Yeremia 15 - ŊMALƐ KRƆŊKRƆŊ LƐ

Sane fɔŋ baaye Yudabii

¹ Kɛkɛ ni Yehowa kɛɛ mi akɛ, “Kɛji Mose kɛ Samuel tete po damɔ mihiɛ lɛ, minaŋ nɛkɛ gbɔmɛi nɛɛ ahe tsui. Shwiemɔ amɛ kɛje mihiɛ ni amɛya!

² Ni kɛji amɛbi bo akɛ, ‘Nɛgbɛ wɔya?’ lɛ, kɛɛmɔ amɛ akɛ, Nɔ ni mi, Yehowa, mikɛɛ ji enɛ, ‘Nyɛteŋ mɛi ni ajɔɔ amɛnɔ ahã gbele hela lɛ, gbele hela nɔŋŋ kɛ̃ baagbe amɛ. Nyɛteŋ mɛi ni ajɔɔ amɛnɔ ahã klante lɛ, klante nɔŋŋ baagbe amɛ. Ni mɛi ni ajɔɔ amɛnɔ ahã hɔmɔ lɛ, hɔmɔ naa nɔŋŋ kɛ̃ amɛbaagboi yɛ. Nyɛteŋ mɛi ni ajɔɔ amɛnɔ ahã nomŋɔɔ lɛ, nomŋɔɔ mli nɔŋŋ kɛ̃ amɛaate.

³ Mi, Yehowa, miikɛɛ akɛ, mibahã nibii srɔtoi ejwɛ komɛi aba amɛnɔ. Ta baaba abakpãtã amɛhiɛ, ni gbei baashãtã amɛ, ni ŋwɛi loofɔji kɛ ŋaŋ kooloi baaye amɛloo.

⁴ Mahã jeŋ majimaji fɛɛ ahe ajɔ̃ amɛhe yɛ nɔ ni Hezekia bi Manase, ni ji Yuda maŋtsɛ lɛ, fee yɛ Yerusalɛm lɛ hewɔ.’ ”

⁵ Yehowa tee nɔ akɛ, “Ao Yerusalɛm, namɔ baana bo mɔbɔ, ni namɔ baaye bo ŋkɔmɔ? Namɔ baaba ebabi oshi?

⁶ Okwa mi, ni sɛɛsɛɛ kɛkɛ oyaa; no hewɔ ni miwo minine nɔ yɛ onɔ ni mikpãtã ohiɛ lɛ; ohe musuŋtsɔlɛ etɔ mi.

⁷ Misha nyɛmli yɛ agbonaa tamɔ ashaa ŋmãa mli koni kɔɔyɔɔ abaloo nyɛ yɛ majimaji fɛɛ amli kɛya tamɔ tutuu. Migbe miwebii abii yɛ amɛhe, mikpãtã miwebii lɛ ahiɛ, ejaakɛ amɛtsakeee amɛjeŋba gbonyo lɛ.

⁸ Mihã amɛyei okulafoi ayi efa fe ŋshɔnaa shia. Mihã sane fɔŋ eye oblahii anyɛmɛi, ejaakɛ mihã hiɛkpãtãlɔ lɛ ekpãtã amɛblahii ahiɛ shwane fintiŋŋ. Mihã ŋmiŋmi kɛ tsuifãa sane eba amɛnɔ trukaa.

⁹ Yoo ni efɔ kpawo lɛ etɔ biti; nɔ nyɔ enɔ, ni egbo; ehulu enyɔ shi shwane fintiŋŋ; awo lɛ hiɛgbele, ni ashwie ehiɛ shi. Ni amɛteŋ mɛi ni eshwɛ lɛ, majɔɔ amɛnɔ mahã amɛhenyɛlɔi aklante. Mi Yehowa, mikɛɛ.”

Yeremia ye ŋkɔmɔ etsɔ̃ɔ Yehowa

¹⁰ Minyɛ Awo, kpoo hã mi akɛ ofɔ mi! Naa mi ni shikpɔŋ muu lɛ fɛɛ kɛ mi miibe, ni akɛ mi miitaa naa sɔŋŋ. Mifako mɔ ko nɔ ko lɛ, mɔ ko hu efako nɔ ko yɛ midɛŋ; shi loomɔ sɔŋŋ kɛkɛ mɔ fɛɛ mɔ lomɔɔ mi.

¹¹ Ao! Yehowa, kɛji mikpako bo fai mihãko amɛ bɔ ni afee ni ahi ahã amɛ; aloo eji yɛ amɛfimɔ kɛ hejaramɔ bei amli lɛ, mitutɔko bo mihãko amɛ kulɛ, hã amɛloomɔ lɛ aba mli.

¹² Ani mɔ ko baanyɛ kooyigbɛ dade ni akɛ akɔɔble efutu mli lɛ mli aku lo?

¹³ Yehowa kɛɛ akɛ, “Eshai fɛɛ ni amɛfee yɛ shikpɔŋ lɛ nɔ he fɛɛ he hewɔ lɛ, mahã henyɛlɔi abaha amɛjwetri kɛ amɛnii fɛɛ yaka.

¹⁴ Mahã amɛyasɔ̃mɔ amɛhenyɛlɔi yɛ maŋsɛɛ shikpɔŋ ni amɛleee jɛi nɔ, ejaakɛ mimlifu lɛ tamɔ la ni ashɛre, ni ebaatso kɛya naanɔ.”

¹⁵ Kɛkɛ ni mikɛɛ akɛ, “Ao! Yehowa, ole misane lɛ fɛɛ. Kaimɔ mi koni obaye obua mi, ni otɔ mihe owele yɛ mɛi ni waa mi yi lɛ anɔ. Kaaŋmɛ otsui shi ohã amɛ, ni no hã amɛnine shɛ minɔ. Kaimɔ akɛ bo ohewɔ abɔɔ mi ahora nɛɛ.

¹⁶ Ao! Yehowa, Taiatsɛ, be ni minu owiemɔi lɛ mimɔ mli, ni ehã mina miishɛɛ, ni mimli fili mi, ejaakɛ akɛ ogbɛi ewo mi.

¹⁷ Mitaaa mɛi ni amɛmli efili amɛ ateŋ, ni mimli efiliii mi. Mi koome mita shi yɛ ofãmɔ naa, ejaakɛ ohã mimli efu naakpa.

¹⁸ Mɛɛba minɔnaa nɛɛ kã he daa, ni mifala lɛ ehiii tsamɔ, ni ekpɛlɛ̃ɛɛ tãlɛ nɛɛ. Ani ofee tamɔ faa ni lakaa mɔ loo faa ni ŋalaa ohã mi?”

¹⁹ Shi Yehowa to he akɛ, “Kɛji okpale lɛ, mibaŋɔ bo ekoŋŋ, ni obaasɔ̃mɔ mi. Kɛji owie wiemɔi ni ahe yɔɔ sɛɛnamɔ, shi jeee nɔ ni he bɛ sɛɛnamɔ lɛ, no lɛ obaawie minaa ekoŋŋ. Amɛ amɛaakpale kɛba oŋɔɔ, shi jeee bo ni obaakpale kɛya amɛŋɔɔ.

²⁰ Mahã otsɔ̃ tamɔ gbogbo ni wa, tamɔ akɔɔble ohã gbɔmɛi nɛɛ; amɛkɛ bo baawu nɛ, shi amɛyeŋ onɔ kunim, ejaakɛ mikɛ bo yɛ, ni mibahere oyiwala.

²¹ Mibahere bo yɛ mɛi fɔ̃ji adɛŋ, ni mibakpɔ̃ bo yɛ yiwalɔi adɛŋ. Mi Yehowa, mikɛɛ.”