Romabii 6 - ŊMALƐ KRƆŊKRƆŊ LƐ

Esha bɛ wɔnɔ hewalɛ dɔŋŋ

¹ Belɛ te wɔɔkɛɛ tɛŋŋ? Aso wɔkã he wɔhi esha lɛ mli, koni dromɔ lɛ afa?

² Dabida! Wɔ ni esha gbɛfaŋ lɛ wɔtamɔ mɛi ni egboi lɛ, te aaafee tɛŋŋ ni wɔhiɛ aaakãmɔ yɛ emli loloŋ?

³ Aloo nyɛleee akɛ wɔteŋ mɛi abɔ ni abaptisi wɔ awo Kristo Yesu mli lɛ, egbele lɛ mli abaptisi wɔ awo?

⁴ No hewɔ lɛ, akɛ baptisimɔ ni abaptisi wɔ awo egbele lɛ mli lɛ efu wɔ kɛ lɛ fɛɛ, koni tamɔ bɔ ni atee Kristo shi kɛjɛ gbohii ateŋ yɛ Tsɛ lɛ anunyam naa lɛ, nakai nɔŋŋ kɛ̃ wɔ hu wɔɔnyiɛ yɛ wala hee mli.

⁵ Ejaakɛ kɛji wɔ kɛ lɛ efee ekome yɛ egbele lɛ henɔ lɛ mli lɛ, no lɛ wɔ kɛ lɛ aaafee ekome yɛ eshitee lɛ nɔ lɛ mli hu;

⁶ ejaakɛ wɔle enɛ akɛ asɛŋ wɔgbɔmɔ momo lɛ kɛ lɛ, koni esha gbɔmɔtso lɛ hiɛ akpãtã ni wɔkasɔ̃mɔ esha lɛ dɔŋŋ.

⁷ Ejaakɛ gbɔmɔ ni egbo lɛ, eye ehe yɛ esha dɛŋ.

⁸ Shi kɛ wɔ kɛ Kristo gbo lɛ, wɔheɔ wɔyeɔ akɛ wɔ kɛ lɛ aaana wala hu,

⁹ ejaakɛ wɔle akɛ ni atee Kristo shi kɛjɛ gbohii ateŋ nɛɛ, egboŋ dɔŋŋ; gbele naŋ enɔ hewalɛ dɔŋŋ.

¹⁰ Ejaakɛ ni egbo lɛ, esha hewɔ egbo, shi kome pɛ; shi ni ehiɛ kã nɛɛ, Nyɔŋmɔ ehiɛ kã ehã.

¹¹ Nakai nyɛ hu nyɛbua nyɛhe akɛ mɛi ni egboi yɛ esha gbɛfaŋ ni amɛhiɛ kãmɔ hã Nyɔŋmɔ yɛ Yesu Kristo, wɔNuŋtsɔ lɛ, mli.

¹² No hewɔ lɛ, nyɛkahãa esha miiyea nyɛgbɔmɔtso ni baagbo lɛ nɔ maŋtsɛ, ni nyɛbo lɛ toi yɛ ekɔnɔi lɛ amli;

¹³ ni asaŋ nyɛkɛ nyɛhenii lɛ akahãa esha akɛ esha lɛ tawuunii; shi moŋ nyɛkɛ nyɛhe ahãa Nyɔŋmɔ akɛ mɛi ni hiɛ etsɛ̃ kɛjɛ gbohii ateŋ, ni nyɛkɛ nyɛhenii lɛ afea jalɛ tawuunii nyɛhãa Nyɔŋmɔ.

¹⁴ Ejaakɛ esha naŋ nyɛnɔ hewalɛ, ejaakɛ jeee Mla shishi nyɛyɔɔ, shi moŋ dromɔ shishi nyɛyɔɔ.

Jalɛ tsuji ji wɔ

¹⁵ Belɛ mɛni? Aso wɔfee esha akɛni wɔbɛ mla shishi shi dromɔ moŋ shishi wɔyɔɔ lɛ? Dabida!

¹⁶ Ani nyɛleee akɛ, mɔ ni nyɛkɛ nyɛhe feɔ tsuji nyɛhãa ni nyɛboɔ lɛ toi lɛ, nakai gbɔmɔ lɛ ni nyɛboɔ lɛ toi lɛ tsuji ji nyɛ; esha ni kɛ mɔ yaa gbele mli lɛ tsuji jio, aloo toiboo ni kɛ mɔ yaa jalɛ mli lɛ tsuji jio?

¹⁷ Shi shidaa ahã Nyɔŋmɔ, akɛ kulɛ sa lɛ esha tsuji ji nyɛ, shi agbɛnɛ nyɛjɛ nyɛtsui fiaa mli nyɛbo nɛkɛ tsɔ̃ɔmɔ ni akɛ nyɛ ewo mli nɛɛ toi.

¹⁸ Ni akɛni akpɔ̃ nyɛ yɛ esha dɛŋ lɛ, nyɛtsɔ̃mɔ jalɛ tsuji.

¹⁹ Miiwie akɛ gbɔmɔ yɛ nyɛgbedemɔ ni jɛ gbɔmɔfɔmɔ su mli lɛ hewɔ. Tamɔ bɔ ni nyɛkɛ nyɛhenii lɛ fee tsuji nyɛhã nyaŋemɔ nii kɛ mlatɔ̃mɔ koni nyɛkɛtɔ̃ Mla lɛ, nakai nɔŋŋ kɛ̃ agbɛnɛ nyɛkɛ nyɛhenii lɛ afea jalɛ tsuji ahãa krɔŋkrɔŋfeemɔ.

²⁰ Be ni nyɛ ji esha tsuji lɛ, nyɛye nyɛhe kɛjɛ jalɛ dɛŋ.

²¹ Ni mɛni nyɛna kɛjɛ mli yɛ nakai be lɛ mli? Yibii ni nyɛhiɛ egboi yɛ he agbɛnɛ, ejaakɛ nomɛi anaagbee ji gbele.

²² Shi agbɛnɛ lɛ, ni akpɔ̃ nyɛ yɛ esha dɛŋ ni nyɛtsɔ̃mɔ Nyɔŋmɔ tsuji nɛɛ, nɔ ni nyɛnaa kɛjɛɔ mli ji krɔŋkrɔŋfeemɔ, ni enaagbee ji naanɔ wala.

²³ Ejaakɛ esha dɛŋ nyɔmɔwoo lɛ gbele ni; shi Nyɔŋmɔ dromɔ keenɔ lɛ naanɔ walaŋ yɛ Yesu Kristo, wɔNuŋtsɔ lɛ, mli.