Yakobo 4 - ŊMALƐ KRƆŊKRƆŊ LƐ

Je lɛ kɛ naanyobɔɔ lɛ Nyɔŋmɔ nyɛɛ ni

¹ Nɛgbɛ tawui kɛ nɔmɔi ni yɔɔ nyɛteŋ lɛ jɛ? Jeee nyɛkɔnɔi ni wuɔ ta yɛ nyɛhenii lɛ amli lɛ mli ejɛ lo?

² Nyɛshweɔ nɔ ko, ni nyɛnaaa; nyɛgbeɔ mɛi ni nyɛyeɔ awuŋã, ni nyɛnine nyɛ̃ɛɛ nɔ ashɛ; nyɛnɔɔ ni nyɛwuɔ ta; nyɛnaaa nɔ ko ejaakɛ nyɛkpaaa he fai.

³ Nyɛkpaa he fai hu, ni nyɛnaaa, ejaakɛ fai fɔŋ nyɛkpaa, koni nyɛkɛ nyɛkɔnɔi lɛ akpãtã hiɛ.

⁴ Gbãlãfitelɔi! Nyɛleee akɛ naanyo ni akɛ je lɛ bɔɔ lɛ Nyɔŋmɔ nyɛɛ ni lo? No hewɔ lɛ, mɔ fɛɛ mɔ ni sumɔɔ akɛ ekɛ je lɛ abɔ naanyo lɛ etsɔ̃ Nyɔŋmɔ henyɛlɔ.

⁵ Aloo nyɛsusuɔ akɛ yaka ni ŋmalɛ lɛ kɛɔ akɛ, “Hiɛkɔ̃ɔ sɛɛ mumɔ ni hiɔ wɔmli lɛ diɔ lɛ?”

⁶ “Shi Nyɔŋmɔ lɛ, ekuɔ hewolɔi anaa, shi eduroɔ heshibalɔi.”

⁷ No hewɔ lɛ, nyɛbaa nyɛhe shi nyɛhãa Nyɔŋmɔ. Nyɛtsĩa abonsam gbɛ ni eeejo nyɛnaa foi.

⁸ Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ. Nyɛtsuua nyɛniji ahe, nyɛ eshafeelɔi, ni nyɛhãa nyɛtsuii ahe atsea, nyɛ jwɛŋmɔi enyɔnyɔɔnyɔtsɛmɛi.

⁹ Nyɛwerɛ ahoa nyɛhe ni nyɛyea ŋkɔmɔ ni nyɛfoa. Nyɛŋmɔlɔ lɛ atsɔ̃ ŋkɔmɔyeli, ni nyɛmiishɛɛ hu atsɔ̃ gbliniifeemɔ.

¹⁰ Nyɛbaa nyɛhe shi yɛ Nuŋtsɔ lɛ hiɛ, ni eeewo nyɛnɔ.

Nyɛkakojoa nyɛnanemɛi

¹¹ Nyɛkawiewiea nyɛhe, anyɛmimɛi. Mɔ ni wieɔ enyɛmi he aloo ekojoɔ enyɛmi lɛ, Mla lɛ ewieɔ eshiɔ ni Mla lɛ ekojoɔ lɛ. Shi kɛ ookojo Mla lɛ, jeee Mla lɛ nɔyelɔ ji bo, shi Mla lɛ kojolɔ moŋ ji bo.

¹² Mɔ kome ji mlawolɔ kɛ kojolɔ, mɔ ni yɔɔ hewalɛ ni ekɛhereɔ mɔ yiwala ni ekɛkpãtãa mɔ hiɛ hu lɛ. Shi bo lɛ, namɔ ji bo ni okojoɔ onaanyo?

Nyɛkashwãa nyɛfɔ̃a wɔ nɔ

¹³ Agbɛnɛ nyɛ hu! Nyɛ mɛi ni nyɛkɛɔ akɛ, “Ŋmɛnɛ loo wɔ wɔɔtee maŋ nɛɛ mli loo maŋ nɛɛ mli ni wɔyaye afi kome yɛ jɛi, ni wɔɔye jara, ni wɔɔna sɛɛ;”

¹⁴ tsɛ nyɛleee wɔ sane, mɛni ji nyɛwala lɛ? Eji lamɔ ni pueɔ be fioo ko, ni kɛ fee sɛɛ lɛ elaajeɔ.

¹⁵ Hewɔ lɛ sa moŋ akɛ nyɛkɛɔ akɛ, “Kɛji Nuŋtsɔ lɛ miisumɔ ni wɔyi ana wala lɛ, no lɛ wɔɔfee enɛ loo enɛ.”

¹⁶ Shi agbɛnɛ lɛ nyɛwoɔ nyɛhe nɔ ni nyɛshwãa; nɛkɛ shwãa nɛɛ fɛɛ lɛ, efɔŋ ni.

¹⁷ No hewɔ lɛ, mɔ ni le ekpakpafeemɔ ni efeee lɛ, esha ji no hã lɛ.