Yeremia 17 - ŊMALƐ KRƆŊKRƆŊ LƐ

Yuda tɔ̃mɔ lɛ kɛ ehe toigbalamɔ

¹ Yehowa kɛɛ akɛ, “Yuda he esha lɛ akɛ dade niŋmaatso kɛ enaa daiamɔnd piɔpiɔ kpɛ wo amɛtsui tao lɛ nɔ; akpɛ yɛ amɛfɔleshãa latɛi lɛ akoji lɛ anɔ.

² Amɛbii lɛ kaiɔ amɛfɔleshãa latɛi lɛ kɛ amɛnyɔŋmɔ Ashera lɛ amãgãi ni yɔɔ tsei ni ebu kusukusuu ashishi kɛ gɔŋkpɔi anɔ,

³ kɛ ŋa lɛ nɔ gɔji lɛ hu anɔ lɛ. Yuda, ojwetrii kɛ onii ni oyɔɔ fɛɛ hu lɛ, mibajɔɔ nɔ mahã henyɛlɔi koni amɛbaha kɛya. No baafee eshai ni ofee yɛ shikpɔŋ lɛ nɔ fɛɛ he toigbalamɔ.

⁴ Obaaŋmɛɛ ogboshinii ni mikɛhã bo lɛ he ofɔ̃ shi, ni mibahã oyasɔ̃mɔ ohenyɛlɔi yɛ maŋsɛɛ shikpɔŋ ni oleee nɔ, ejaakɛ mimlifu lɛ tamɔ la ni ashɛre, ni ebaatso kɛya naanɔ.”

Wiemɔi Srɔtoi

⁵ Yehowa kɛɛ akɛ, “Alomɔ mɔ ni kɛ ehiɛ fɔ̃ɔ gbɔmɔ adesa nɔ, mɔ ni shiɔ Yehowa sɛɛ, ni ekɛ ehe kpasaa adesa hewalɛ.

⁶ Etamɔ tso fɔ ni ma shiaŋa nɔ; yɛ shikpɔŋ ni egbi nɔ, shikpɔŋ ni yɔɔ ŋooŋoo ni nɔ ko nɔ ko bɛ jɛi; ebɛ ekpakpa ko ni ebaafee.

⁷ Ajɔɔ gbɔmɔ ni kɛ ehiɛ fɔ̃ɔ Yehowa nɔ, mɔ ni Yehowa ji ehiɛnɔkãmɔ.

⁸ Etamɔ tso ni atɛo yɛ faa toi; etsɛ̃rɛɔ eshishi fãi kɛyaninaa nu lɛ. Esheee gbeyei kɛji jeŋdɔlɛ be shɛ, ejaakɛ lɛ lɛ eyaa nɔ ewoɔ yibii, etsui yeee kɛji nu enɛɛɛ, ejaakɛ eyibaa hiɔ shi frɔ̃frɔ̃.

⁹ Tsui yɔɔ nɛɛ elakaa mɔ fe nɔ fɛɛ nɔ; efite kwraa. Namɔ aaanu lɛ shishi?

¹⁰ Mi, Yehowa, mitaoɔ gbɔmɔ yitsoŋ, ni mikaa tsui mikwɛɔ. Mikɛ mɔ fɛɛ mɔ yeɔ yɛ ejeŋba naa; mikɛ mɔ fɛɛ mɔ yeɔ yɛ yibii ni ewoɔ naa.

¹¹ Mɔ ni taoɔ nii ni jeee gbɛ kpakpa nɔ etsɔ̃ɔ lɛ, etamɔ afi ni yabuɔ wɔji ni jeee lɛ eŋmɛ nɔ. Eninamɔ lɛ ŋmɛɔ lɛ yɛ ewala teŋ, ni enaagbee mli lɛ etsɔ̃ɔ kwashia.

¹² He ni wɔNyɔŋmɔ lɛ anunyam maŋtsɛ sɛ̃i gojoo lɛ ma kɛjɛ teteete lɛ, jɛi ji wɔjamɔhe lɛ.

¹³ Ao! Yehowa, bo Israel hiɛnɔkãmɔ, mɛi fɛɛ ni kwaa bo lɛ ahiɛ baagboi; mɛi ni kpaleɔ yɛ osɛɛ lɛ agbɛi aaalaaje tamɔ nɔ ni aŋma yɛ mlu mli, ejaakɛ amɛshi Yehowa ni ji wala nubu lɛ sɛɛ.”

Yeremia bi Yehowa dɛŋ yelikɛbuamɔ

¹⁴ Ao! Yehowa, tsa mi, ni mihe aaatã; heremɔ miyiwala koni miyi ana wala, ejaakɛ bo oyi mijieɔ.

¹⁵ Naa, maŋbii lɛ biɔ mi akɛ, “Nɛgbɛ Yehowa wiemɔi lɛ yɔɔ? Hã aba mli koo!”

¹⁶ Yehowa, minyɛko onɔ pɛŋ akɛ ohã nɔ fɔŋ aba maŋ nɛɛ nɔ, ni mishweko hu akɛ gbi fɔŋ lɛ aba. Yehowa, bo ole enɛ, ni nii fɛɛ ni je minaa lɛ jwere ohiɛ.

¹⁷ Kaawo mihe gbeyei, ejaakɛ gbi fɔŋ lɛ nɔ lɛ bo ji mibobaahe.

¹⁸ Hã mɛi ni waa mi yi lɛ ahiɛ agboi; shi mi lɛ kaahã mihiɛ miigbo. Hã amɛtsui afã, shi mi lɛ kaahã mitsui miifã. Hã gbi fɔŋ lɛ abanina amɛ; kpãtãmɔ amɛhiɛ, ni oku sɛɛ okpãtã amɛhiɛ butuu.

Hejɔɔmɔgbiyeli

¹⁹ Yehowa kɛɛ mi akɛ, “Yaa ni oyadamɔ Maŋbii Agbo lɛ naa, he ni Yuda maŋtsɛmɛi tsɔ̃ɔ kɛbaa maŋ lɛ mli, ni amɛtsɔ̃ɔ jɛi kɛjeɔ kpo lɛ. Yaadamɔ Yerusalɛm agboi fɛɛ hu anaa,

²⁰ koni okɛɛ akɛ, ‘Nyɛboa nɔ ni Yehowa kɛɛ toi, nyɛ Yuda maŋtsɛmɛi kɛ Yudabii kɛ nyɛ Yerusalɛm maŋbii, nyɛ mɛi fɛɛ ni tsɔ̃ɔ agboi nɛɛ amli lɛ.

²¹ Bɔ ni Yehowa kɛɛ ekoŋŋ nɛ, Nyɛkwɛa jogbaŋŋ yɛ nyɛ diɛŋtsɛ nyɛwala hewɔ koni nyɛkatere jatsu ko yɛ hejɔɔmɔ gbi lɛ nɔ, aloo nyɛtere jatsu ko kɛtsɔ̃ Yerusalɛm agboi nɛɛ amli kɛbote maŋ lɛ mli.

²² Nakai nɔŋŋ nyɛkatere jatsu ko kɛmiijɛ shĩa ko mli kɛmiije kpo yɛ hejɔɔmɔ gbi lɛ nɔ. Nyɛkatsua nitsumɔ ko nitsumɔ ko; shi moŋ nyɛyea hejɔɔmɔ gbi lɛ krɔŋkrɔŋ tamɔ bɔ ni miwo nyɛtsɛmɛi lɛ kitã yɛ he akɛ amɛfee lɛ.

²³ Shi moŋ kɛ̃lɛ nyɛtsɛmɛi lɛ booo mi toi, ni amɛyeee nɔ; shi amɛfee amɛhe kuɛŋtilɔi ni amɛbooo mi toi koni amɛkase nii.’

²⁴ “Shi mi, Yehowa miikɛɛ akɛ, ‘Kɛji nyɛbo mi toi, ni nyɛkɛ jatsu ko jatsu ko tsɔ̃ɔɔ maŋ nɛɛ agbo ko mli kɛboteee maŋ lɛ mli yɛ hejɔɔmɔ gbi lɛ nɔ, shi moŋ nyɛye hejɔɔmɔ gbi lɛ akɛ gbi krɔŋkrɔŋ, ni nyɛtsuuu nitsumɔ ko nitsumɔ ko yɛ nɔ lɛ,

²⁵ no lɛ nyɛmaŋtsɛmɛi ni taa David maŋtsɛ sɛi lɛ nɔ baaya nɔ atsɔ̃ agboi nɛɛ amli ni amɛtara tayaa shwiilii amli kɛ okpɔŋɔi anɔ, ni amɛshishi lumɛi lɛ hu aaatara okpɔŋɔi anɔ kɛtsɔ̃ maŋ nɛɛ agboi lɛ amli kɛba maŋ lɛ mli; ni Yudabii kɛ Yerusalɛmbii hu aaafee nakai, ni gbɔmɛi baahi Yerusalɛm maŋ nɛɛ mli kɛaate naanɔ.

²⁶ Mɛi kɛ shãa afɔle kɛ kooloi afɔlei kɛ niyenii afɔlei kɛ tsofakɛŋmai aaaba kɛaajɛ Yuda maji lɛ anɔ kɛ heihei ni bɔle Yerusalɛm lɛ; mɛi baajɛ Benyamin shikpɔŋ lɛ nɔ yɛ kooyigbɛ kɛ anaigbɛ kɛ gɔji lɛ anɔ kɛ wuoyigbɛ ŋa shikpɔŋ lɛ nɔ aba Yehowa we lɛ abada lɛ shi.

²⁷ Shi kɛji nyɛbooo mi toi akɛ nyɛye hejɔɔmɔ gbi lɛ akɛ gbi krɔŋkrɔŋ lɛ, ni no gbi lɛ nɔ, mɔ ko tere jatsu ko kɛtsɔ̃ Yerusalɛm agboi lɛ eko mli kɛba maŋ lɛ mli yɛ hejɔɔmɔ gbi lɛ nɔ lɛ, no lɛ mibama maŋ lɛ agboi lɛ anaa la, ni la nɛɛ baashã Yerusalɛm mli mɔji lɛ, ni mɔ ko nyɛŋ agbe.’ ”