Yāfó 2 - ŊMALƐ KRƆŊKRƆŊ LƐ

Yehowa gbala Yerusalɛm toi

¹ Kwɛ bɔ ni Yehowa eŋɔ atatu eha Zion nɔ yɛ emlifu naa. Eshɛ Israel anunyam lɛ kɛjɛ ŋwɛi efɔ̃ shikpɔŋ lɛ nɔ. Emlifu gbi lɛ nɔ lɛ, ekaiii Sɔlemɔ we lɛ ni ji enajiaŋshi maaŋoo lɛ.

² Nuŋtsɔ lɛ ekpãtã Yuda shihilɛhei fɛɛ ahiɛ, ni enaaa mɔbɔ. Ekumɔ Yuda biyoo lɛ mɔji eshwie shi yɛ emlifu naa. Etsi emaŋtsɛyeli lɛ kɛ emli lumɛi etswia shi, ni ewo amɛ hiɛgbele.

³ Efite Israel hewalɛ fɛɛ yɛ mlifu ni naa wa lɛ naa. Wamɔ ni ekɛbawa Israel lɛ ehã eŋmɛɛ Israel, yɛ Israel henyɛlɔi ahiɛ. Ekpãtã nibii fɛɛ ahiɛ yɛ Israel tamɔ la ni miitso grigri.

⁴ Egbala egãi tamɔ henyɛlɔ feɔ; ekɛ eninejurɔ eta gãi lɛ tamɔ henyɛlɔi, ni egbe mɛi fɛɛ ni ji wɔshwãanii. Ejie emlifu kpo etsɔ̃ɔ yɛ Yerusalɛm shĩai lɛ amli tamɔ la.

⁵ Nuŋtsɔ lɛ etsɔ̃ tamɔ henyɛlɔ, ni ekpãtã Israel hiɛ. Efite emaŋtsɛ wei lɛ fɛɛ, ni ekpãtã emɔji ni wa lɛ ahiɛ; efee amɛ koikoi, ni ehã ŋkɔmɔyeli kɛ yaafo efa yɛ Yuda.

⁶ Ekumɔ ejamɔhe lɛ eshwie shi tamɔ trom mli asese. Ekpãtã he ni ayeɔ lɛ diɛŋtsɛ egbiijuji ni eto yɛ lɛ hiɛ. Yehowa efo gbii juji kɛ hejɔɔmɔ gbii asɛɛ yɛ Zion, ni ekwa maŋtsɛ kɛ osɔfo fɛɛ yɛ mlifu ni naa wa lɛ naa.

⁷ Nuŋtsɔ lɛ nyaŋe afɔleshãa latɛ lɛ; ni ekwa Ehe Krɔŋkrɔŋ lɛ, ni eŋɔ ehe mɔji fɛɛfɛji lɛ ehã henyɛlɔ lɛ. Abolɔ yɛ Yehowa we lɛ mli tamɔ abolɔɔ yɛ gbijurɔ nɔ.

⁸ Nyɔŋmɔ etswa efai shi akɛ ebaakpãtã Zion maŋ lɛ gbogbo lɛ hiɛ. Eŋmɔ kpãa ekɛsusu gbogbo lɛ, eŋmɛko efitemɔ he kwraa. Ehã kpoku kɛ gbogbo fɛɛ miiye ŋkɔmɔ; amɛjwere shi butuu.

⁹ Zion agboi lɛ enyɔ kɛbote su mli, akumɔ ni afite amɛsɛɛ adabaŋi lɛ. Emaŋtsɛ lɛ kɛ elumɛi lɛ eyaje jeŋmaji lɛ ateŋ. Mla lɛ bɛ dɔŋŋ lɛ, egbalɔi lɛ enaaa Yehowa dɛŋ ninaa ko dɔŋŋ.

¹⁰ Zion maŋ onukpai lɛ shwata shikpɔŋ, ni amɛfee diŋŋ. Amɛloo mlu amɛwo amɛyiteiaŋ, ni amɛbumɔ kpekpe. Yerusalɛm oblayei lɛ emamɔ amɛhiɛ shi.

¹¹ Mihiŋmɛiŋ nu etã kɛ yaafo, ni misusuma miifo emli. Mitsui ekumɔ kɛ ŋkɔmɔ, ejaakɛ akpãtã mimaŋbii ahiɛ; ejaakɛ gbekɛbii kɛ abifabii etɔ biti yɛ maŋ lɛ blohui amli.

¹² Amɛmiifo amɛmiitsɛ amɛnyɛmɛi akɛ, “Nɛgbɛ aboloo kɛ wain yɔɔ?” Be mli ni amɛtɔtɔɔ biti, tamɔ pilafoi yɛ maŋ lɛ blohui amli, ni amɛnyɔnyɔi yɛ amɛnyɛmɛi lɛ akpɔkɔiaŋ lɛ?

¹³ Ao! Yerusalɛm biyoo, mɛni makɛɛ yɛ ohe, ni mɛni he mikɛ bo baato? Ao! Zion biyoo, oblayoo foro, mɛni he mikɛ bo aaato bɔ ni afee ni manyɛ omii mashɛje? Ejaakɛ ohiɛkpãtãmɔ lɛ falɛ lɛɛ tamɔ ŋshɔ dalɛ, ni namɔ po aaanyɛ bo atsa?

¹⁴ Ninai ni ogbalɔi lɛ egba bo lɛ, apasa kɛ shishiumɔ sɔŋŋ ni; amɛkpako onifɔɔjianii lɛ ahe mama koni no ahã oje nomŋɔɔ mli; shi moŋ amale kɛ lakamɔ ninai sɔŋŋ amɛna.

¹⁵ Mɛi fɛɛ ni hoɔ tswaa amɛdɛŋ amɛshwieɔ onɔ; amɛboɔ Yerusalɛm biyoo lɛ “tsiaa”. Amɛbiɔ akɛ, “Maŋ lɛ ni akɛɔ akɛ ehe yɛ fɛo (fe fɛɛ) lɛ nɛ, jeŋ fɛɛ nyamnii lɛ nɛ?”

¹⁶ Ohenyɛlɔi fɛɛ ŋmɔɔ bo, ni amɛboɔ bo ‘tsiaa!’ Amɛkpeɔ amɛnyanyɔji ashishi, ni amɛbolɔɔ akɛ, “Wɔkpãtã ehiɛ pɛ! Yiɛ! Gbi lɛ ni wɔshwe aahu lɛ nɛ; eshɛ wɔdɛŋ, ni wɔna hu!”

¹⁷ Yehowa etsu eyiŋtoo lɛ he nii; nɔ ni ekɛɛ lɛ efee tamɔ bɔ ni eto jeeŋmɔ ko lɛ. Ekpãtã nibii ahiɛ ni mɔbɔnalɛ bɛ mli; ehã henyɛlɔ lɛ eye bo yɔɔ. Ni ehã ohenyɛlɔi lɛ ena onɔ hewalɛ.

¹⁸ Ao! Yerusalɛm biyoo blɔmɔ waa otsɛ Yehowa! Hã yaafonu aho yɛ ohiŋmɛiŋ tamɔ faa, shwane kɛ nyɔɔŋ fɛɛ. Kaajɔɔ ohe; kaafɔ̃ɔ yaafo!

¹⁹ Tee shi koni obo yaafo nyɔɔŋ be fɛɛ be ni bulɔi jeɔ buu shishi. Fɔsemɔ otsuiŋ fɛɛ oshwie Nuŋtsɔ lɛ hiɛ, tamɔ afɔseɔ nu ashwieɔ shikpɔŋ. Holemɔ oniji anɔ otsɔ̃ɔ lɛ yɛ obii bibii ni hɔmɔ ehã amɛtɔ biti yɛ blohu fɛɛ blohu koŋ lɛ awala hewɔ.

²⁰ Ao! Yehowa, kwɛmɔ koni oyoo mɔ ni ofee lɛ nɛkɛ nɛɛ lɛ. Aso ehi akɛ yeifɔyei aye amɛmusuŋbii ni ahiɛ amɛ yɛ fufɔ naa lɛ? Aso ehi akɛ agbe osɔfo kɛ gbalɔ fɛɛ yɛ Nuŋtsɔ lɛ He Krɔŋkrɔŋ lɛ mli lo?

²¹ Gbekɛbii kɛ onukpai fɛɛ jwere mlu mli yɛ blohuiaŋ; miblayei kɛ miblahii lɛ enyɔnyɔi yɛ klante naa. Oye awui yɛ omlifu gbi lɛ nɔ; ogbe amɛ ni mɔbɔnalɛ bɛ mli.

²² Okpee henyɛlɔi ni misheɔ lɛ tamɔ akpeɔ mɛi kɛyaa gbijurɔyeli okɛbabɔle mi kpula; ni omlifu gbi lɛ nɔ lɛ, mɔ ko ejeee mli, ni hiɛkãalɔ ko hu eshwɛɛɛ. Henyɛlɔ lɛ plene mɛi ni milɛ misumɔɔ lɛ.