Yāfó 1 - ŊMALƐ KRƆŊKRƆŊ LƐ

Yerusalɛm awerɛhoi lɛ

¹ Kwɛ bɔ ni maŋ ni kulɛ emli bii fa babaoo lɛ, ta shi ekometoo! Kwɛ bɔ ni etsɔ̃ tamɔ okulafo; lɛ maŋ ni kulɛ eje agbo yɛ majimaji ateŋ lɛ. Lɛ ni kulɛ lumɔ ji lɛ yɛ maji ateŋ lɛ, ŋmɛnɛ, etsɔ̃ mɔ ni atsuɔ lɛ onia.

² Fo sɔŋŋ efoɔ nyɔɔŋnyɔɔŋ fɛɛ; yaafonu jwere ehiɛ be fɛɛ be; shi enaaa mɔ ko mɔ ko yɛ esuɔlɔi lɛ ateŋ ni shɛjeɔ emii. Enanemɛi lɛ fɛɛ yeee lɛ anɔkwa; amɛtsɔ̃mɔ ehenyɛlɔi.

³ Yuda eshi eshikpɔŋ nɔ yɛ amanehulu kɛ nyɔŋyeli tuutu hewɔ; eyahi majimaji lɛ ateŋ; shi enaaa hejɔlɛ yɛ he ko he ko. Ehenyɛlɔi ni nyiɛ esɛɛ lɛ anine eshɛ enɔ yɛ nififiaŋ.

⁴ Gbɛjegbɛi ni yaa Zion lɛ miiye awerɛho, ejaakɛ mɔ ko mɔ ko baaa ebayeee gbii juji ni ato lɛ. Emaŋ agboi lɛ kãmɔ efolo esɔfoi lɛ miiye ŋkɔmɔ, eblayei lalɔi lɛ efee mɔbɔmɔbɔ, ni lɛ diɛŋtsɛ lɛ, eena nɔ naakpa.

⁵ Ehenyɛlɔi lɛ etsɔ̃ yitso agbɛnɛ, ni amɛmiishwere, ejaakɛ Yehowa ehã eena nɔ yɛ etɔ̃mɔi babaoo lɛ ahewɔ. Ebii etee; amɛnyiɛ henyɛlɔi ahiɛ kɛtee akɛ nomii.

⁶ Yerusalɛm anunyam fɛɛ etã. Elumɛi lɛ etsɔ̃mɔ tamɔ ofrotei ni naaa niyelihe ko; amɛjo foi yɛ henyɛlɔi ni nyiɛ amɛsɛɛ lɛ ahiɛ wrɔmiiwrɔmii kɛtee.

⁷ Yerusalɛm kaiɔ, yɛ emanehulu kɛ haomɔ gbii lɛ amli, ojarawa nibii ni eyɔɔ kɛjɛ blema beebe lɛ. Be ni emaŋbii gbee henyɛlɔi adɛŋ, ni bualɔ ko bualɔ ko bɛ lɛ, henyɛlɔi lɛ ye ehe fɛo ni amɛŋmɔ lɛ yɛ eshigbeemɔ lɛ hewɔ.

⁸ Yerusalɛm fee esha kpele ni no hewɔ lɛ, ehe wo muji. Mɛi fɛɛ ni kulɛ amɛwoɔ Yerusalɛm lɛ miibu lɛ shikpɔŋ agbɛnɛ, ejaakɛ amɛna eyayaiaŋ. Naa, lɛ diɛŋtsɛ lɛ eekɛ̃mɔ ni etsɔ̃ ehiɛ eto afã.

⁹ Ehe muji kpa etadei amli; shi ejwɛŋŋ bɔ ni enaagbee baatamɔ. Eshigbeemɔ lɛ yɛ gbeyei, mɔ ko mɔ ko bɛ ni shɛjeɔ emii! “Ao! Yehowa, kwɛ bɔ ni minaa amanehulu, ejaakɛ henyɛlɔi eye kunim.”

¹⁰ Ehenyɛlɔ ekpã enine mli ewo Yuda nibiiaŋ, ni eloo ejwetri ni jara wa fɛɛ kɛtee. Ena jeŋbii bote Sɔlemɔ we lɛ, mɛi ni ogu amɛ owebii ateŋ futumɔ tete po lɛ.

¹¹ Emaŋbii lɛ bluublu dɔmɔɔ ŋtsɔi be ni amɛtao niyenii; amɛkɛ amɛjwetri tsakeɔ niyenii, bɔ ni afee ni amɛkagboi; “Ao! Nuŋtsɔ, kwɛmɔ mi ni mihe guɔ egbo.

¹² “Nyɛ mɛi fɛɛ ni tsɔ̃ɔ biɛ kɛhoɔ, ani jeee nyɛhe sane ko ni lo? Nyɛkwɛa akɛ nyɛaana akɛ awerɛho ko yɛ ni etamɔ miwerɛho ni kã minɔ nɛɛ, awerɛho ni Yehowa ehã eba minɔ yɛ emlifu ni naa wa gbi lɛ nɔ lɛ.

¹³ “Ehã la jɛ ŋwɛi ebote miwui amli; ekɛ yaa lɛɛ shi etsɔ̃ mi tsɔne; ehã mikpale; eshi mi, ni mifee butuu, ni gbi muu fɛɛ lɛ mifee vii.

¹⁴ “Abua mitɔ̃mɔi lɛ anaa afee apã, ekɛ enine fi amɛ ke, ni ewo efɔ̃ mikuɛ; ehã mihewalɛ gbɔjɔ. Nuŋtsɔ lɛ jie mi ewo mɛi ni minyɛŋ amɛhiɛ madamɔ lɛ adɛŋ.

¹⁵ “Nuŋtsɔ tsɔ̃ɔ mi hii kãkãlɔi ni yɔɔ mimli lɛ akɛ amɛhewalɛ jeee fɛifɛi; ni etsɛ asafo ewo mihe koni amɛbakpãtã miblahii lɛ ahiɛ. Nuŋtsɔ enaanaa Yuda biyoo oblayoo lɛ nɔ tamɔ waintsɔne ŋaa wain.

¹⁶ “Enɛɛmɛi ahewɔ mifoɔ, ni yaafonu tsereɔ yɛ mihiŋmɛii amli shwieɔ shi lɛ; ejaakɛ miishɛjelɔ ni aaawo mi ekãa ekoŋŋ lɛ, ekɛ mi teŋ ejɛkɛ. Mibii lɛ efee pasaa ejaakɛ henyɛlɔ lɛ eye amɛnɔ.

¹⁷ “Migbɛ mifijiaŋ; shi mɔ ko kwraa bɛ ni shɛjeɔ mimii. Yehowa efã akɛ Yakob nanemɛi maji ni bɔle lɛ lɛ atsɔ̃mɔ ehenyɛlɔi. Yerusalɛm etsɔ̃ muji nii yɛ maji nɛɛ ateŋ.

¹⁸ “Yehowa sane ja, ejaakɛ miyeee ewiemɔ nɔ. Nyɛ majimaji fɛɛ, nyɛboa mi toi, ni nyɛkwɛa nɔnaa mli ni miyɔɔ. Miblahii kɛ miblayei lɛ, aŋɔ amɛ nom kɛtee.

¹⁹ “Mitsɛ misuɔlɔi lɛ shi amɛlaka mi. Misɔfoi lɛ kɛ maŋ onukpai lɛ ahiɛ kpãtã yɛ maŋ lɛ mli, be ni amɛtaoɔ niyenii amɛye koni amɛkagboi lɛ.

²⁰ “Ao! Yehowa, kwɛmɔ mi, ejaakɛ miyɛ hejaramɔ mli; misusuma miina nɔ, ni mitsui miitse yɛ mimli ejaakɛ mitse ohiɛ atua fe nine. Klante miikpãtã mɛi ahiɛ yɛ blohuŋ, ni shĩa teŋ hu, gbele miimɛ.

²¹ “Bo bɔ ni mikɛ̃mɔɔ toi ni mɔ ko kwraa bɛ ni shejeɔ mimii. Mihenyɛlɔi lɛ fɛɛ enu mimanehulu lɛ he, ni amɛmiinya akɛ bo odɛ̃ŋ ejɛ. Hã gbi ni owo ehe shi lɛ aba, koni amɛtsɔ̃ tamɔ mi.

²² “Kwɛmɔ nifɔɔjianii fɛɛ ni amɛfee lɛ koni okɛ amɛ aye tamɔ bɔ ni okɛ mi ye yɛ minifɔɔjianii lɛ ahewɔ lɛ. Mikɛ̃ɛmɔ lɛ naa wa, ni mitɔ biti.”