Tito 3 - ŊMALƐ KRƆŊKRƆŊ LƐ

Kristofoi ajeŋba

¹ Kaimɔ amɛ ni amɛba amɛhe shi amɛhã onukpai kɛ nɔyelɔi lɛ, amɛbo amɛ toi, amɛsaa amɛhe amɛhã nitsumɔ kpakpa fɛɛ nitsumɔ kpakpa.

² Amɛkawie mɔ ko he efɔŋ, amɛkabe, shi moŋ amɛfee kpoo, ni amɛhã mɛi fɛɛ ana amɛ akɛ amɛhe jɔ kwraa.

³ Ejaakɛ sa lɛ, wɔ hu wɔfee wɔhe kwashiai, toigbolɔi, gbɛdulɔi, mɛi ni sɔmɔɔ akɔnɔi kɛ miishɛɛ nibii srɔtoi pii. Ni wɔba wɔjeŋ yɛ nifɔɔjianifeemɔ kɛ hetsɛ̃ mli, wɔhe yɛ taŋ, ni wɔnyɛnyɛɔ wɔhe.

⁴ Shi be ni Nyɔŋmɔ ni ji wɔyiwalaherelɔ lɛ mlihilɛ kɛ egbɔmɛiahedɔɔ lɛ pue lɛ,

⁵ jeee jalɛ nitsumɔi ni wɔ diɛŋtsɛ wɔtsu naa, shi moŋ lɛ diɛŋtsɛ emɔbɔnalɛ naa etsɔ̃ eheefɔmɔ hejuu kɛ Mumɔ Krɔŋkrɔŋ eheefeemɔ lɛ nɔ ehere wɔyiwala.

⁶ Mumɔ Krɔŋkrɔŋ nɛɛ etsɔ̃ Yesu Kristo, wɔyiwalaherelɔ lɛ nɔ, efɔse eshwie wɔnɔ babaoo,

⁷ koni ahã wɔtsɔ̃mɔ niyelɔi yɛ naanɔ wala lɛ gbɛfaŋ yɛ hiɛnɔkãmɔ naa, akɛni abu wɔ bem yɛ lɛ nɔŋŋ edromɔ naa lɛ.

⁸ Anɔkwa wiemɔ nɛ. Ni nɛkɛ nii nɛɛ anɔ mi mitaoɔ akɛ oma, koni mɛi ni ehe Nyɔŋmɔ nɔ amɛye lɛ akwɛ ni amɛbɔ nitsumɔi kpakpai ahe mɔdɛŋ. Enɛɛmɛi ji nii ni yɔɔ fɛo ni he yɔɔ sɛɛnamɔ hã gbɔmɛi.

⁹ Shi kwashiai aŋwanejei kɛ wekukpãa tsɔ̃ɔmɔ kɛ naataamɔ kɛ Mla he bei lɛ, tsi ohe kɛjɛ he, ejaakɛ ehe bɛ sɛɛnamɔ ni ejeee fɛi hu.

¹⁰ Gbɔmɔ ko ni kɛ mligbalamɔ baa lɛ, kɛ obɔ lɛ kɔkɔ shi kome kɛ shii enyɔ lɛ, kwa lɛ.

¹¹ Ejaakɛ ole akɛ mɔ ko ni yɔɔ nakai lɛ, eje eŋɛlɛnɔ ni efeɔ esha ni ekɛaabu lɛ diɛŋtsɛ ehe fɔ.

Naagbee nibii komɛi ni Paulo taoɔ

¹² Kɛ mitsu Artema loo Tihiko kɛba oŋɔɔ lɛ, bɔɔ mɔdɛŋ ni oba miŋɔɔ yɛ Nikopoli, ejaakɛ jɛi mikpɛ mli akɛ mibaye fɛ̃ibe lɛ yɛ.

¹³ Bɔɔ mɔdɛŋ owo Zena, mlalelɔ lɛ, kɛ Apolo gbɛ jogbaŋŋ ni nɔ ko nɔ ko he akahĩa amɛ.

¹⁴ Shi hã ni wɔ diɛŋtsɛ wɔmɛi lɛ hu akase nitsumɔi kpakpai ahe mɔdɛŋbɔɔ yɛ fimɔ kɛ hiamɔ hewɔ, koni amɛkafee mɛi ni wooo yibii.

¹⁵ Mɛi ni kɛ mi yɔɔ lɛ fɛɛ miibi bo. Wɔmiibi mɛi ni sumɔɔ wɔ yɛ hemɔkɛyeli mli lɛ. Dromɔ lɛ kɛ nyɛ fɛɛ ahi shi! Amen.