Yeremia 19 - ŊMALƐ KRƆŊKRƆŊ LƐ

Kpulu ni ejwa lɛ

¹ Yehowa kɛɛ mi akɛ, “Yaa ni oyahe gbɛshɔ̃lɔ sũ kpulu, ni oŋɔ maŋ onukpai lɛ kɛ osɔfoi lɛ ateŋ mɛi komɛi ofata ohe,

² ni okɛ amɛ atsɔ̃ Gbɛshɔ̃lɔ Agbo lɛ mli kɛya Hinom bi lɛ Jɔɔ lɛ mli, koni oshiɛ wiemɔi ni makɛɛ bo lɛ yɛ jɛi.

³ Kɛɛmɔ amɛ akɛ, ‘Nyɛ Yuda maŋtsɛmɛi kɛ Yerusalɛm maŋbii, nyɛboa nɔ ni Yehowa kɛɛ toi. Mi Yehowa Taiatsɛ, Israel Nyɔŋmɔ lɛ, miikɛɛ akɛ, mibahã sane fɔŋ aye maŋ nɛɛ bɔ ni mɔ fɛɛ mɔ ni baanu nɔ ni ba lɛ he baajɔ̃ ehe.

⁴ Ejaakɛ maŋbii lɛ ekwa mi, ni amɛkɛ tsofakɛŋma ni amɛshãa amɛhãa nyɔŋmɔi krokomɛi ni amɛ kɛ amɛtsɛmɛi kɛ Yuda maŋtsɛmɛi fɛɛ tete hu leee lɛ ebule maŋ lɛ; asaŋ amɛfɔse mɛi ni efeko nɔ ko fɔŋ lɛ alá amɛshwie biɛ obɔ̃.

⁵ Ni amɛmamɔ afɔleshãa latɛi yɛ Baal jamɔhei lɛ, ni amɛshãa amɛmusuŋbii yɛ nɔ akɛ shãa afɔle amɛhãa Baal. Mifãko amɛ, ni nakai nɔ ko bako mijwɛŋmɔ mli tete dã.

⁶ Enɛ hewɔ lɛ, naa, be miiba, ni atsɛŋ he ni wɔyɔɔ nɛɛ Tofet loo Hinom Jɔɔ dɔŋŋ; shi moŋ abaatsɛ biɛ akɛ Gbɔmɔgbee Jɔɔ.

⁷ Mahã Yudabii kɛ Yerusalɛm maŋbii ayiŋtoi fɛɛ afee yaka yɛ biɛ. Mahã amɛnyɔnyɔi yɛ klante naa yɛ amɛhenyɛlɔi kɛ mɛi ni taoɔ amɛ efɔŋ amɛfee lɛ ahiɛ. Mahã ŋwɛi loofɔji kɛ shikpɔŋ nɔ kooloi aye amɛgbohii lɛ.

⁸ Mahã maŋ nɛɛ atsɔ̃ nyaŋemɔnɔ, ni abaabo lɛ ‘tsia!’ Ni mɔ fɛɛ mɔ ni aaatsɔ̃ jɛi kɛho lɛ he aaajɔ̃ ehe, ni ebaabo ‘tsia’ yɛ amanehulu ni maŋ lɛ ena lɛ hewɔ.

⁹ Nakai be lɛ mli lɛ henyɛlɔi baasa maŋ lɛ yi, ni ebaafĩ maŋbii lɛ bɔ sɔŋŋ ni fɔlɔi baaye amɛmusuŋ bihii kɛ amɛbiyei, ni mɛi baagbe amɛnanemɛi amɛye.’

¹⁰ “No sɛɛ lɛ, ojwa kpulu lɛ yɛ hii ni kɛ bo baaya jɛi lɛ ahiɛ,

¹¹ ni okɛɛ amɛ akɛ, bɔ ni Yehowa, Taiatsɛ lɛ, kɛɛ nɛ. ‘Nɛkɛ nɔŋŋ majwa maŋ nɛɛ, ni mibakpãtã emli bii ahiɛ tamɔ bɔ ni ajwaa gbɛshɔ̃lɔ kpulu ni ehiii tsaramɔ dɔŋŋ lɛ. Tofet nɛɛ baatsɔ̃ he ni mɛi baafu amɛgbohii yɛ, ejaakɛ anaŋ he ko he ko ni abaafu gbohii yɛ dɔŋŋ.

¹² Bɔ ni mibafee maŋ nɛɛ kɛ emli bii lɛ nɛ, ebaatsɔ̃ tamɔ Tofet.

¹³ Yerusalɛm maŋ lɛ mli shĩai kɛ Yuda maŋtsɛmɛi awei fɛɛ he ni ashãshãa tsofakɛŋma yɛ amɛtsui lɛ ayiteiaŋ akɛhã ŋulamii, asaŋ ni akɛ dãa shwie shi ahã nyɔŋmɔi krokomɛi yɛ jɛi lɛ, abaabule amɛ fɛɛ tswɛm tamɔ Tofet.’ ”

¹⁴ Kɛkɛ ni Yeremia jɛ Tofet, he ni Yehowa tsu lɛ akɛ eyagba yɛ lɛ eba, ni ebadamɔ Yehowa Sɔlemɔ we lɛ kpo lɛ nɔ, ni ekɛɛ maŋbii lɛ fɛɛ akɛ,

¹⁵ “Bɔ ni Yehowa Taiatsɛ, Israel Nyɔŋmɔ lɛ, kɛɛ nɛ, ‘Naa, efɔŋ fɛɛ ni mito miyiŋ akɛ mibafee maŋ nɛɛ kɛ ehe majimaji lɛ, mibafee amɛ kɛ̃, ejaakɛ amɛfee amɛhe kuɛŋtilɔi, ni amɛbooo miwiemɔ toi.’ ”