Yāfó 3 - ŊMALƐ KRƆŊKRƆŊ LƐ

Toigbalamɔ kɛ hesɛɛjee kɛ hiɛnɔkãmɔ

¹ Mi ji gbɔmɔ ni mina amanehulu yɛ Nyɔŋmɔ mlifu lɛ naa.

² Ekpala mi, ni ekɛ mi ba duŋ ni la ko kwraa bɛ mli lɛ mli.

³ Anɔkwa, be fɛɛ be nɛɛ lɛ, mi pɛ minɔ ewoɔ enine nɔ yɛ daa.

⁴ Ehã miheloo diɛŋtsɛ etã yɛ migbɔmɔtso he, ni ekumɔ miwui yɛ mimli

⁵ Ehã saji kɛ joomɔ kɛ nɔnaa ebɔle mi kpula kɛsa miyi.

⁶ Ehã mihi duŋ mli tamɔ mɛi ni egboi jeeŋmɔ lɛ.

⁷ Etswa gbogbo ekɛsa miyi bɔ ni minyɛŋ foi maje; ekɛ gboklɛi ni tsii ewo mi.

⁸ Tsɛbelɛ mibo mitsɛ Nyɔŋmɔ koni ebawa mi, shi ebooo mifaikpamɔ lɛ toi.

⁹ Ekɛ tɛi ni ako eshwie migbɛ nɔ; ehã migbɛ ekɔdɔ̃; tsɔ̃mɔhe bɛ.

¹⁰ Etamɔ oshishibrishi ni ewo ka, loo jata ni etee ehe.

¹¹ Ekpala mi kɛje migbɛ nɔ, ni etserɛ mimli dukuduku, ni efee mi pasaa.

¹² Eta egãi lɛ ema minɔ ni ebaatsɛ̃ mi.

¹³ Etsɛ̃rɛ egãi kotoku lɛ mli gãimlibii lɛ ewo mitsuiŋ.

¹⁴ Mitsɔ̃ hefɛoyeli nɔ mihã mɛi fɛɛ, kɛ amɛdaaŋ lala gbi muu fɛɛ.

¹⁵ Ehã miyi obɔ̃ kɛ joomɔ; ehã jeŋshihilɛ ejoo ewo mi tamɔ taatso.

¹⁶ Ehã mikpe ŋmlitsa; ehã mikoklo shi yɛ lamlu mli.

¹⁷ Mileee nɔ ni toiŋjɔlɛ ji lɛ, mihiɛ diɛŋtsɛ ekpa nɔ ni ji miishɛɛ nɔ.

¹⁸ No hewɔ lɛ, mikɛɛ akɛ, minunyam etã, ni mibɛ hiɛnɔkãmɔ ko dɔŋŋ yɛ Yehowa dɛŋ.

¹⁹ Kaimɔ minɔnaa kɛ mishitwiamɔ ni joɔ tamɔ taatso kɛ kɔlikɔ lɛ.

²⁰ Misusuma jwɛŋɔ he daa nɛɛ, ni ehã misusuma edɔ kɔmɔɔ kɛ ŋkɔmɔyeli yɛ mimli.

²¹ Shi miyɛ hiɛnɔkãmɔ kɛ̃ kɛ mikai akɛ.

²² Yehowa suɔmɔ ni tsakeee lɛ sɛɛ efooo kɔkɔɔkɔ, ni emɔbɔnalɛ bɛ naagbee.

²³ Daa leebi lɛ, amɛtsɔ̃ɔ nɔ hee; Yehowa anɔkwayeli da kpele.

²⁴ Misusuma kɛɔ akɛ, “Migbɛfaŋnɔ ji Yehowa ni no hewɔ lɛ, mihiɛ baakã enɔ.”

²⁵ Yehowa mli hi hã mɛi fɛɛ ni kwɛɔ lɛ gbɛ, kɛ mɔ ni taoɔ esɛɛgbɛ lɛ hu.

²⁶ Ehi akɛ atoɔ tsui shi kpoo amɛɔ Yehowa yiwalaheremɔ lɛ.

²⁷ Ehi hã gbɔmɔ akɛ etereɔ ekɔŋtso lɛ yɛ eblahiiaŋ.

²⁸ Kɛji awo kɔŋtso lɛ atere lɛ, ekome eta shi, ni efee dioo.

²⁹ Eba ehe shi kpoo, ejaakɛ hiɛnɔkãmɔ kɛ̃ aaahi shi.

³⁰ Agbala etoiiaŋ ma, ni abɔ lɛ ahora kpɔtɔɔ.

³¹ Shi Nuŋtsɔ lɛ shɛɛɛ mɔ efɔ̃ɔɔ kɛyaaa naanɔ;

³² ejaakɛ ehãa mɔ he jaraa lɛ moŋ, kɛ̃lɛ emusuŋ tsɔ̃ɔ lɛ yɛ suɔmɔ ni tsakeee lɛ hewɔ.

³³ Jeee esuɔmɔnaa ji akɛ ehã gbɔmɔ he ajara lɛ, asaŋ akɛ efee gbɔmɔ nidɔɔnii.

³⁴ Nuŋtsɔ lɛ le kɛji wɔsusumai etɔ bahao tamɔ gboklɛfoi ni yɔɔ kpabui amli.

³⁵ Ele kɛji aye mɔ ko toikɔdɔmɔ sane;

³⁶ Kɛji atsɔ̃ mɔ ko sane hiɛ abu shi lɛ. Nuŋtsɔ lɛ le.

³⁷ Namɔ efã ni eba mli pɛŋ akɛ ja Nuŋtsɔ lɛ eŋmɛ gbɛ dã?

³⁸ Ekpakpa kɛ efɔŋ fɛɛ lɛ, jeee Ŋwɛi Flooflonyo lɛ daaŋ ejeɔ?

³⁹ Mɛni hewɔ gbɔmɔ gbigbliɔ emli kɛji agbala etoi yɛ ehe eshai ahewɔ lɛ?

⁴⁰ Nyɛhãa wɔtaoa wɔjeŋba mli wɔkwɛa koni wɔkpale kɛba Yehowa ŋɔɔ.

⁴¹ Nyɛhãa wɔgbelea wɔtsuii amli ni wɔholea wɔniji anɔ wɔhãa Nuŋtsɔ ni yɔɔ ŋwɛi lɛ ni wɔkɛhã akɛ,

⁴² “Wɔtɔ̃, ni wɔtse atua, ni, Nyɔŋmɔ, okɛfako wɔ.

⁴³ “Okɛ mlifu ha ohe, ni onyiɛ wɔsɛɛ, ni ogbe wɔ ni mɔbɔnalɛ bɛ mli.

⁴⁴ Okɛ mlifu ha ohe, koni faikpamɔ ko akanyɛ egbu kɛtsɔ̃ mli kɛbashɛ oŋɔɔ.

⁴⁵ Ohã wɔtsɔ̃ kponɔ muji kɛ tumo yɛ majimaji lɛ ateŋ.

⁴⁶ “Wɔhenyɛlɔi fɛɛ miibɔ wɔ ahora; ni amɛmiijɛ wɔ.

⁴⁷ Wɔyoyoro, wɔtsɔ̃mɔ osharãi amli wɔtswia shi, ni wɔnibii ahiɛ ekpãtã kɛho.

⁴⁸ “Mihiŋmɛi miifɔse yaafonu tamɔ faa yɛ mimaŋbii ahiɛ ni ekpãtã lɛ ahewɔ.

⁴⁹ “Mihiŋmɛiŋ yaafonu baaho daa, ni efɔŋ

⁵⁰ kɛyashi beyinɔ ni Yehowa aaajɛ ŋwɛi ema ehiɛ shi ekwɛ wɔ.

⁵¹ Miyeɔ hejaramɔ kɛji mina sane ni eye mimaŋ oblayei lɛ.

⁵² “Mɛi ni nyɛɔ mi yakatswaa lɛ gbɔbi mi, tamɔ agbɔbiɔ loofɔlɔ.

⁵³ Amɛshɛ mi, hiɛkãalɔ, amɛfɔ̃ bu mli ni amɛkɛ tɛi shwie minɔ!

⁵⁴ Nu su miyi, ni mikɛɛ akɛ, ‘milaaje’.

⁵⁵ “Ao! Yehowa, mijɛ bu lɛ shishi tɔ̃ɔ mibo mitsɛ bo,

⁵⁶ ni onu mifaikpamɔ lɛ. ‘Kaakɛɛ akɛ obooo mibolɔmɔ kɛhã yelikɛbuamɔ lɛ toi.’

⁵⁷ Be ni mitsɛ bo lɛ, otsi obɛŋkɛ, ni okɛɛ akɛ, ‘Kaashe gbeyei!’

⁵⁸ “Ao! Yehowa, otsu misane lɛ he nii ohã mi; ohere miyiwala.

⁵⁹ Ao! Yehowa, ona sane fɔŋ ni akɛye mi lɛ, ye misane lɛ ohã mi.

⁶⁰ Ona owele ni amɛtɔ kɛ yiŋshai fɛɛ ni amɛto yɛ mihe lɛ.

⁶¹ “Ao! Yehowa, onu ahora ni amɛbɔɔ mi lɛ, kɛ yiŋshai fɛɛ ni amɛto yɛ mihe lɛ.

⁶² Gbi muu fɛɛ lɛ mihenyɛlɔi lɛ anaabu kɛ jwɛŋmɔ fɛɛ jwere minɔ.

⁶³ Naa, leebileebi jenamɔ fɛɛ lɛ mi ji amɛdaaŋ kotsa.

⁶⁴ “Ao! Yehowa, feemɔ amɛ otse, yɛ amɛnifeemɔ nii lɛ anaa.

⁶⁵ Kaahã amɛmii shɛ amɛhe; oloomɔ akã amɛnɔ.

⁶⁶ Ao! Yehowa, okɛ mlifu atiu amɛ, ni okpãtã amɛhiɛ kɛje shikpɔŋ lɛ nɔ.”