Tito 1 - ŊMALƐ KRƆŊKRƆŊ LƐ

Ŋamɔ

¹ Paulo, ni ji Nyɔŋmɔ tsulɔ kɛ Yesu Kristo bɔfo lɛ, ŋma wolo nɛɛ. Nyɔŋmɔ hala mi ni etsu mi koni mayawo Nyɔŋmɔ halamɔbii lɛ ahemɔkɛyeli kɛ Nyɔŋmɔjamɔ anɔkwale lɛ he nilee lɛ mli hewalɛ,

² ni amɛna naanɔ wala lɛ hiɛnɔkãmɔ. Naanɔ wala nɛɛ Nyɔŋmɔ wo he shi dani abɔ je lɛ.

³ Shi yɛ lɛ diɛŋtsɛ ebe ni sa lɛ mli lɛ ejie ewiemɔ lɛ shi etsɔ̃ɔ yɛ shiɛmɔ sane ni atuu awo midɛŋ yɛ Nyɔŋmɔ ni ji wɔyiwalaherelɔ lɛ fãmɔ naa lɛ mli.

⁴ Miŋma wolo nɛɛ miyahã Tito ni ji mibi krɔŋŋ yɛ hemɔkɛyeli koome ni wɔyɔɔ lɛ naa. Dromɔ kɛ mɔbɔnalɛ kɛ hejɔlɛ ni jɛ Tsɛ Nyɔŋmɔ lɛ kɛ Nuŋtsɔ Yesu Kristo, wɔyiwalaherelɔ lɛ, dɛŋ ahã bo.

Tito nitsumɔ yɛ Kreta

⁵ Enɛ hewɔ mishi bo yɛ Kreta, koni oto nii ni eshwɛ lɛ gbɛjianɔ pɛpɛɛpɛ, ni owowoo onukpai yɛ maŋ fɛɛ maŋ mli, tamɔ bɔ ni mikɛɛ bo momo lɛ.

⁶ Onukpa afee mɔ ko ni kpa ko bɛ ehe, mɔ ko ni yɔɔ ŋa kome ni eyɔɔ bii ni heɔ Kristo nɔ yeɔ ni awieee amɛhe akɛ nyɛnyɛŋtswibɔlɔi loo toigbolɔi ji amɛ.

⁷ Ejaakɛ nɔkwɛlɔ lɛ, esaaa akɛ kpa ko hiɔ ehe, akɛni Nyɔŋmɔ we nɔ tsulɔnukpa ji lɛ lɛ. Ekafee ehe mɔ ni feɔ lɛ diɛŋtsɛ etsuinaanii, jeee mlifutsɛ, jeee dãanulɔ, jeee ninekpokpookpotsɛ, jeee hiɛjoolɔ.

⁸ Shi moŋ efee ehe gbɔfeelɔ, mɔ ni sumɔɔ ekpakpa, nilelɔ, jalɔ, mɔ ni he tse, mɔ ni yeɔ ehe nɔ.

⁹ Mɔ ni hiɛɔ anɔkwa wiemɔ lɛ yɛ tsɔ̃ɔmɔ lɛ naa lɛ mli, koni enyɛ ekɛ nitsɔɔmɔ kpakpa lɛ awo mɛi ahewalɛ, ni ehã mɛi ni wieɔ shiɔ wiemɔ lɛ ana amɛtɔ̃mɔ.

¹⁰ Ejaakɛ mɛi pii yɛ ni ji toigbolɔi, mɛi ni wieɔ nii ni he bɛ sɛɛnamɔ, kɛ shishiulɔi, titri lɛ mɛi ni jɛ ketiafolɔi lɛ ateŋ lɛ.

¹¹ Amɛ ji gbɔmɛi ni sa akɛ awo amɛnaa manyoflɛ. Amɛ, amɛbutuɔ shĩai muji fɛɛ, ni sɛɛnamɔ ni yɔɔ hiɛgbele hewɔ lɛ amɛtsɔ̃ɔ nii ni ejaaa.

¹² Amɛteŋ mɔ ko ni ji amɛ diɛŋtsɛ amɛgbalɔ lɛ kɛɛ akɛ, “Kretabii maleɔ daa; kooloi fɔ̃ji ni; ŋmaayelɔi hejɔ̃lɔi ni.”

¹³ Nɛkɛ odase nɛɛ anɔkwale ni. No hewɔ lɛ, kã amɛhiɛ veveeve, koni amɛhemɔkɛyeli afee hemɔkɛyeli kpakpa,

¹⁴ ni amɛkabo Yudafoi adesai lɛ kɛ gbɔmɛi ni kpaleɔ kɛjɛɔ anɔkwale lɛ mli lɛ akitãi lɛ atoi.

¹⁵ Mɛi ni he tse lɛ, nii fɛɛ he tse hã amɛ; shi mɛi ni he tseee ni amɛheee Nyɔŋmɔ amɛyeee lɛ, nɔ ko nɔ ko bɛ ni he tse hã amɛ, shi moŋ amɛjwɛŋmɔ mli kɛ amɛhenilee fɛɛ ewo muji.

¹⁶ Amɛjajeɔ akɛ amɛle Nyɔŋmɔ, shi amɛkɛ amɛnitsumɔi kwaa lɛ, ni amɛ ji gbɔmɛi ni ahiɔ, kɛ toigbolɔi, mɛi ni ehiii hãaa nitsumɔ kpakpa ko kwraa.