Yeremia 18 - ŊMALƐ KRƆŊKRƆŊ LƐ

Yeremia yɛ gbɛshɔ̃lɔ shĩa

¹ Yehowa kɛ Yeremia wie ni ekɛɛ lɛ akɛ,

² “Tee shi ni oya gbɛshɔ̃lɔ lɛ shĩa lɛ mli, ni jɛi mikɛ bo baawie yɛ.”

³ No hewɔ lɛ, miyiŋ mitee gbɛshɔ̃lɔ lɛ shĩa lɛ mli, ni miyanina lɛ ni eta egbɛshɔ̃ɔ tsɔne lɛ sɛɛ eetsu nii.

⁴ Mina akɛ kɛji nɔ krɛdɛɛ ni gbɛshɔ̃lɔ lɛ shɔ̃ɔ lɛ fite yɛ edɛŋ lɛ, esaa ekpɔtɔɔ su lɛ mli ekoŋŋ, ni ekɛshɔ̃ɔ nɔ kroko ni saa ehiɛ bɔ ni lɛ esumɔɔ.

⁵ Kɛkɛ ni Yehowa kɛɛ mi akɛ,

⁶ “Ao! Israelbii, aso esaaa akɛ mifeɔ nyɛ tamɔ gbɛshɔ̃lɔ lɛ fee sũ lɛ lo? Israelbii, naa, nyɛtamɔ sũ ni gbɛshɔ̃lɔ lɛ hiɛ lɛ pɛpɛɛpɛ yɛ midɛŋ.

⁷ Be fɛɛ be ni makɛɛ yɛ maŋ ko loo maŋtsɛyeli ko he akɛ mafã lɛ kɛ eshishi fɛɛ koni majwara lɛ wɔtsɔwɔtsɔ lɛ,

⁸ kɛji nakai maŋ ni miwie ehe lɛ kpa amɛnifɔ̃ɔjianii ni amɛfeɔ lɛ feemɔ lɛ, mitsakeɔ mijwɛŋmɔ, ni efɔŋ ni mito akɛ mibafee amɛ lɛ mifeee.

⁹ Ni be fɛɛ be ni makɛɛ yɛ maŋ ko loo maŋtsɛyeli ko he akɛ mamã lɛ mamã shi, ni eshwere lɛ,

¹⁰ kɛji nakai maŋ lɛ loo maŋtsɛyeli lɛ fee efɔŋ yɛ mihiɛ, ni ebooo migbee toi lɛ, no lɛ mibafo ekpakpa ni mito akɛ mibafee lɛ lɛ mli.

¹¹ No hewɔ lɛ, agbɛnɛ kɛɛmɔ Yudabii lɛ kɛ Yerusalɛm maŋbii lɛ akɛ nɔ ni mi, Yehowa, mikɛɔ amɛ nɛ, ‘Naa, misusu nyɛhe efɔŋ, ni mikɔ nyɛyi tɛ. No hewɔ lɛ, nyɛteŋ mɔ fɛɛ mɔ akpa ejeŋba gbonyo lɛ, ni etsake esu kɛ enifeemɔnii fɔŋ lɛ.’

¹² Shi amɛkɛɔ akɛ, ‘Oowie efolo; nɔ ni wɔfeɔ lɛ, wɔbaafee ŋmɛnɛ wɔbaafee wɔ. Wɔteŋ mɔ fɛɛ mɔ baaye lɛ diɛŋtsɛ etsui naa sane bɔ ni esumɔɔ.’ ”

Maŋbii lɛ kwa Yehowa

¹³ No hewɔ lɛ, Yehowa kɛɛ akɛ, “Nyɛbia yɛ majimaji lɛ amli akɛ namɔ enu nɛkɛ sane dã? Israel, oblayoo foro lɛ efee nɔ fɔŋ ni yɔɔ gbeyei.

¹⁴ Ani snoo ekpa nyɔɔ yɛ Lebanon gɔji anɔ pɛŋ? Ani gɔji lɛ anɔ nu egbi dã, ani nu ŋanii ni hoɔ lɛ sɛɛ efo dã?

¹⁵ Shi mi lɛ, mimaŋ lɛ hiɛ ekpa minɔ, ni amɛshãa tsofakɛŋma amɛhãa yaka nyɔŋmɔi. Amɛtɛrɛtɛrɛɛ yɛ blema gbɛ ni amɛnyiɛ nɔ lɛ nɔ, ni amɛje tɛmpɔŋ lɛ nɔ kɛyanyiɛ nane gbɛi anɔ.

¹⁶ Amɛhã amɛshikpɔŋ lɛ etsɔ̃ nyaŋemɔnɔ, ni abaabo lɛ ‘tsia!’ daa. Mɔ fɛɛ mɔ ni aaatsɔ̃ jɛi kɛho lɛ he aaajɔ̃ ehe, ni eeehoso eyitso.

¹⁷ Mibagbɛ amɛ mashwã yɛ amɛhenyɛlɔi lɛ ahiɛ, tamɔ mlu ni bokã kɔɔyɔɔ etswa. Mibatsɔ̃ mihiɛ mato afã, ni mikwɛŋ amɛ kwraa yɛ amɛmanehulu gbi lɛ nɔ.”

Atee Yeremia yinɔ apam

¹⁸ Kɛkɛ ni maŋbii lɛ kɛɛ akɛ, “Nyɛbaa koni wɔkpãŋa Yeremia yinɔ, akɛni osɔfoi yɔɔ nɛɛ lɛ, wɔyɛ mɛi ni baatsɔ̃ɔ wɔ mla lɛ naa, ni nilelɔi yɛ ni baawo wɔ ŋaa, ni gbalɔi hu baahi shi amɛgba amɛhã wɔ. Nyɛbaa koni wɔkɛ wɔlilɛi afite lɛ, ni nyɛkahãa wɔbo ewiemɔ kome folo toi.”

¹⁹ No hewɔ lɛ, misɔle mikɛɛ akɛ, “Ao! Yehowa, ofainɛ, bo mi toi; asaŋ obo mɛi ni kɛ mi ena lɛ hu toi.

²⁰ Aso efɔŋ moŋ akɛtoɔ ekpakpa najiaŋ? Shi kɛ̃lɛ amɛtsa bu amɛhã mi koni migbee mli. Yehowa, kaimɔ bɔ ni midamɔ ohiɛ ni mikpa fai mihã amɛ koni omli ni efu amɛ lɛ sɛɛ afo.

²¹ No hewɔ lɛ, hã amɛbii lɛ aye hɔmɔ, ni amɛ diɛŋtsɛ lɛ amɛnyɔnyɔi yɛ klante naa; hã amɛŋamɛi lɛ atsɔ̃mɔ okulafoi kɛ mɛi ni amɛmusuŋbii egboi yɛ amɛhe. Gbele hela abagbe amɛteŋ hii lɛ, ni amɛblahii lɛ anyɔnyɔi yɛ klante naa yɛ ta mli.

²² Be ni ooohã henyɛlɔi aaabashwie amɛnɔ trukaa lɛ, hã ni anu blɔmɔ yɛ amɛshĩaiaŋ, ejaakɛ amɛtsa bu amɛhã mi koni migbee mli, ni amɛtsɔ̃tsɔ̃ɔ mi tsɔnei hu koni madu.

²³ Shi Yehowa, bo lɛ ole miyinɔ apam ni amɛyaa lɛ. Okɛ efɔŋ ni amɛfee nɛɛ akafa amɛ; kaaku ohiɛ ofɔ̃ amɛhe eshai lɛ anɔ. Hã abutu amɛ yɛ ohiɛ, ni okɛ amɛ aye be mli ni omli efu lɛ.”