Rut Wolo Lɛ 1 - ŊMALƐ KRƆŊKRƆŊ LƐ

Elimelek kɛ eŋa kɛ bii tee Moab shikpɔŋ lɛ nɔ

¹ Be ko, be ni Israelbii nako ana maŋtsɛmɛi lɛ, hɔmɔ ko ba Israel shikpɔŋ lɛ nɔ. Hɔmɔ nɛɛ hewɔ lɛ nuu ko fã kɛjɛ Betlehem yɛ Yuda, ni eyiŋ etee eyato gbɔ yɛ Moab shikpɔŋ lɛ nɔ, lɛ kɛ eŋa kɛ ebihii enyɔ.

² Nuu lɛ gbɛi ji Elimelek, eŋa lɛ gbɛi ji Naomi, ni ebihii lɛ hu agbɛii ji Malon kɛ Kilion. Amɛjɛ Efrata akutso lɛŋ.

³ Naomi wu, Elimelek, gbo ni ebashwɛ Naomi kɛ ebihii enyɔ lɛ yɛ jɛi.

⁴ Bihii nɛɛ ŋɔ Moabyei. Yei nɛɛ ateŋ mɔ kome gbɛi ji Orpa, ni mɔ kome hu gbɛi ji Rut. Amɛhi jɛi aaafee afii nyɔŋma.

⁵ Fee sɛɛ lɛ Malon kɛ Kilion hu gboi, ni ebashwɛ yoo okulafo lɛ kɛkɛ; ebɛ wu lɛ, ebɛ bii hu.

Naomi ku esɛɛ kɛtee Betlehem

^6-7 Naomi nu yɛ Moab shikpɔŋ lɛ nɔ akɛ Yehowa ebaduro emaŋ Israel niyenii. No hewɔ lɛ, ekɛ eshaayei lɛ yiŋ kɛmiiku esɛɛ kɛjɛ Moab shikpɔŋ lɛ nɔ kɛya Yuda.

⁸ Be ni amɛyaa lɛ, Naomi kɛɛ eshaayei enyɔ lɛ akɛ, “Nyɛkua nyɛsɛɛ nyɛyaa; nyɛteŋ mɔ fɛɛ mɔ aya enyɛ we. Yehowa afee nyɛ ejurɔ tamɔ bɔ ni nyɛfee mi kɛ gbohii lɛ ejurɔ lɛ.

⁹ Ehã nyɛteŋ mɔ fɛɛ mɔ ana he ko eta yɛ ewu we.” Ni eshwɔshwɔɔ amɛnaa, ni ekɛ amɛye shɛɛ. Kɛkɛ ni amɛjwa yaafo.

¹⁰ Ni amɛkɛɛ Naomi akɛ, “Dabi, shi wɔkɛ bo aaatee omaŋbii lɛ aŋɔɔ moŋ.”

¹¹ Shi Naomi kɛɛ, “Nyɛkua nyɛsɛɛ, mibii! Mɛɛba nyɛkɛ mi aaatee? Ani bihii yɛ mimusuŋ lolo ni amɛbaatsɔ̃mɔ nyɛwumɛi?

¹² Mibii, nyɛkua nyɛsɛɛ nyɛyaa, ejaakɛ migbɔ tsɔ̃ bɔ ni mikɛ nuu aaayahi shi. Ni kɛji mikɛɛ miyɛ hiɛnɔkãmɔ tete, ni maya nuu ko ŋɔɔ nyɔɔŋ nɛɛŋ koni mafɔ bihii tete lɛ,

¹³ aso no hewɔ ni nyɛaamɛ kɛyashi beyinɔ ni amɛaadara? Aloo no hewɔ ni nyɛaatsi nyɛhe naa, ni nyɛkɛ nuu ehiŋ shi? Dabi, mibii! Shi nyɛsane miidɔ mi naakpa; ejaakɛ Yehowa kɛ mi eye kɛ joomɔ.”

¹⁴ Kɛkɛ ni amɛ fɛɛ amɛjwa yaafo ekoŋŋ. Ni Orpa shwɔ eshaayoo lɛ naa, ni eku esɛɛ; shi Rut lɛ, lɛ lɛ ekpɛtɛ Naomi lolo.

¹⁵ Ni Naomi kɛɛ Rut akɛ, “Naa, obienyɛ lɛ eku esɛɛ etee emaŋ kɛ esɛɛ nyɔŋmɔ lɛ ŋɔɔ. Kuu osɛɛ ni otiu lɛ.”

¹⁶ Shi Rut to he akɛ, “Kaahiɛ mi doo akɛ mishi bo, ni miku misɛɛ ni mifɔ̃ɔ osɛɛnyiɛmɔ! Shi he fɛɛ he ni oyaa lɛ matee, ni he ni oooyahi lɛ jɛi mahi. Omaŋ aaatsɔ̃ mimaŋ, ni oNyɔŋmɔ aaatsɔ mi hu miNyɔŋmɔ.

¹⁷ He ni ooogbo yɛ lɛ jɛi magbo yɛ, ni he ni aaafũ bo yɛ lɛ jɛi nɔŋŋ aaafu mi yɛ. Yehowa kɛ mi aye ni ekɛ mi aye ekoŋŋ, kɛjeee gbele kɛkɛ aaagbala mi kɛ bo teŋ fĩi.”

¹⁸ Agbɛnɛ be ni Naomi na akɛ Rut eŋmɔ eyiŋ kpɔ akɛ ekɛ lɛ aaatee lɛ, efɔ̃ɔ Rut kɛ nɔ ni ekɛ lɛ wieɔ lɛ he wiemɔ.

¹⁹ No hewɔ lɛ, amɛyi enyɔ lɛ amɛkɛshwie nɔ ekoŋŋ, kɛyashi amɛshɛ Betlehem. Be ni amɛshɛ jɛi lɛ, maŋ lɛ fɛɛ bu, ni yei lɛ kɛɛkɛɛ akɛ, “Naomi kɛ̃ nɛ?”

²⁰ Shi ehere amɛ nɔ ekɛɛ, “Nyɛkatsɛa mi Naomi dɔŋŋ, shi moŋ nyɛtsɛa mi Mara, ejaakɛ Ofe lɛ kɛ mi eye kɛ joomɔ tsɔ̃.

²¹ Mitee obɔ̃, shi Yehowa kɛ mi eku sɛɛ kɛba efolo. Mɛɛ hewɔ ni nyɛtsɛɔ mi Naomi, mi ni Yehowa kɛ mi eye kɛ joomɔ, ni Ofe lɛ eshwishwia mi shi lɛ?”

²² Bɔ ni Naomi ku esɛɛ kɛjɛ Moab shikpɔŋ lɛ nɔ kɛba nɛ, lɛ kɛ eshaayoo Rut, Moabyoo lɛ. Ni be ni amɛba Betlehem lɛ abɔi akoko foo.