Yeremia 13 - ŊMALƐ KRƆŊKRƆŊ LƐ

Hɛŋmɔɔ bo lɛ he abɛ

¹ Yehowa kɛɛ mi akɛ, “Yaa koni oyahe hɛŋmɔɔ bo koni okɛŋmɔ ohɛ; okɛ mama nɛɛ akatsɔ nu mli.”

² Yɛ Yehowa wiemɔ naa lɛ, mitee miyahe hɛŋmɔɔ bo lɛ, ni mikɛŋmɔ mihɛ.

³ Yehowa kɛ mi wie nɔ ni ji shii enyɔ nɔ, ni ekɛɛ mi akɛ,

⁴ “Yaa Eufrate Faa lɛ naa koni okɛ hɛŋmɔɔ bo lɛ ni oyahe ni ŋmɔ ohɛ lɛ ayatee tɛsaa fɔlɔ ko mli yɛ jɛi.”

⁵ No hewɔ lɛ, miyi mli mitee, ni mikɛ hɛŋmɔɔ bo lɛ yatee yɛ Eufrate Faa lɛ naa tamɔ bɔ ni Yehowa fã mi lɛ.

⁶ Gbii kplaŋŋ sɛɛ lɛ Yehowa kɛɛ mi akɛ, “Tee shi! Yaa Eufrate Faa lɛ naa koni oyakɔ hɛŋmɔɔ bo lɛ ni mifã bo akɛ okɛyatee yɛ jɛi lɛ kɛba.”

⁷ Kɛkɛ ni miyiŋ mitee Eufrate Faa lɛ naa, ni miyatsa hɛŋmɔɔ bo lɛ yɛ he ni mikɛyato lɛ; ni naa bo lɛ efite bɔ ni ehiii hãaa nɔ ko nɔ ko feemɔ dɔŋŋ.

⁸ No sɛɛ lɛ, Yehowa kɛ mi wie akɛ,

⁹ “Bɔ ni mi, Yehowa, mikɛɔ nɛ. Nɛkɛ pɛpɛɛpɛ ji bɔ ni mibafo Yuda hewoo lɛ kɛ Yerusalɛm hu hewoo babaoo lɛ sɛɛ mahã.

¹⁰ Nɛkɛ gbɔmɛi nɛɛ efee amɛhe gbɔmɛi fɔ̃ji ni booo miwiemɔi toi. Amɛkɛ kuɛŋtimɔ feɔ nɔ ni amɛ diɛŋtsɛ amɛsumɔɔ, ni amɛyanyiɛ nyɔŋmɔi krokomɛi asɛɛ, ni amɛsɔ̃mɔ amɛ, ni amɛja amɛ moŋ. No hewɔ lɛ, amɛbaatsɔ̃ tamɔ hɛŋmɔɔ bo nɛɛ ni ehiii hãaa nɔ ko nɔ ko feemɔ dɔŋŋ lɛ.

¹¹ Bɔ ni hɛŋmɔɔ bo kpɛtɛɔ mɔ he lɛ, nakai mihã Israel kɛ Yuda fɛɛ kpɛtɛ mihe koni amɛtsɔ̃ mimaŋ, koni amɛhã mana gbɛi kɛ yijiemɔ, koni amɛhã mihiɛ aba nyam; shi amɛbooo miwiemɔ toi. Bɔ ni Yehowa kɛɛ nɛ.”

Wain Kpulu he abɛ lɛ

¹² “Kɛɛmɔ amɛ akɛ bɔ ni Yehowa, Israel Nyɔŋmɔ lɛ, kɛɔ nɛ: Awo kpulu fɛɛ kpulu obɔ̃ kɛ wain. Amɛbaakɛɛ bo akɛ, ‘Aso wɔ diɛŋtsɛ lɛ wɔleee akɛ kpulu fɛɛ kpulu baayi obɔ̃ kɛ wain lo?’

¹³ Kɛkɛ lɛ obaakɛɛ amɛ akɛ, bɔ ni Yehowa kɛɔ ji akɛ, ‘Naa, mibahã shikpɔŋ nɛɛ nɔ gbɔmɛi fɛɛ atɔrɔ dãa kpɔtɔɔ, kɛjɛ maŋtsɛmɛi ni ji David shwiei ni bayeɔ esɛɛ anɔ kɛyashi osɔfoi lɛ kɛ gbalɔi lɛ kɛ Yerusalɛm maŋbii fɛɛ anɔ.

¹⁴ Ni mibamɔmɔ tsɛmɛi kɛ bii fɛɛ mikɛtswiatswia amɛhe; ni mi, Yehowa, miikɛɛ akɛ minaŋ mɔbɔ, ni mikɔ̃ŋ mifiliŋ, ni mimusuŋ etsɔ̃ŋ mi akɛ mikpãtã amɛhiɛ.’ ”

Yeremia bɔ hewoo he kɔkɔ

¹⁵ Nyɛfea toi ni nyɛbo toi! Nyɛkawoa nyɛhe ejaakɛ Yehowa ewie.

¹⁶ Nyɛwoa Yehowa, nyɛNyɔŋmɔ lɛ, hiɛ nyam, be ni ehãko duŋ awo nyɛ, be ni nyɛbɔ̃iko tɛrɛmɔ yɛ gɔji ni anɔ ewo duŋ lɛ anɔ; ni be mli ni okwɛɔ la gbɛ lɛ, ehãa duŋ moŋ woɔ, ni duŋ lɛ woɔ kabitii.

¹⁷ Shi kɛji nyɛbooo toi lɛ, mibafo yɛ teemɔ mli yɛ nyɛhewoo lɛ hewɔ; mibafo bloblo kɛ dɔlɛ, ejaakɛ aŋɔ Yehowa webii lɛ nom.

¹⁸ Kɛkɛ ni Yehowa kɛɛ mi akɛ, “Kɛɛmɔ maŋtsɛ lɛ kɛ maŋnyɛ lɛ hu akɛ, ‘Nyɛbaa nyɛhe shi, ejaakɛ akpa nyɛ lumɔyeli. Nyɛtaraa humi sɛ̃i nɔ, ejaakɛ nyɛnunyam akekre lɛ eje nyɛyitso egbee shi.

¹⁹ Asa Yuda wuoyigbɛ shikpɔŋ lɛ nɔ maji lɛ ayi, ni mɔ ko mɔ ko nyɛŋ amɛ ahere. Aŋɔ Yuda fɛɛ nom; aŋɔ amɛ fɛɛ tswɛm nom kɛtee.

²⁰ “Yerusalɛm, wo ohiɛ nɔ koni okwɛ henyɛlɔi ni jɛ kooyigbɛ baa nɛɛ. Nɛgbɛ mɛi ni akɛhã bo akɛ okwɛ amɛnɔ lɛ yɔɔ, mɛi ni ji onunyam lɛ?

²¹ Mɛni oookɛɛ kɛji mɛi ni bo diɛŋtsɛ otsɔse amɛ koni amɛfee onanemɛi lɛ, awo amɛ moŋ onukpa yɛ onɔ? Ani ewaŋ ohe tamɔ yoo ni miikɔmɔ piŋɔ lɛ?

²² Ni kɛji obi ohe akɛ, ‘Mɛɛba ni nɛkɛ sane eba minɔ?’ lɛ, na ole akɛ onishaianii ni naa wa lɛ hewɔ ni akpa ohe mama, ni ashwie ohiɛ shi nɛɛ.

²³ Ani mɔdiŋ aaanyɛ ehewolo su etsake, aloo mlaŋtswi aaanyɛ ehe truntrãi lɛ etsake? Kɛji amɛaanyɛ lɛ, no lɛ nyɛ mɛi ni efɔŋfeemɔ eka nyɛnɔ nɛɛ, nyɛ hu nyɛaanyɛ ekpakpa nyɛfee.

²⁴ Mibagbɛ nyɛ mashwã tamɔ tutuu ni kɔɔyɔɔ etswa kɛjɛ shiaŋa nɔ.

²⁵ Enɛ ji nɔ ni mito akɛ mibafee bo, ejaakɛ ohiɛ kpa minɔ, ni okɛ ohiɛ fɔ̃ amale nyɔŋmɔi moŋ anɔ. Mi, Yehowa, mikɛɛ.

²⁶ No hewɔ lɛ, mi diɛŋtsɛ mibawo ohiɛ mama nɔ koni ohiɛ ashwie shi.

²⁷ Mina nii ni mihiɔ ni ofeɔ lɛ, kɛ misɛɛ ni ojeɔ ni oyajaa nyɔŋmɔi krokomɛi lɛ, kɛ onyɛnyɛŋtswi ni obɔɔ lɛ, kɛ ajwamãŋ ni obɔɔ nyaŋemɔnyaŋemɔ yɛ ŋa nɔ gɔ̃ŋkpɔi lɛ anɔ lɛ. Kpoo hã bo, bo Yerusalɛm! Mɛɛbe abaakã he atsuu ohe kɛyashi?”