Yakobo 1 - ŊMALƐ KRƆŊKRƆŊ LƐ

Ŋamɔ

¹ Yakobo, ni ji Nyɔŋmɔ kɛ Nuŋtsɔ Yesu Kristo tsulɔ lɛ ŋma yahã akutsei nyɔŋma kɛ enyɔ ni egbɛ eshwã lɛ. Miiŋa nyɛ!

Hemɔkɛyeli kɛ nilee

² Minyɛmimɛi, kɛji aka nyɛ yɛ nibii srɔtoi pii amli lɛ, nyɛbua lɛ miishɛɛ sɔŋŋ

³ ejaakɛ nyɛle akɛ nyɛhemɔkɛyeli kaa lɛ kɛ hiɛmiamɔ baa.

⁴ Ni nyɛhãa hiɛmiamɔ lɛ agbea enitsumɔ naa kɛwulaa shi, koni nyɛhi kɛwula shi ni nyɛye emuu ni nɔ ko akashwɛ nyɛ.

⁵ Shi kɛ nilee he ehia nyɛteŋ mɔ ko lɛ, ekpa Nyɔŋmɔ ni hãa mɛi fɛɛ faa ni ewieee mɔ ko hiɛ lɛ fai, ni aaahã lɛ.

⁶ Shi ekpa fai yɛ hemɔkɛyeli mli, ni ekaje nɔ ko nɔ ko he ŋwane; ejaakɛ ŋwanejelɔ lɛ etamɔ ŋshɔke ni kɔɔyɔɔ tswaa kɛyaa kɛbaa.

⁷ Ejaakɛ nakai gbɔmɔ ko akasusu akɛ eeena nɔ ko yɛ Nuŋtsɔ lɛ dɛŋ;

⁸ jwɛŋmɔi enyɔnyɔɔnyɔtsɛ ko fiii shi yɛ egbɛ ko gbɛ ko nɔ.

Ohĩa kɛ ninamɔ

⁹ Nyɛmi ni ji humi lɛ ashwã yɛ enɔwomɔ lɛ mli,

¹⁰ shi niiatsɛ lɛ eshwã yɛ eshibaa lɛ mli; ejaakɛ ebaaho eya tamɔ jwɛiaŋ fɔfɔi.

¹¹ Ejaakɛ hulu teɔ shi kɛ jeŋ dɔlɛ, ni eŋãlaa jwɛi lɛ, ni efɔfɔi lɛ kpalaa shwieɔ shi, ni efɛo lɛ fiteɔ; nakai nɔŋŋ niiatsɛ lɛ hu hiɛ baakpãtã yɛ egbɛi lɛ anɔ.

Kaa

¹² Ajɔɔ gbɔmɔ ni miaa ehiɛ yɛ kaa mli lɛ, ejaakɛ kɛ aka lɛ ni esa lɛ, eeena wala akekre ni Nuŋtsɔ lɛ ewo mɛi ni sumɔɔ lɛ lɛ shi yɛ he lɛ.

¹³ Kɛji aaka mɔ ko lɛ, ekakɛɛ akɛ, “Nyɔŋmɔ miika mi,” ejaakɛ Nyɔŋmɔ lɛ akaaa lɛ ni efeee efɔŋ hu, ni lɛ diɛŋtsɛ hu ekaaa mɔ ko.

¹⁴ Shi mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ.

¹⁵ No sɛɛ lɛ, akɔnɔ lɛ, kɛ eŋɔ hɔ lɛ, efɔɔ esha, ni esha lɛ hu, kɛ eda egbe naa lɛ, efɔɔ gbele.

¹⁶ Nyɛkahãa alakaa nyɛ, minyɛmimɛi ni misumɔɔ.

¹⁷ Dromɔnii kpakpai fɛɛ kɛ nikeenii ni hi kɛwula shi fɛɛ lɛ; ŋwɛi ejɛɔ ekpelekeɔ shi, kɛjɛɔ ŋwɛi lai aTsɛ lɛ ŋɔɔ, mɔ mli ni tsakemɔ loo duŋ ni tsakemɔ kɛbaa bɛ lɛ.

¹⁸ Lɛ diɛŋtsɛ esuɔmɔ naa ekɛ anɔkwale wiemɔ lɛ fɔ wɔ, koni wɔfee tamɔ enibɔɔnii lɛ amli klɛŋklɛŋ yibii.

Wiemɔ lɛ numɔ kɛ efeemɔ

¹⁹ No hewɔ lɛ, minyɛmimɛi ni misumɔɔ, mɔ fɛɛ mɔ he afee oya kɛ ninumɔ; ehumi shi kɛ wiemɔ; ehumi shi kɛ mlifu.

²⁰ Ejaakɛ gbɔmɔ mlifu tsuuu Nyɔŋmɔ jalɛnii.

²¹ No hewɔ lɛ, nyɛshɛrɛa nyaŋemɔ nitsumɔ kɛ efɔŋ ni afeɔ kɛtekeɔ nɔ fɛɛ nyɛshwiea, ni nyɛkɛ heshibaa aherea wiemɔ lɛ ni atɛo yɛ nyɛmli ni yɔɔ hewalɛ ni ekɛaahere nyɛsusumai ayiwala lɛ.

²² Shi nyɛtsɔ̃mɔa wiemɔ lɛ nɔyelɔi, shi jeee wiemɔ lɛ nulɔi kɛkɛ, ni nyɛkɛmiishishiu nyɛ diɛŋtsɛ nyɛhe.

²³ Ejaakɛ kɛji mɔ ko ji wiemɔ lɛ nulɔ kɛkɛ shi ejeee enɔyelɔ hu lɛ, nɛkɛ gbɔmɔ nɛɛ tamɔ mɔ ko ni kwɛɔ ehiɛ su lɛ yɛ ashwishwɛ mli;

²⁴ ejaakɛ ekwɛɔ ehe, ni eyaa; shi amrɔ nɔŋŋ lɛ, ehiɛ kpaa bɔ ni eyɔɔ lɛ nɔ.

²⁵ Shi mɔ ni kwɛɔ heyeli mla ni hi kɛwula shi lɛ fitsofitso ni ekãa he efeɔ ni ejeee mɔ ni nuɔ ni ehiɛ kpaa nɔ, shi moŋ etsuɔ he nii lɛ, nakai mɔ lɛ aaajɔɔ lɛ yɛ efeemɔ lɛ mli.

²⁶ Shi kɛ efeɔ mɔ ko akɛ Nyɔŋmɔ jalɔ ji lɛ, ni ewooo elilɛi manyoflɛ, shi moŋ eshishiuɔ ehe lɛ, nɛkɛ gbɔmɔ nɛɛ jamɔ lɛ, yaka ni.

²⁷ Nyɔŋmɔjamɔ ni he tse ni ehe bɛ muji ko yɛ Nyɔŋmɔ, Tsɛ lɛ, hiɛ ji enɛ, akɛ mɔ asra awusai kɛ okulafoi yɛ amɛmanehulu lɛ mli, ni ekwɛ ehe nɔ jogbaŋŋ yɛ je nɛɛ mli koni ekawo ehe muji.