Yakobo 2 - ŊMALƐ KRƆŊKRƆŊ LƐ

Hiɛiaŋkwɛmɔ he kɔkɔbɔɔ

¹ Minyɛmimɛi, nyɛkɛ mɛi ahiɛiaŋkwɛmɔ akahiɛa wɔNuŋtsɔ Yesu Kristo ni ji anunyam Nuŋtsɔ lɛ hemɔkɛyeli lɛ.

² Ejaakɛ kɛji nuu ko ni wo shika ga kɛ atade fɛɛfɛo babote nyɛkpeehe lɛ, ni ohiafo ko hu ni wo atade taŋtaŋ babote mli,

³ ni nyɛhiɛ sɔ mɔ ni wo atade fɛɛfɛo lɛ ni nyɛkɛɛ lɛ akɛ, “Baata he kpakpa nɛɛ,” ni ohiafo lɛ, lɛ lɛ nyɛkɛɛ lɛ akɛ, “Bo lɛ damɔ jɛi, aloo baata minaji anaa yɛ biɛ” lɛ,

⁴ ani jeee niiaŋ nyɛjieɔ yɛ nyɛteŋ ni kojolɔi ni hiɛ jwɛŋmɔi fɔ̃ji nyɛtsɔ̃mɔ lɛ?

⁵ Minyɛmimɛi ni misumɔɔ, nyɛboa toi! Ani jeee je nɛɛ mli ohiafoi ni ji niiatsɛmɛi yɛ hemɔkɛyeli gbɛfaŋ lɛ Nyɔŋmɔ ehala, koni maŋtsɛyeli ni ewo mɛi ni sumɔɔ lɛ lɛ shi yɛ he lɛ atsɔ̃ amɛnɔ?

⁶ Ni nyɛ lɛ nyɛshwieɔ ohiafo lɛ hiɛ shi. Ani jeee niiatsɛmɛi lɛ yeɔ nyɛnɔ waa, ni amɛ nɔŋŋ amɛgbalaa nyɛ kɛyaa kojomɔhei lɛ?

⁷ Ani jeee amɛ nɔŋŋ amɛwieɔ gbɛi kpakpa ni akɛtsɛɔ nyɛ lɛ he efɔŋ lɛ?

⁸ No hewɔ lɛ, kɛji nyɛye kitã ni ji Mla lɛ mli oti ni kɛɔ akɛ, “Suɔmɔ onaanyo tamɔ bɔ ni osumɔɔ bo diɛŋtsɛ ohe lɛ” nɔ yɛ ŋmalɛ lɛ naa lɛ, no lɛ nyɛmiifee jogbaŋŋ.

⁹ Shi kɛji mɛi ahiɛiaŋ nyɛkwɛɔ lɛ, no lɛ nyɛmiifee esha, ni Mla lɛ kãa nyɛ akɛ mlatɔ̃lɔi.

¹⁰ Ejaakɛ mɔ ni aaaye Mla muu lɛ fɛɛ nɔ tete, shi eeetɔ̃ yɛ ekome mli lɛ, eye fɔ yɛ fɛɛ mli.

¹¹ Ejaakɛ mɔ ni kɛɛ akɛ, “Kaafite gbãlã” lɛ, ekɛɛ hu akɛ, “Kaagbe gbɔmɔ.” Ni kɛ ofiteee gbãlã shi ogbeɔ gbɔmɔ lɛ, otsɔ̃ mlatɔ̃lɔ.

¹² Nyɛwiea ni nyɛfea nyɛnii akɛ mɛi ni heyeli mla akɛbaakojo amɛ.

¹³ Ejaakɛ kojomɔ mli lɛ, mɔ ni enaaa mɔbɔ lɛ anaŋ lɛ mɔbɔ; mɔbɔnalɛ yeɔ kojomɔ nɔ kunim ni eshwãa.

Hemɔkɛyeli kɛ nitsumɔi

¹⁴ Minyɛmimɛi, kɛji mɔ ko kɛɛ eyɛ hemɔkɛyeli, shi ebɛ nitsumɔi lɛ, mɛɛ sɛɛnamɔ yɔɔ mli? Ani hemɔkɛyeli lɛ aaanyɛ eyiwala ahere?

¹⁵ Kɛji nyɛmi nuu ko loo nyɛmi yoo ko nyiɛ yayai ni enaaa edaaŋŋmaa,

¹⁶ ni nyɛteŋ mɔ ko kɛɛ amɛ akɛ, “Nyɛyaa yɛ hejɔlɛ mli, nyɛyawerea la, ni nyɛyayea nii nyɛtɔrɔa;” shi ehãaa amɛ nii ni hiaa gbɔmɔtso lɛ, mɛɛ sɛɛnamɔ yɔɔ he?

¹⁷ Nakai nɔŋŋ hemɔkɛyeli hu kɛ nitsumɔi bɛ he lɛ, eji hemɔkɛyeli ni egbo.

¹⁸ Shi mɔ ko aaakɛɛ, “Bo lɛ, oyɛ hemɔkɛyeli, ni mi lɛ, miyɛ nitsumɔi.” Tsɔ̃ɔmɔ mi ohemɔkɛyeli ni nitsumɔi bɛ he lɛ ni mi hu majɛ minitsumɔi lɛ amli matsɔ̃ɔ bo mihemɔkɛyeli lɛ.

¹⁹ Bo lɛ oheɔ oyeɔ akɛ Nyɔŋmɔ lɛ mɔ kome ni? Ofee jogbaŋŋ; mumɔi fɔ̃ji hu heɔ yeɔ ni amɛhe kpokpoɔ.

²⁰ Ao, yaka gbɔmɔ, Ootao ole akɛ hemɔkɛyeli ni nitsumɔi bɛ he lɛ hemɔkɛyeli ni egbo ni lo?

²¹ Wɔtsɛ Abraham lɛ, ani jeee nitsumɔi amli ajɛ abu lɛ bem be ni ekɛ ebi Isak yaŋmɛ afɔleshãa latɛ lɛ nɔ lɛ?

²² Oona akɛ hemɔkɛyeli kɛ enitsumɔi lɛ nyiɛ ni nitsumɔi lɛ amli ejɛ ni ehemɔkɛyeli lɛ ye emuu lɛ.

²³ Ni ŋmalɛ lɛ ni kɛɔ akɛ, “Shi Abraham he Nyɔŋmɔ eye, ni abu enɛ jalɛ ahã lɛ” lɛ ba mli, ni atsɛ lɛ Nyɔŋmɔ shieŋtsɛ.

²⁴ Nyɛmiina akɛ nitsumɔi amli ajɛɔ abuɔ gbɔmɔ bem, shi jeee hemɔkɛyeli kɛkɛ mli.

²⁵ Nakai nɔŋŋ Rahab, ajwamãŋ lɛ hu, ani jeee nitsumɔi amli ajɛ abu lɛ bem be ni ehere bɔfoi lɛ atuu ni ejie amɛ gbɛ kɛtsɔ gbɛ kroko nɔ lɛ?

²⁶ Ejaakɛ tamɔ bɔ ni gbɔmɔtso ni mumɔ bɛ mli lɛ ji gbonyo lɛ, nakai nɔŋŋ hemɔkɛyeli ni nitsumɔi bɛ he lɛ hu ji hemɔkɛyeli ni egbo.