Romabii 9 - ŊMALƐ KRƆŊKRƆŊ LƐ

Nyɔŋmɔ kɛ emaŋ ni ehala lɛ

¹ Miiwie anɔkwale yɛ Kristo mli, mimaleee, ni mihenilee hu miiye mi odase yɛ Mumɔ Krɔŋkrɔŋ lɛ mli,

² akɛ miiye ŋkɔmɔ babaoo, ni mitsui yeɔ daa.

³ Ejaakɛ mina ni kulɛ ajie mi yɛ Kristo he akɛ musumɔ yɛ minyɛmimɛi ni ji miwekumɛi yɛ heloo gbɛfaŋ lɛ ahewɔ.

⁴ Amɛ ji Israelbii lɛ; ni amɛnɔ ji bitsɔ̃mɔ lɛ kɛ anunyam lɛ kɛ kpãŋmɔi lɛ kɛ mlahãmɔ lɛ kɛ jamɔ lɛ kɛ shiwoi lɛ,

⁵ amɛnɔ ji tsɛmɛi lɛ, ni amɛmli hu Kristo tete jɛ yɛ heloo gbɛfaŋ lɛ, lɛ ji nii fiaa nɔ Nyɔŋmɔ ni ajɔɔ lɛ kɛyashiɔ naanɔ lɛ. Amen!

⁶ Shi jeee akɛ Nyɔŋmɔ wiemɔ lɛ efee yaka. Ejaakɛ jeee mɛi ni jɛ Israel mli lɛ fɛɛ ji “Israel musuŋ bii”,

⁷ ni asaŋ jeee akɛ ni Abraham shwiei ji amɛ hewɔ lɛ, bii ji amɛ fɛɛ, shi moŋ, “Mɛi ni jɛ Isak mli lɛ aaatsɛ amɛ oshwiei.”

⁸ No ji akɛ, jeee heloo naa bii lɛ ji Nyɔŋmɔ bii, shi shiwoo naa bii lɛ moŋ abuɔ akɛ oshwiei.

⁹ Ejaakɛ shiwoo wiemɔ lɛ nɛ, “Wɔsɛɛ agbɔ be nɛ lɛ maba, ni Sara aaana binuu.”

¹⁰ Shi jeee enɛ kɛkɛ, shi moŋ wɔtsɛ Isak kome lɛ nɔŋŋ Rebeka kɛna musu,

¹¹ shi be ni anako afɔ bii lɛ, ni amɛsaa amɛfeko nɔ kpakpa ko loo nɔ fɔŋ ko lɛ, bɔ ni afee ni Nyɔŋmɔ yiŋtoo ni akɛhalaa mɔ lɛ amã shi, ni ekajɛ nitsumɔi amli, shi moŋ ejɛ mɔ ni tsɛɔ mɔ lɛ,

¹² akɛɛ Rebeka akɛ, “Onukpa lɛ baasɔ̃mɔ gbekɛ lɛ.”

¹³ Tamɔ bɔ ni aŋma akɛ, “Yakob lɛ, misumɔ lɛ, shi Esau lɛ minyɛ lɛ lɛ.”

¹⁴ Belɛ te wɔɔkɛɛ tɛŋŋ? Ani Nyɔŋmɔ yeɔ sane ko ni ejaaa? Dabida!

¹⁵ Ejaakɛ ekɛɛ Mose akɛ, “Mɔ ni minaa lɛ mɔbɔ lɛ, lɛ nɔŋŋ mɔbɔ mibana, ni mɔ ni mimusuŋ tsɔ̃ɔ mi hãa lɛ lɛ, lɛ nɔŋŋ mimusuŋ aaatsɔ̃ mi ahã.”

¹⁶ No hewɔ lɛ, agbɛnɛ jeee mɔ ko suɔmɔ loo emɔdɛŋbɔɔ naa ni, shi moŋ Nyɔŋmɔ mɔbɔnalɛ naa ni.

¹⁷ Ejaakɛ ŋmalɛ lɛ kɛɛ Farao akɛ, “Enɛ nɔŋŋ hewɔ mitee bo shi, koni majie mihewalɛ kpo kɛtsɔ̃ onɔ, koni atsi migbɛi tã yɛ shikpɔŋ lɛ fɛɛ nɔ.”

¹⁸ Belɛ no hewɔ lɛ, mɔ ni esumɔɔ akɛ ena lɛ mɔbɔ lɛ, enaa lɛ mɔbɔ, ni kɛ eesumɔ akɛ ewaje mɔ ko tsui lɛ, ewajeɔ.

Nyɔŋmɔ mlifu kɛ emɔbɔnalɛ

¹⁹ Shi agbɛnɛ ooobi mi akɛ, “Belɛ mɛɛba Nyɔŋmɔ shwaa mɔ̃ mɔ? Ejaakɛ namɔ aaanyɛ eyiŋtoo naa aku?”

²⁰ Shi, bo gbɔmɔ, namɔ ji bo, ni okɛ Nyɔŋmɔ kaneɔ? Ani nɔ ni ashɔ̃ lɛ aaabi mɔ ni shɔ̃ lɛ lɛ akɛ, “Mɛɛba oshɔ̃ mi nɛkɛ?”

²¹ Aloo gbɛshɔ̃lɔ bɛ hegbɛ yɛ su lɛ nɔ, akɛ ekɛ su ni akpɔtɔ kome lɛ nɔŋŋ eko aaashɔ̃ nɔ ko ni yɔɔ nyam ni ekɛ eko hu aaashɔ̃ nɔ ko ni bɛ nyam?

²² Shi kɛ Nyɔŋmɔ miisumɔ akɛ ejie emlifu kpo etsɔ̃ɔ ni ehã ale ehe ni wa lɛ, ni kɛ̃lɛ eŋmɛɔ etsui shi babaoo ehiɛɔ mlifu nii ni sa fitemɔ lɛ,

²³ bɔ ni afee ni ehã ale enunyam falɛ lɛ hu yɛ emɔbɔnalɛ nii ni esaa eto ehã anunyam lɛ anɔ lɛ, mɛni obaakɛɛ?

²⁴ Shi nakai etsɛ wɔ hu, jeee mɛi ni jɛ Yudafoi ateŋ lɛ kɛkɛ, shi mɛi ni jɛ jeŋmaji ateŋ lɛ hu.

²⁵ Tamɔ bɔ ni ekɛɛ yɛ Hoshea wolo lɛ mli akɛ, “Matsɛ mɛi ni jeee mimaŋ lɛ akɛ mimaŋ, kɛ mɔ ni asumɔɔɔ lɛ lɛ akɛ mɔ ni asumɔɔ lɛ.”

²⁶ “Ni aaaba mli akɛ, he ni akɛɛ amɛ yɛ akɛ, ‘Jeee mimaŋ ji nyɛ’ lɛ, jɛi nɔŋŋ aaatsɛ amɛNyɔŋmɔ hiɛkãalɔ lɛ bii yɛ.”

²⁷ Shi Yesaia bo yɛ Israel he akɛ, “Kɛ Israelbii lɛ ayibɔ tamɔ ŋshɔnaa shia lɛ, mɛi fioo ni baashwɛ lɛ yiwala aaahere.

²⁸ Ejaakɛ Nyɔŋmɔ aaatsu ewiemɔ lɛ he nii kuku egbe naa pɛpɛɛpɛ yɛ shikpɔŋ lɛ nɔ.”

²⁹ Ni tamɔ bɔ ni Yesaia ekɛɛ eto momo lɛ akɛ, “Eji Tai aNuŋtsɔ lɛ eshwɛɛɛ shwiei ko ehãaa wɔ kulɛ, wɔtsɔ̃mɔ tamɔ Sodom, ni wɔfee tamɔ Gomora pɛ.”

Israel nine shɛɛɛ jalɛ nɔ

³⁰ Belɛ te wɔɔkɛɛ tɛŋŋ? Akɛ jeŋmajiaŋbii ni ediii jalɛ sɛɛ lɛ ena jalɛ ni ji jalɛ ni jɛ hemɔkɛyeli mli lɛ;

³¹ shi Israel moŋ ni diɔ jalɛ ni jɛ Mla mli lɛ sɛɛ lɛ, enine shɛɛɛ nɔ.

³² Mɛɛ hewɔ ni? Ejaakɛ amɛtsɔ̃ɔɔ hemɔkɛyeli nɔ amɛtaooo, shi moŋ tamɔ mɛi ni tsɔ̃ɔ nitsumɔi anɔ taoɔ. Ejaakɛ amɛtɛrɛ tɛmɔ tɛ lɛ;

³³ tamɔ bɔ ni aŋma lɛ akɛ, “Naa, mikɛ tɛmɔ tɛ kɛ nanetɔ̃tɔ̃mɔ tɛsaa ko miima shi yɛ Zion, Ni mɔ fɛɛ mɔ ni heɔ enɔ eyeɔ lɛ, ehiɛ gboŋ.”