Yeremia 1 - ŊMALƐ KRƆŊKRƆŊ LƐ

Yeremia he sane

¹ Yeremia, Osɔfo Hilkia ni hi shi yɛ Anatot yɛ Benyamin shikpɔŋ lɛ nɔ lɛ bi lɛ, wiemɔi nɛ:

² Yehowa kɛ Yeremia wie yɛ Yuda Maŋtsɛ Yosia, Amon binuu lɛ, maŋtsɛyeli afi ni ji nyɔŋma kɛ etɛ̃ lɛ nɔ.

³ Yuda Maŋtsɛ Yehoiakim, Yosia binuu lɛ, yinɔ hu lɛ, Yehowa kɛ Yeremia wie ekoŋŋ kɛyashi Yuda Maŋtsɛ Zedekia, Yosia binuu lɛ, maŋtsɛyeli afi ni ji nyɔŋma kɛ ekome lɛ naagbee. Nakai afi lɛ nɔ nyɔŋ ni ji enumɔ lɛ mli aŋɔ Yerusalɛm maŋbii lɛ nom.

Yeremia tsɛmɔ

⁴ Yehowa kɛɛ mi akɛ,

⁵ “Dani mibɔ bo yɛ onyɛ musuŋ beebe lɛ, mile bo; ni dani afɔ bo lɛ, mifee bo krɔŋkrɔŋ momo, ni miwo bo gbalɔ mihã majimaji lɛ.”

⁶ Kɛkɛ ni mito he akɛ, “Ao! Nuŋtsɔ Nyɔŋmɔ! Naa, mileee wiemɔ, ejaakɛ gbekɛ̃ kɛkɛ ji mi.”

⁷ Shi Yehowa kɛɛ mi akɛ, “Kaakɛɛ akɛ, ‘Gbekɛ kɛkɛ ji mi’, shi mɔ fɛɛ mɔ ŋɔɔ ni mibatsu bo lɛ, yaa, ni nɔ fɛɛ nɔ ni mafã bo akɛ owie lɛ, no ji nɔ ni owie.

⁸ Kaashe mɛi aŋɔɔ ni obaaya lɛ gbeyei, ejaakɛ, mikɛ bo yɛ koni mahere bo. Mi, Yehowa mikɛɛ.”

⁹ Kɛkɛ ni Yehowa kpã enine mli, ni ekɛta minaabu he, ni ekɛɛ mi akɛ, “Naa, mikɛ miwiemɔi lɛ ewo onaa.

¹⁰ Ni kɛjɛ ŋmɛnɛ lɛ, mihã bo hewalɛ yɛ maji lɛ kɛ maŋtsɛyelii lɛ anɔ, koni ofãmɔ nii, ni okumɔ oshwie shi, koni okpãtã hiɛ, ni obutu, ni osaa otswa oma shi ni otɛo ekoŋŋ.”

Ninai Enyɔ komɛi

¹¹ Kɛkɛ ni Yehowa bi mi akɛ, “Yeremia, mɛni onaa nɛɛ?” Mihere lɛ nɔ akɛ, “Blɔfoŋkatiɛtso nine ni.”

¹² Kɛkɛ ni Yehowa kɛɛ mi akɛ, “Anɔkwale ni, ejaakɛ miishi miwiemɔi lɛ ahe kpe bɔ ni afee ni mahã aba mli.”

¹³ Yehowa kɛ mi wie nɔ ni ji shii enyɔ, ni ebi mi akɛ, “Mɛni onaa lɛ?” Mihere lɛ nɔ akɛ, “Miina kukwɛi ko ni emli nii miitswa. Kukwɛi lɛ hiɛ miikwɛ biɛgbɛ kɛjɛ kooyigbɛ.”

¹⁴ Kɛkɛ ni Yehowa kɛɛ mi akɛ, “Sane fɔŋ baajɛ kooyigbɛ aba shikpɔŋ nɛɛ nɔ bii fɛɛ anɔ.

¹⁵ Ejaakɛ naa, miitsɛ kooyigbɛ shikpɔŋ lɛ nɔ maji srɔtoi lɛ anɔ bii koni amɛba, ni amɛteŋ mɔ fɛɛ mɔ kɛ emaŋtsɛ sɛi aaama Yerusalɛm agboi lɛ anaa kɛ egbogboi lɛ ahe kɛkpe. Amɛbaatua Yuda maji wuji lɛ fɛɛ hu.

¹⁶ Mibagbala miwebii lɛ atoi yɛ amɛnifɔ̃ɔjianii lɛ hewɔ akɛni amɛkwa mi, ni amɛyashã tsofakɛŋmai amɛhã nyɔŋmɔi krokomɛi, ni amɛkɛ amɛniji efee amãgãi, ni amɛja amɛ.

¹⁷ No hewɔ lɛ, bo Yeremia miamɔ, tee shi koni oyakɛɛ amɛ nɔ fɛɛ nɔ ni mibafã bo akɛ okɛɛ lɛ. Otsui akafã yɛ amɛhewɔ, kɛjeee nakai lɛ mahã ojija yɛ amɛhiɛ.

¹⁸ Naa, ŋmɛnɛ gbi nɛɛ lɛ mihã otsɔ̃ tamɔ maŋ ni atswa gbogbo awo he, tamɔ dade akulashiŋ, tamɔ akɔɔble gbogbo koni okɛ shikpɔŋ tso muu lɛ fɛɛ kɛ Yuda maŋtsɛmɛi kɛ elumɛi kɛ esɔfoi kɛ maŋbii lɛ fɛɛ ana.

¹⁹ Amɛbaate shi amɛwo bo, shi amɛyeŋ onɔ kunim, ejaakɛ mikɛ bo yɛ koni mahere bo. Mi, Yehowa, mikɛɛ.”