Yeremia 14 - ŊMALƐ KRƆŊKRƆŊ LƐ

Nu hɔmɔ ni naa wa lɛ

¹ Wiemɔ ni Yehowa kɛ Yeremia wie yɛ nu hɔmɔ he nɛ,

² “Yuda miiye ŋkɔmɔ, egboi anaabulɔi lɛ etɔ biti; amɛjwere shikpɔŋ amɛmiiye ŋkɔmɔ, ni Yerusalɛm miibolɔ waa.

³ Emaŋ abladei lɛ tsuɔ amɛtsuji lɛ faŋŋ; amɛyashɛɔ nubui lɛ anaa, shi amɛnaaa nu; ni amɛkuɔ amɛsɛɛ kɛbaa; kɛ amɛgbɛi foji; amɛhiɛ gboiɔ, amɛluɔ ni amɛhaa amɛyiteiaŋ.

⁴ Akɛni nu enɛɛɛ, ni shikpɔŋ egbi keketee hewɔ lɛ, okwaafoi ahiɛ egboi; no hewɔ lɛ, amɛkɛ amɛnine etsi amɛhiɛ.

⁵ Ofrote yoo tete shiɔ ebi ŋmɔŋ, ejaakɛ jwɛi bɛ he ko he ko ni ayeɔ.

⁶ Ŋaŋ tejii damɔɔ gɔji kpataai anɔ, ni amɛhakuɔ kɔɔyɔɔ tamɔ ŋaŋgbei; amɛhiŋmɛii eshiu, ejaakɛ baa kome folo bɛ he ko he ko.

⁷ ‘Wɔnishaianii lɛ miibu wɔ fɔ moŋ; shi Yehowa, ogbɛi lɛ hewɔ lɛ, feemɔ he eko ohã wɔ; tsɛbelɛ wɔsɛɛsɛɛyaa lɛ fa tsɔ̃, ni wɔfee esha wɔshi bo.

⁸ Ao! Israel hiɛnɔkãmɔ, bo ni ohereɔ eyiwala yɛ fimɔ be mli, mɛɛba ofee tamɔ gbɔ yɛ shikpɔŋ lɛ nɔ, loo tamɔ gbɛnyiɛlɔ ni gbaa eyatoɔ gbɛkɛ toohe nɛɛ?

⁹ Mɛɛba ofee tamɔ nuu ni elu tamɔ kãkãlɔ ni nyɛɛɛ mɔ yiwala ehere nɛɛ? Ao! Yehowa oyɛ wɔteŋ tuuŋtu ni ogbɛi akɛwo wɔ; kaashi wɔ.’ ”

¹⁰ Bɔ ni Yehowa kɛɛ yɛ gbɔmɛi nɛɛ ahe nɛ, “Nɛkɛ amɛsumɔ akɛ amɛkpa shi, ni etɔɔɔ amɛ kɛ shikpaa lɛ. No hewɔ lɛ, mi Yehowa, mihereŋ amɛ atuu dɔŋŋ. Agbɛnɛ mibakai amɛnishaianii lɛ moŋ, ni mibagbala amɛtoi yɛ amɛhe eshai lɛ ahewɔ.”

¹¹ Yehowa kɛɛ mi akɛ, “Kaakpa ejurɔyeli he fai ohã maŋ nɛɛ.

¹² Tsɛbelɛ amɛbaahi ŋmaa nɛ, shi miboŋ amɛfaikpamɔ blɔmɔ lɛ toi; ni amɛbaashã shãa afɔlei kɛ niyenii afɔle hu nɛ, shi mimɔŋ mli; ni mikɛ ta kɛ hɔmɔ kɛ hela baaplenee amɛ.”

¹³ Kɛkɛ ni mikɛɛ akɛ, “Ao! Nuŋtsɔ Nyɔŋmɔ, naa, gbalɔi lɛ kɛɔ gbɔmɛi nɛɛ akɛ, ‘Nyɛnaŋ ta ko, ni nyɛnaŋ hɔmɔ ko; shi moŋ mahã nyɛ toiŋjɔlɛ ni sɛɛ efooo yɛ biɛ nɛɛ.’ ”

¹⁴ Kɛkɛ ni Yehowa kɛɛ mi akɛ, “Gbalɔi lɛ miigba amale gbalɛi yɛ migbɛi mli. Jeee mi mitsu amɛ lɛ, jeee mi mifã amɛ lɛ, jeee mi, mikɛ amɛ ewie hu. Amɛmiigba amale ninai kɛ yaka klamɔi kɛ amɛ diɛŋtsɛ amɛyiŋ lakamɔi amɛmiitsɔ̃ɔ nyɛ.

¹⁵ No hewɔ lɛ, nɔ ni mi, Yehowa, mikɛɔ yɛ gbalɔi nɛɛ ni gbaa yɛ mi migbɛi mli, tsɛbelɛ mitsuko amɛ, ni kɛ̃lɛ amɛkɛɔ akɛ, ‘Ta kɛ hɔmɔ ko baŋ shikpɔŋ lɛ nɔ,’ lɛ ahe nɛ: Ta kɛ hɔmɔ nɔŋŋ nɔ abaatsɔ̃ akpãtã gbalɔi nɛɛ ahiɛ.

¹⁶ Ni ta kɛ hɔmɔ nɔŋŋ nɔ abaatsɔ̃ akpãtã mɛi ni amɛgbaa amɛtsɔ̃ɔ lɛ hu ahiɛ. Ni abaashɛrɛ amɛ kɛ amɛŋamɛi kɛ amɛbihii kɛ amɛbiyei agbohii ashwie Yerusalɛm gbɛjegbɛi lɛ anɔ, ni anaŋ mɛi ni baafu amɛ tete. Mibawo amɛ amɛnifɔ̃ɔjianii lɛ he nyɔmɔ.”

¹⁷ Yehowa fã mi akɛ mikɛɛ maŋbii lɛ akɛ, “Ahã mihiŋmɛiiaŋ akpala nu shwaneshwane kɛ nyɔɔŋnyɔɔŋ fɛɛ ni esɛɛ akafo; ejaakɛ mimaŋbii lɛ epila, aye amɛ awui ablaŋ.

¹⁸ Kɛji miyiŋ mitee ŋa lɛ nɔ lɛ, naa, gbohii ni enyɔnyɔɔi yɛ ta mli, kɛji miku misɛɛ kɛba maŋ lɛ mli lɛ, naa, gbɔmɛi ni hɔmɔ egbe amɛ. Ni gbalɔi lɛ kɛ osɔfoi lɛ miitsu amɛnitsumɔi lɛ yɛ shikpɔŋ lɛ nɔ nɛ; shi amɛleee nɔ ni amɛfeɔ lɛ.”

Maŋbii lɛ kpa Nyɔŋmɔ fai

¹⁹ Yehowa, aso oshɛ Yuda ofɔ̃ kwrakwra? Ani onyaŋe Zionbii lo? Mɛɛba mɔ otswia wɔ nii ni opila wɔ bɔ ni ehiii tsamɔ nɛɛ? Wɔkwɛ hejɔlɛ gbɛ, shi nɔ kpakpa ko baaa; wɔhiɛ kã tsamɔ nɔ; shi gbeyei nii moŋ ba.

²⁰ Ao! Yehowa, wɔmiikpɛ̃lɛ wɔnifɔ̃ɔjianii kɛ wɔtsɛmɛi lɛ hu anifɔ̃ɔjianii lɛ anɔ, ejaakɛ wɔfee esha wɔshi bo.

²¹ Ogbɛi lɛ hewɔ lɛ, kaakwa wɔ; kaahã Yerusalɛm hiɛ miishwie shi; he ni ogbojee maŋtsɛ sɛ̃i lɛ yɔɔ lɛ. Kaimɔ kpãŋmɔ ni okɛ wɔ kpãŋ lɛ; ni okaku mli.

²² Ani majimaji lɛ alagbãalagbã wɔji lɛ ateŋ eko nyɛɔ ehãa nu nɛɔ? Loo ŋwɛi tete nyɛɔ lɛ diɛŋtsɛ ehãa nu nɛɔ? Ao! Yehowa, wɔNyɔŋmɔ, bo pɛ gbɛ wɔkwɛɔ, ejaakɛ bo pɛ otsuɔ enɛɛmɛi fɛɛ kwa.