Romabii 7 - ŊMALƐ KRƆŊKRƆŊ LƐ

Kristofonyo eye ehe yɛ Mla lɛ dɛŋ

¹ Aloo nyɛleee, anyɛmimɛi, mɛi ni le Mla mikɛwieɔ nɛɛ, akɛ Mla lɛ yeɔ gbɔmɔ nɔ be mli ni eyɔɔ wala mli lɛ kɛkɛ?

² Tamɔ bɔ ni eyɔɔ yɛ yoo ni yɔɔ wu gbɛfaŋ lɛ, gbii abɔ fɛɛ ni ewu lɛ hiɛ kã lɛ, mla efi lɛ ekpɛtɛ ewu lɛ; shi kɛji ewu lɛ gbo lɛ, ekɛ ewu mla lɛ bɛ sane ko dɔŋŋ.

³ No hewɔ lɛ, agbɛnɛ kɛji ewu lɛ yɛ jeŋ lolo ni eyagbã mɔ kroko lɛ, atsɛɔ lɛ gbãlãfitelɔ; shi kɛji ewu lɛ gbo lɛ, eye ehe kɛjɛ mla lɛ dɛŋ, ni kɛ eyagbã nuu kroko lɛ, ejeee gbãlãfitelɔ dɔŋŋ.

⁴ Minyɛmimɛi, nakai nɔŋŋ nyɛ hu atsɔ̃ Kristo gbɔmɔtso lɛ nɔ ahã nyɛgboi yɛ Mla lɛ gbɛfaŋ, ni nyɛtsɔ̃mɔ mɔ kroko ni ji mɔ ni atee lɛ shi kɛjɛ gbohii ateŋ lɛ nii, koni wɔwo yibii wɔhã Nyɔŋmɔ.

⁵ Ejaakɛ be ni wɔhi shi yɛ wɔgbɔmɔfɔmɔ su lɛ naa lɛ, eshai ahe akɔnɔi lɛ tsɔ̃ɔ Mla lɛ nɔ tsuɔ nii yɛ wɔhenii lɛ amli ni wɔkɛwo yibii wɔhã gbele.

⁶ Shi agbɛnɛ wɔkɛ Mla lɛ bɛ sane ko dɔŋŋ, ejaakɛ wɔtsɔ̃mɔ tamɔ gbohii yɛ nɔ ni fi wɔ kpɛŋŋ lɛ gbɛfaŋ, bɔ ni afee ni wɔsɔ̃mɔ yɛ mumɔ ni etsɔ̃ ehee mli, shi jeee yɛ gbɛ momo lɛ ni ji Mla ni aŋma lɛ nɔ.

Mla lɛ kɛ esha

⁷ Belɛ te wɔɔkɛɛ tɛŋŋ? Aso Mla lɛ esha ni? Dabida! Shi moŋ jeee Mla lɛ hewɔŋ kulɛ mileee esha; ejaakɛ kulɛ mileee nɔ ni ji hiɛkɔ̃ɔ, kɛjeee Mla lɛ kɛɛ akɛ, “Ohiɛ akakɔ̃ nii anɔ.”

⁸ Shi esha lɛ tsɔ̃ kitã lɛ nɔ ena hegbɛ ni eteɔ akɔnɔi fɛɛ ashi yɛ mimli; ejaakɛ kɛ Mla bɛ lɛ esha hu egbo.

⁹ Shi mihi shi pɛŋ ni mibɛ mla; shi be ni kitã lɛ ba lɛ, esha lɛ hiɛ tsɛ ekoŋŋ;

¹⁰ shi mi lɛ migbo; ni mina akɛ kitã lɛ ni akɛhã mi yɛ wala hewɔ lɛ, no nɔŋŋ etsɛ gbele ehã mi.

¹¹ Ejaakɛ esha lɛ na hegbɛ kɛtsɔ̃ Mla lɛ nɔ eshishiu mi, ni ekɛ no nɔŋŋ gbe mi.

¹² Hewɔ lɛ Mla lɛ yɛ krɔŋkrɔŋ, ni kitã lɛ yɛ krɔŋkrɔŋ ni eja ni ehi hu.

¹³ Aso belɛ nɔ kpakpa lɛ etsɔ̃ gbele ehã mi lo? Dabida! Shi moŋ, bɔ ni afee ni esha lɛ aje shi akɛ esha; ni ekɛ nɔ kpakpa lɛ nɔŋŋ tsɛ gbele ehã mi, koni esha lɛ atsɔ̃ kitã lɛ nɔ atsɔ̃ esha kɛteke nɔ.

Gbɔmɔfɔmɔ sui enyɔ

¹⁴ Wɔle akɛ Mla lɛ mumɔŋ nɔ ni; shi mi lɛ heloo gbɔmɔ ji mi, ni ahɔ̃ɔ mi awo esha shishi.

¹⁵ Shi nɔ ni mifeɔ lɛ mileee, ejaakɛ nɔ ni misumɔ̃ɔ lɛ, jeee no mifeɔ, shi nɔ ni mihiɔ moŋ lɛ, no mifeɔ.

¹⁶ Shi kɛ nɔ ni misumɔɔɔ lɛ nɔŋŋ mifeɔ lɛ, belɛ mikpɛ̃lɛ̃ɔ akɛ Mla lɛ hi.

¹⁷ Belɛ agbɛnɛ jeee mi mitsuɔ no dɔŋŋ, shi moŋ esha ni hiɔ mimli lɛ tsuɔ.

¹⁸ Ejaakɛ mile akɛ mimli, no ji migbɔmɔ su lɛ mli lɛ, nɔ ko kpakpa ko bɛ jɛi; ejaakɛ suɔmɔ lɛ miyɛ eko moŋ, shi ekpakpafeemɔ ni ebɔ mi.

¹⁹ Ejaakɛ ekpakpa ni misumɔɔ lɛ mifeee; shi efɔŋ ni misumɔ̃ɔɔ lɛ, no moŋ mifeɔ.

²⁰ Shi kɛ nɔ ni misumɔ̃ɔɔ lɛ kɛ̃ mifeɔ lɛ, belɛ jeee mi mitsuɔ no dɔŋŋ, shi moŋ esha ni yɔɔ mimli lɛ tsuɔ.

²¹ Belɛ minaa mla ko akɛ mi ni misumɔɔ akɛ mafee nɔ ni hi lɛ, efɔŋ moŋ kpɛtɛ mihe.

²² Mimligbɛ gbɔmɔ lɛ miishɛɔ yɛ Nyɔŋmɔ Mla lɛ he;

²³ shi minaa mla kroko yɛ mihe nii lɛ amli ni kɛ mla ni kɛ mijwɛŋmɔ yaa lɛ wuɔ ta, ni eŋɔɔ mi nom ehãa esha mla lɛ ni yɔɔ mihenii lɛ amli lɛ.

²⁴ Gbɔmɔ ni nii yɔɔ mɔbɔ ji mi! Namɔ aaajie mi kɛaajɛ gbele gbɔmɔtso nɛɛ dɛŋ?

²⁵ Shidaa ahã Nyɔŋmɔ kɛtsɔ̃ Yesu Kristo, wɔNuŋtsɔ lɛ, nɔ. Belɛ agbɛnɛ mi nɔŋŋ mikɛ mijwɛŋmɔ sɔ̃mɔɔ Nyɔŋmɔ Mla lɛ moŋ, shi mikɛ migbɔmɔ su sɔ̃mɔɔ esha Mla.