Yāfó 5 - ŊMALƐ KRƆŊKRƆŊ LƐ

Mɔbɔnalɛ he sɔlemɔ

¹ Ao! Yehowa, kaimɔ nɔ ni eba wɔnɔ lɛ; kwɛmɔ bɔ ni wɔhiɛ eshwie shi!

² Wɔgboshinii etsɔ̃ gbɔi anɔ, ni wɔshĩai eyaje gbɔi adɛŋ nɛɛ.

³ Wɔtsɔ̃mɔ awusãi, wɔbɛ tsɛmɛi, ni wɔnyɛmɛi etsɔ̃mɔ okulafoi.

⁴ Nu ni wɔnuɔ lɛ, wɔkɛ shika heɔ, ni lai hu ni wɔshãa lɛ, ja wɔhe.

⁵ Ataa wɔkuɛ nɔ kɛ nitsumɔ, ni etɔ wɔ, shi ahãaa wɔ mumɔhe.

⁶ Daaŋŋmãa hewɔ lɛ, wɔkɛ wɔhe hã Ijipt kɛ Asiria.

⁷ Wɔtsɛmɛi lɛ fee esha, ni amɛho amɛtee; ni wɔ moŋ amɛsɔ̃ ebatere wɔ.

⁸ Wɔnyɔji miiye wɔnɔ, ni mɔ ko kwraa bɛ ni kpɔ̃ɔ wɔ yɛ amɛdɛŋ.

⁹ Gbɔmɔgbelɔi hiɛ klante yɛ shiaŋa lɛ nɔ. No hewɔ lɛ, wɔkɛ wɔwala shwɛɔ asɔ dani wɔnaa nii wɔyeɔ.

¹⁰ Hɔmɔ ni yeɔ wɔ lɛ naawalɛ ehã wɔhe edɔ tamɔ flɔnɔɔ mli.

¹¹ Ato yei lɛ kabonaa yɛ Zion, ni Yuda oblayei froi lɛ hu ato amɛ kabonaa.

¹² Amɛ diɛŋtsɛ amɛsɛŋɔ maŋ lumɛi lɛ, ni amɛhiɛ eshwieee onukpai ahiɛiaŋ.

¹³ Anyɛɔ oblahii anɔ ni amɛwiɛɔ yɛ wiɛ sɛɛ tamɔ nyɔji; ni gbekɛbii hii didãa yɛ lai kei ni amɛtereteree ashishi.

¹⁴ Hiimeji ekpa koishi yaa, ni oblahii hu ekpa amɛsaŋkutswaa.

¹⁵ Wɔtsuiiaŋ miishɛɛ fɛɛ sɛɛ efo, ni joo ni wɔjoɔ lɛ etsɔ̃ ŋkɔmɔyeli.

¹⁶ Wɔnunyam akekre eje wɔyitso egbee shi. Kpoo hã wɔ! Ejaakɛ wɔfee esha.

¹⁷ Wɔtsui ekumɔ, ni enɛ hewɔ lɛ wɔhiŋmɛii anɔ efee tuutuu.

¹⁸ Ejaakɛ Zion Gɔŋ lɛ nɔ kã shi amaŋfɔ̃. Jɛi etsɔ̃ ŋaŋgbei ashikpaahe.

¹⁹ Shi Ao! Yehowa, bo lɛ bo ji maŋtsɛ kɛyaa naanɔ; omaŋtsɛ sɛ̃i yɛ kɛjɛ yinɔ kɛyaa yinɔi fɛɛ.

²⁰ Mɛɛba ohiɛ aaakpa wɔnɔ kɛya naanɔ? Mɛɛba ni okwa wɔ be babaoo nɛkɛ? Ani okaiŋ wɔ kwraa dɔŋŋ?

²¹ Ao! Yehowa, kpalemɔ wɔ kɛba oŋɔɔ ekoŋŋ, ni wɔɔkpale lɛɛlɛŋ. Daimɔ wɔblema shihilɛ lɛ ohã wɔ!

²² Aloo okwa wɔ kwrakwra? Ani omli efu wɔ waa fe nine?