Rut Wolo Lɛ 4 - ŊMALƐ KRƆŊKRƆŊ LƐ

Boaz ŋɔ Rut

¹ Boaz tee maŋ agbo lɛ naa ni ji amɛkoishi lɛ. Kɛkɛ lɛ naa niyelɔ lɛ ni Boaz tsi etã lɛ miiho. Kɛkɛ ni Boaz tsɛ lɛ, ni ekɛɛ, “Anyɛmi nuu, ofainɛ, baata shi fioo.” Ni eba ebata shi.

² Kɛkɛ ni Boaz tsɛ maŋ onukpai lɛ ateŋ mɛi nyɔŋma kɛba, ni ekɛɛ amɛ akɛ, “Nyɛfai nɛ, nyɛbataraa shi fioo.” Amɛbatara shi.

³ Ni Boaz kɛɛ niyelɔ lɛ akɛ, “Shikpɔŋ kuku ni ji wɔnyɛmi Elimelek shikpɔŋ lɛ, Naomi ni jɛ Moab shikpɔŋ lɛ nɔ ba lɛ miihɔ̃ɔ.

⁴ Hewɔ lɛ mikɛɛ mawo otoi nɔ koni ohe yɛ mɛi ni tara biɛ nɛɛ kɛ mimaŋ onukpai lɛ ahiɛ. Kɛ ooosumɔ ni oye mɔ ni egbo lɛ nii lɛ wiemɔ, ni kɛji osumɔɔɔ hu hã male; ejaakɛ mɔ ko bɛ ni eyeɔ nii lɛ fe bo; ni osɛɛ dani mi.” Niyelɔ lɛ jie naa ekɛɛ, “Ojogbaŋŋ, masumɔ maye.”

⁵ Boaz kɛɛ lɛ akɛ, “Gbi nɔ ni oooŋɔ shikpɔŋ lɛ yɛ Naomi dɛŋ lɛ, belɛ ooŋɔ Rut, Moabyoo lɛ, ni ji mɔ ni egbo lɛ ŋa lɛ hu oofata he nakai gbi lɛ nɔŋŋ, koni mɔ ni egbo lɛ gbɛi akagbo yɛ egboshinii lɛ he.”

⁶ Kɛkɛ ni niyelɔ lɛ hã hetoo akɛ, “Minyɛŋ maye nii lɛ, ejaakɛ kɛji miye lɛ tɔ̃tɔ̃mɔ baaba, mi diɛŋtsɛ migboshiniiyeli mli. Ŋɔɔ migbɛnaanii lɛ ohã ohe.”

⁷ Blema lɛ kɛji abaaye mɔ ko nii aloo aahɔ̃ɔ nɔ ko yɛ Israel lɛ, nɔ ni akɛmaa nɔ aduatsɔ nɛ: Mɔ ni ŋmɛɔ nii ahe lɛ aloo ehɔ̃ɔ nii lɛ jieɔ etokota ehãa mɔ ni ŋɔɔ nii lɛ. Enɛ akɛyeɔ nii ni ahɔ̃ɔ aloo ahe lɛ he odase yɛ Israel.

⁸ No hewɔ lɛ, be ni niyelɔ lɛ kɛɛ Boaz akɛ eye nii lɛ, niyelɔ lɛ jie etokota ekɛhã Boaz.

⁹ Kɛkɛ ni Boaz kɛɛ onukpai lɛ kɛ maŋ lɛ fɛɛ akɛ, “nyɛ ji midasefoi ŋmɛnɛ akɛ miŋɔ nɔ fɛɛ nɔ ni ji Elimelek nɔ, kɛ nɔ fɛɛ nɔ ni ji Kilion kɛ Malon nɔ lɛ yɛ Naomi dɛŋ.

¹⁰ Asaŋ Rut, Moabyoo, ni ji Malon ŋa lɛ hu miiŋɔ lɛ, ni etsɔ̃ miŋa, koni mɔ ni egbo lɛ gbɛi akagbo yɛ egboshinii he, ni egbɛi akalaaje yɛ enyɛmimɛi ateŋ kɛ emaŋ koishi hu, nyɛ ji odasefoi ŋmɛnɛ.”

¹¹ Ni maŋbii ni yɔɔ maŋ koi lɛ shi lɛ kɛ onukpai lɛ fɛɛ here nɔ akɛ, “Wɔji odasefoi! Yehowa ahã yoo lɛ ni baa owe lɛ atamɔ Rahel kɛ Lea ni amɛyi enyɔ lɛ pɛ mli Israel we lɛ jɛ lɛ. Otsɔ̃ gbɔmɔ agbo yɛ Efrata, ni ogbɛi ahehe yɛ Betlehem.

¹² Ni shwiei ni Yehowa aaahã oblayoo nɛɛ awo ahã bo lɛ, ahã owe lɛ atsɔ̃ tamɔ Tamar kɛ Yuda bi Perez we.”

Boaz shwiei

¹³ Boaz ŋɔ Rut ni etsɔ̃ eŋa; ni Boaz ta Rut he, ni Yehowa hã ena musu ni efɔ binuu.

¹⁴ Ni maŋ lɛŋ yei lɛ kɛɛ Naomi akɛ, “Yijiemɔ ahã Yehowa! Ejaakɛ ehã bo gboshiniiyelɔ kɛ nabi ŋmɛnɛ. Ehã gbɛkɛ lɛ gbɛi ahehe yɛ Israel.

¹⁵ Gbekɛ nɛɛ, eeehã owala sɛɛ atsɛ, ni eeekwɛ bo yɛ ogbɔlɛ mli; ejaakɛ oshaayoo ni sumɔɔ bo, ni ehi hã bo fe bihii kpawo tete lɛ, ni fɔ lɛ.”

¹⁶ Ni Naomi he abifao lɛ, ni ekɛ lɛ ŋmɛ ekpɔkɔiaŋ, ni etsɔ̃ abifao lɛ kwɛlɔ.

¹⁷ Ni Naomi kuuŋyei lɛ nya amɛkɛɛ, “Afɔ binuu ahã Naomi eei!” Ni amɛwo abifao lɛ gbɛi akɛ Obed. Obed nɛɛ lɛ efɔ Ishai, ni Ishai hu fɔ Maŋtsɛ David.

¹⁸ Agbɛnɛ Perez shwiei nɛ: Perez fɔ Hezron.

¹⁹ Hezron fɔ Ram; Ram fɔ Aminadab.

²⁰ Aminadab fɔ Nahashon; Nahashon fɔ Salmon, ni

²¹ Salmon fɔ Boaz; Boaz fɔ Obed.

²² Obed fɔ Ishai, ni Ishai fɔ Maŋtsɛ David.