛkwɛa akɛ nɛkɛ sane ko eba jɛi dã lo?

¹¹ Ani maŋ ko yɛ ni etsake enyɔŋmɔi pɛŋ? Tsɛbelɛ nakai nyɔŋmɔi lɛ jeee fɛifɛi! Shi miwebii lɛ kɛ amɛnunyam lɛ etsake nii ni he bɛ sɛɛnamɔ.

¹² Ao! Ŋwɛi, onaa akpɛ ohe yɛ enɛ hewɔ; ŋmiŋmi amɔ bo, ni ohe ajɔ̃ ohe babaoo, Mi, Yehowa, mikɛɛ!

¹³ Ejaakɛ miwebii lɛ efee nifɔɔjianii srɔtoi enyɔ: amɛkwa mi, mi, ni mi ji wala nu fɛɛ jɛɛhe lɛ; ni amɛyakpɛkpɛɛ nubui amɛhã amɛhe, nubui ni ejwra ni nyɛɛɛ nu ato.”

Nɔ ni anɔkwa ni Israel yeee lɛ gbala kɛba

¹⁴ “Ani Israel lɛ, nyɔŋ ni? Ani nyɔŋ bi ni afɔ yɛ enuŋtsɔ we ni lo? Mɛɛba mɔ ni etsɔ̃ mɔ fɛɛ mɔ milɛ loo nɛɛ?

¹⁵ Jatai bolɔ wo lɛ; amɛbolɔ waa diɛŋtsɛ. Amɛkpãtã eshikpɔŋ lɛ hiɛ, emaji lɛ kamɔ shi amaŋfɔ̃i ni gbɔmɛi bɛ mli.

¹⁶ Asaŋ Memfis kɛ Tahpanhes hii lɛ ejwa opampam.

¹⁷ Israel, aso jeee bo diɛŋtsɛ oyatao nɛkɛ sane ohã ohe akɛ okwa Yehowa, oNyɔŋmɔ lɛ, be mli ni ekpalaa bo yɛ gbɛ lɛ nɔ lɛ?

¹⁸ Ni agbɛnɛ mɛɛ sɛɛ obaana kɛ Ijipt ni oyaa koni oyanu Nilo Faa lɛ mli nu lɛ eko lɛ? Loo mɛɛ sɛɛ obaana kɛ Asiria ni oyaa koni oyanu Eufrate Faa lɛ mli nu lɛ eko lɛ?

¹⁹ Bo diɛŋtsɛ onifɔɔjianii lɛ baagbala otoi, ni kwamɔ ni okwa mi lɛ baabu bo fɔ. Na ole, ni oyoo akɛ kwamɔ ni okwa mi, Yehowa, oNyɔŋmɔ lɛ, nɔ fɔŋ ni, ni ebaajoo ehã bo. Mihe gbeyeishemɔ bɛ omli. Mi, Nuŋtsɔ Nyɔŋmɔ, Taiatsɛ, mikɛɛ.”

Israel ekpɛlɛ̃ɛɛ akɛ ejaa Yehowa

²⁰ “Blema ko beebe ni oku opã lɛ, ni otserɛ kpãi ni fimɔ bo lɛ mli, ni okɛɛ akɛ, ‘Misɔ̃mɔɔɔ mɔ ko mɔ ko!’ Shi gɔŋkpɔ fɛɛ gɔŋkpɔ yiteŋ kɛ tso fɛɛ tso ni ebu kusuu shishi oyakotoɔ shi ojaa, ni okwaa mi yɛ.

²¹ Mitɛo bo akɛ wain tso kpakpa ni jɛ wu kpakpa mli. Shi te fee tɛŋŋ ni ofite otsɔ̃ kooŋ wain tso kwraa nɛɛ?

²² Kɛji oju ohe ni osha ohe kɛ samla ni naa wa akɛ mɛ tete, mibana otɔ̃mɔ lɛ ni ekadi ohe kɛ̃. Mi, Nuŋtsɔ Nyɔŋmɔ, mikɛɛ.

²³ Te feɔ tɛŋŋ ni okɛɔ akɛ, ‘Mibuleko mihe, miyajako wɔŋ Baal lɛ?’ Kwɛmɔ ojeŋ ni oba yɛ gɔji ateŋ jɔɔ lɛ mli lɛ, ni ooona ole nɔ ni ofee. Otamɔ ŋaŋ yooma oblayoo ni hiɛ foi kɛmiiya biɛ kɛ biɛ.

²⁴ Otamɔ ŋaŋ teji yoo ni ele ŋanɔhilɛ, ni miifu kɔɔyɔɔ mli kɛmitao nuu. Namɔ baanyɛ ekɔnɔ naa etsi? Mɔ ko mɔ ko bɛ ni miitao lɛ ni etɔɔ lɛ, ejaakɛ kɛji etsuiasɛɛyaa be shɛ pɛ, mɛi anine shɛɔ enɔ.

²⁵ Israel, kwɛmɔ koni okahiɛ onane folo, asaŋ koni osɛ̃ŋ akagbi kɛ kumai. Shi okɛɛ akɛ, ‘Hiɛnɔkãmɔ ko bɛ? Ejaakɛ maŋsɛɛ nyɔŋmɔi misumɔɔ, ni amɛsɛɛ manyiɛ.’ ”

Israel sa toigbalamɔ

²⁶ “Bɔ ni kɛji amɔ julɔ ni ehiɛ gboɔ lɛ, nakai pɛpɛɛpɛ Israelbii ahiɛ baagbo, maŋbii lɛ kɛ amɛmaŋtsɛmɛi kɛ amɛlumɛi kɛ amɛsɔfoi kɛ amɛgbalɔi lɛ fɛɛ,

²⁷ mɛi ni kɛɔ tso akɛ, ‘Mitsɛ ji bo’ kɛ mɛi hu ni kɛɔ tɛ akɛ, ‘Bo ofɔ mi’ lɛ, amɛ fɛɛ amɛhiɛ baagbo, ejaakɛ amɛtsɔ̃ amɛsɛɛ, shi jeee amɛhiɛ amɛhã mi. Shi amɛfimɔ be mli lɛ amɛkɛɔ akɛ, ‘Tee shi, ni ohere wɔyiwala.’

²⁸ “Shi Yuda, nɛgbɛ nyɔŋmɔi lɛ ni ofee ohã ohe lɛ yɔɔ? Amɛte shi akɛ amɛaanyɛ oyiwala amɛhere yɛ ofimɔ be lɛ mli lo? Ao! Yuda, te nyɔŋmɔi ni oyɔɔ lɛ ayifalɛ tamɔ maji ni oyɔɔ lɛ ayibɔ nɔŋŋ?

²⁹ Mɛɛba mɔ nyɛwieɔ nyɛshiɔ mi lɛ? Nyɛ fɛɛ tswɛm nyɛtse mihiɛ atua.” Yehowa kɛɛ.

³⁰ Yakatswaa po ni mitswia nyɛbii lɛ anii lɛ ejaakɛ no tsakeee amɛ. Nyɛ diɛŋtsɛ nyɛdɛŋ klante ni gbegbee nyɛgbalɔi lɛ tamɔ jata kakawua ni kpãtãa nii ahiɛ.

³¹ Nyɛ, yinɔ nɛɛ nɔ bii, nyɛjwɛŋa Yehowa wiemɔi lɛ ahe. Ani mitsɔ̃ ŋa nɔ mihã Israelbii lo; loo shikpɔŋ ni enɔ ewo duŋ kpii? Mɛni hewɔ mɔ, ni miwebii lɛ kɛɔ akɛ, “Wɔye wɔhe; wɔbaaa oŋɔɔ dɔŋŋ lɛ?”

³² Ani oblayoo hiɛ kpaa ehewulamɔnii anɔ, ani ayɛmforo hiɛ kpaa ekpeemɔ atade nɔ? Shi mi lɛ miwebii lɛ ahiɛ ekpa minɔ kɛjɛ jeeŋmɔ.

³³ Anɔkwa, ole gbɛ nɔ ni atsɔ̃ɔ ni nine shɛɔ suɔlɔ nɔ, no hewɔ lɛ, yei fɔ̃ji tete po ekase nii kɛjɛ odɛ̃ŋ.

³⁴ Ohiafoi ni efeko nɔ ko lɛ alá yɛ otade namui lɛ amli, jeee nififiaŋ mina enɛ yɛ shi moŋ, he fɛɛ he; ni

³⁵ okɛɔ akɛ, “Mifeko efɔŋ ko. Eji anɔkwale akɛ Yehowa efo emli ni fu mi lɛ sɛɛ.” Shi naa, mi Yehowa, mibagbala otoi yɛ kɛɛmɔ ni okɛɔ akɛ, “Mifeko esha ko lɛ hewɔ.”

³⁶ Mɛɛba ni olilaa shi sɔŋŋ nɛkɛ, ni otsakeɔ onane nakai? Ijipt baahã ohiɛ agbo tamɔ bɔ ni Asiria hã ohiɛ gbo lɛ.

³⁷ Obaajɛ Ijipt oba ni oniji jwere oyiteŋ kɛ awerɛhoo, ejaakɛ mɛi ni ohiɛ kã amɛnɔ lɛ, Yehowa ekwa amɛ, ni nɔ kpakpa ko bɛ ni obaana yɛ amɛdɛŋ.