Yeremia 12 - ŊMALƐ KRƆŊKRƆŊ LƐ

Yeremia bi Yehowa sane

¹ Yehowa, kɛji mi kɛ bo taa naa tete lɛ onɔ jaa; kɛ̃lɛ mikɛ mi sane nɛɛ miifɔ̃ ohiɛ. Mɛni hewɔ mɛi fɔ̃ji agbɛ jaa hãa amɛ, ni kutumpɔfoi shwereɔ lɛ?

² Otɛoɔ amɛ, ni amɛfãi mɔmɔɔ shi, amɛdaraa, ni amɛwoɔ yibii. Amɛwieɔ ohe ekpakpa kɛ amɛnaabu shi amɛtsui mli lɛ, amɛ kɛ bo teŋ jɛkɛ.

³ Shi, Yehowa, mi lɛ ole mi, ni onaa minifeemɔnii; ni okaa bɔ ni mijwɛŋɔ yɛ ohe okwɛɔ. Shatãmɔ amɛ kɛya tamɔ toi ni ayaagbe amɛ, ni ojɔɔ amɛnɔ oto kɛyashi gbi nɔ ni abaagbe amɛ lɛ.

⁴ Mɛɛ beyinɔ nɔŋŋ po shikpɔŋ lɛ nɔ aaagbi, ni ŋa lɛ nɔ jwɛi aaaŋalã kɛyashi? Shikpɔŋ lɛ nɔ bii lɛ anifɔ̃ɔjianii ehã enɔ kooloi kɛ loofɔji fɛɛ etã; ejaakɛ amɛkɛɔ akɛ, “Enaŋ bɔ ni wɔnaagbee aaatamɔ.”

⁵ Kɛkɛ ni Yehowa kɛɛ akɛ, “Yeremia, kɛji okɛ gbɔmɛi da foi ni amɛhã eje otsine lɛ, te ooofee tɛŋŋ okɛ okpɔŋɔi ashi mple hu? Ni kɛji shikpɔŋ trɛnɛɛ nɔ tete ogbee shi yɛ lɛ, te ooofee tɛŋŋ yɛ Yordan Faa lɛ he koo hayii lɛ amli hu?

⁶ Ejaakɛ onyɛmimɛi kɛ otsɛ we lɛ, amɛ tete po amɛkwa bo; ni amɛmiitao bo efɔŋ waa diɛŋtsɛ. Kɛji amɛdɔkɔ amɛnaa amɛhã bo tete lɛ, kaahe amɛ oye.”

Yehowa ye ewebii lɛ ahe ŋkɔmɔ

⁷ Yehowa kɛɛ akɛ, “Mikwa mimaŋ Israel, mishi migbɛfaŋnɔ lɛ sɛɛ, miŋmɛɛ mimaŋ ni misumɔɔ kɛ mitsui fɛɛ lɛ he miwo ehenyɛlɔi adɛŋ.

⁸ Mimɛi lɛ etsɔ̃ amɛhe amɛwo mi tamɔ koo mli jata, ni amɛbolɔɔ amɛwoɔ mi, no hewɔ lɛ, minyɛɔ amɛ.

⁹ Ani mimɛi lɛ etsɔ̃ loofɔlɔ looyelɔ kɛ ehe ŋwãtãŋwãtã ehã mi lo? Ani loofɔji looyelɔi ebɔle lɛ kɛkpe kpula? Yaa koni oyabua ŋaŋ kooloi fɛɛ anaa ni okɛ amɛ aba koni amɛbaye nii.

¹⁰ Tookwɛlɔi babaoo ekpãtã miwain abɔɔ lɛ hiɛ, amɛnaanaa migbɛfaŋnɔ lɛ nɔ; amɛhã migbɛfaŋnɔ fɛɛfɛo lɛ etsɔ̃ ŋa kpataa.

¹¹ Amɛhã etsɔ̃ amaŋfɔ̃; ekã shi amaŋfɔ̃ eefo eetsɛ mi. Shikpɔŋ tso muu lɛ fɛɛ etsɔ̃ amaŋfɔ̃, shi jeee mɔ ko mɔ ko he sane ko ni.

¹² Niiahiɛkpãtãlɔi eba shiaŋa lɛ nɔ gɔji kpataai lɛ anɔ fɛɛ, ejaakɛ Yehowa ehã klante miiye nii kɛjɛ shikpɔŋ lɛ naagbeehe kome kɛyagbee enaagbeehe kome; adesa ko adesa ko kwraa bɛ toiŋjɔlɛ.

¹³ Mimɛi lɛ du ŋmaa; shi amɛkpa ŋmei. Amɛgbo deŋme; shi amɛnaaa he sɛɛ ko. Yehowa mlifu lɛ naawalɛ hewɔ lɛ, nii ni amɛbaakpa lɛ baafee amɛ hiɛgbele.”

Yehowa wo Israel maji lɛ shi

¹⁴ Yehowa kɛɛ, “Miyɛ nɔ ko ni mikɛɔ yɛ Israel hewɔ maji fɔ̃ji ni efite shikpɔŋ ni mikɛhã mimaŋ Israel lɛ ahe. Naa, mibashwie nakai gbɔmɛi lɛ kɛje shikpɔŋ nɔ he ni amɛyɔɔ lɛ, ni mibahere Yudabii lɛ yɛ amɛdɛŋ.

¹⁵ Shi be ni mishwie amɛ sɛɛ lɛ, mimusuŋ aaatsɔ̃ mi yɛ amɛhe, ni mibaku sɛɛ mikɛ amɛteŋ mɔ fɛɛ mɔ aba lɛ diɛŋtsɛ emaŋ kɛ eshikpɔŋ nɔ ekoŋŋ.

¹⁶ Ni kɛji be ni aaashɛ nakai be lɛ amɛkase mimɛi lɛ ajeŋba, ni amɛkɛ migbɛi aaakã kitã akɛ, ‘Mina Yehowa, tamɔ bɔ ni amɛtsɔ̃ɔ mimaŋbii lɛ Baal gbɛi kɛ kitãkãmɔ lɛ, no lɛ mibaŋɔ amɛ mashi mimɛi lɛ anɔ.’

¹⁷ Shi kɛji maŋ ko booo toi lɛ, no lɛ mafã nakai maŋ lɛ kɛ eshishi fɛɛ, ni mibakpãtã ehiɛ. Mi, Yehowa, mikɛɛ.”