Yeremia 10 - ŊMALƐ KRƆŊKRƆŊ LƐ

Amãgãjamɔ kɛ Nyɔŋmɔjamɔ lɛ

¹ Israelbii, nyɛboa nɔ ni Yehowa kɛɔ toi,

² Yehowa kɛɛ akɛ, “Nyɛkakasea maji krokomɛi lɛ ajeŋba, ni nyɛkashea ŋwɛi okadii gbeyei, ejaakɛ majimaji lɛ ji mɛi ni sheɔ nomɛi gbeyei.

³ Amɛkusumi lɛ lakamɔ ni; amɛyafoɔ tso yɛ koo mli kɛbaa ni ŋaalɔ kɛ lema gbɔɔ,

⁴ amɛkɛ jwiɛtɛi kɛ shika shwieɔ he kɛwulaa lɛ, ni akɛ hamle kɛ plɛkoo kalaa lɛ kpɛtɛɔ shi koni ekagbee shi.

⁵ Amɛmãgãi nɛɛ tamɔ blantu ni akɛshwieɔ kooloi yɛ waatrɛ ŋmɔ mli, amɛnyɛɛɛ amɛwie; ni holemɔ aholeɔ amɛ, ejaakɛ amɛnyɛɛɛ amɛnyiɛ. Nyɛkashea amɛ gbeyei, ejaakɛ amɛnyɛɛɛ efɔŋ ko amɛfee lɛ, amɛnyɛɛɛ ekpakpa hu amɛfee.

⁶ Yehowa, mɔ ko mɔ ko bɛ ni tamɔ bo. Bo lɛ oje agbo, ni ogbɛi hu je agbo, ni eyɛ hewalɛ.

⁷ Bo majimaji fɛɛ amaŋtsɛ, namɔ po ni sheŋ bo gbeyei? Ejaakɛ bo nɔŋŋ pɛ osa woo. Majimaji lɛ anɔ nilelɔi lɛ ateŋ lɛ, kɛ amɛmaŋtsɛmɛi anɔyelihei lɛ fɛɛ lɛ mɔ ko mɔ ko bɛ ni tamɔ bo.

⁸ Buului kɛ kwashiai sɔŋŋ ji amɛ; yakanii amɛkaseɔ lɛ, ejaakɛ tso amãgã dɛŋnii amɛkaseɔ lɛ.

⁹ Akɛ jwiɛtɛi ni atswia jɛɔ Tarshish baa, ni akɛ shika jeɔ Ufaz baa. Tsoŋaalɔ kɛ shikaŋaalɔ ninenaa nitsumɔi ni. Abuɔ amɛ mama bluu kɛ mama afaseo tsuru, ŋaalɔi ni ahe esa aninenaa nitsumɔ sɔŋŋ ni.

¹⁰ Shi Yehowa ji anɔkwa Nyɔŋmɔ. Lɛ ji Nyɔŋmɔ hiɛkãalɔ kɛ Naanɔ Maŋtsɛ lɛ. Emlifu hãa shikpɔŋ hosoɔ, ni maji nyɛɛɛ emlila lɛ naa adamɔ.

¹¹ “Bɔ ni nyɛkɛɛ amɛ nɛ, ‘Nyɔŋmɔi lɛ ni jeee amɛ amɛbɔ ŋwɛi kɛ shikpɔŋ lɛ, amɛ fɛɛ amɛhiɛ baakpãtã yɛ shikpɔŋ lɛ nɔ kɛ atatuiaŋ fɛɛ.’ ”

Nyɔŋmɔ yijiemɔ lala

¹² Yehowa ji mɔ ni bɔ shikpɔŋ lɛ yɛ ehewalɛ naa, ni ebɔ je lɛ yɛ enilee naa, ni elɛɛ ŋwɛi mli eha nɔ yɛ eŋaa naa.

¹³ Kɛji ewo egbeiaŋ lɛ, nu shimɔɔ yɛ ŋwɛiniiaŋ; ni ehãa afua teɔ shi kɛjɛɔ shikpɔŋ lɛ naagbeehei lɛ kɛbaa. Lɛ ehãa srawa gbalaa yɛ nunɛmɔ mli, ahum fãa kɛjɛɔ hei ni ekɛ lɛ eto.

¹⁴ Gbɔmɔ fɛɛ gbɔmɔ lɛ kwashia ni leee nii ni; shikaŋaalɔ fɛɛ shikaŋaalɔ hiɛ shwieɔ shi yɛ emãgã hewɔ, ejaakɛ emãgãi ni eshwie lɛ apasa ni; ni wala mumɔ bɛ amɛmli.

¹⁵ Yakayaka nibii ni; mɔ akɛlakaa, be ni abaagbala amɛtoi lɛ, amɛhiɛ baakpãtã.

¹⁶ Yakob Nyɔŋmɔ lɛ tamɔɔɔ enɛɛmɛi, ejaakɛ lɛ ji mɔ ni bɔ nii fɛɛ; ni eŋɔ Israel ekɛfee lɛ diɛŋtsɛ emaŋ ni egbɛi ji Yehowa, Taiatsɛ.

Nomŋɔɔ miiba

¹⁷ Bo mɔ ni oyɔɔ maŋ ni asa eyi mli, buamɔ onibii ni jwere shikpɔŋ anaa,

¹⁸ ejaakɛ bɔ ni Yehowa kɛɛ nɛ, “Mibafɔ̃ shikpɔŋ nɛɛ nɔ bii tamɔ afɔ̃ɔ aklomia mli tɛ amrɔ nɛɛ nɔŋŋ; ni mibahã amɛhe ajara amɛ bɔ ni amɛbaanu he.”

¹⁹ Kɛkɛ ni Yerusalɛm maŋbii lɛ bolɔ akɛ, “Kpoo hã wɔ! Wɔpilamɔ lɛ naa wa!” Shi wɔkɛɛ akɛ, “Hejaramɔ nɛ moŋ; shi esa akɛ wɔdamɔ naa.”

²⁰ Afite wɔbuui lɛ ni amɛhe taŋkpei lɛ fɛɛ etserɛ. Wɔbii lɛ fɛɛ eshi wɔ amɛtee; amɛbɛ he ko he ko. Mɔ ko mɔ ko bɛ ni aaashi wɔbuui lɛ dɔŋŋ asaŋ ni eeewo amɛhe mamai lɛ.

²¹ Kɛkɛ ni mihere nɔ akɛ, “Wɔmaŋ hiɛnyiɛlɔi lɛ kwashiai ni; amɛbiii Yehowa dɛŋ gbɛtsɔ̃ɔmɔ, no hewɔ ni jeŋ ehiii hãaa amɛ, ni wɔmaŋbii lɛ fɛɛ egbɛ eshwã lɛ.

²² Naa, sane eba, onu he? Kooyigbɛ maŋ ko miihũu kɛmiiba, eeba koni ebafee Yuda maji lɛ amaŋfɔ̃ koni maji lɛ atsɔ̃ ŋaŋgbei ashihilɛhe.”

²³ Ao! Yehowa, mile akɛ gbɔmɔ adesã gbɛ bɛ lɛ diɛŋtsɛ edɛŋ; ni adesa bɛ ewala nɔ hewalɛ.

²⁴ Ao! Yehowa, kã owebii; shi bɔ ni sa kɛkɛ; jeee yɛ omlifu naa, koni okaplenee wɔ.

²⁵ Gbalamɔ majimaji lɛ ni leee bo lɛ atoi, ni okɛ mɛi hu ni jaaa bo lɛ aye, ejaakɛ amɛkpãtã Yakob shwiei lɛ ahiɛ, amɛplenee amɛ butuu, ni amɛfee amɛshihilɛhei lɛ amaŋfɔ̃.