Romabii 4 - ŊMALƐ KRƆŊKRƆŊ LƐ

Abraham hemɔkɛyeli akɛ nɔkwɛmɔnɔ

¹ Belɛ mɛni wɔɔkɛɛ akɛ Abraham ni ji wɔtsɛ yɛ heloo gbɛfaŋ lɛ na mɔ?

² Kɛ nitsumɔi anɔ adamɔ abu lɛ bem lɛ, kulɛ eyɛ shwãa nɔ, shi belɛ jeee yɛ Nyɔŋmɔ hiɛ.

³ Ejaakɛ te ŋmalɛ lɛ kɛɔ tɛŋŋ? “Ni Abraham he Nyɔŋmɔ eye, ni abu no jalɛ ahã lɛ.”

⁴ Mɔ ni tsuɔ nii lɛ, abuuu enyɔmɔwoo lɛ akɛ dromɔ nɔ ko, shi moŋ akɛ egbɛnaa nɔ ko.

⁵ Shi mɔ ni jeee nii etsuɔ, shi eheɔ mɔ ni buɔ eshafeelɔ bem lɛ nɔ eyeɔ lɛ, Nyɔŋmɔ buɔ ehemɔkɛyeli lɛ akɛ jalɛ ehãa lɛ.

⁶ Tamɔ bɔ ni David hu kɛɔ akɛ ajɔɔ gbɔmɔ ni Nyɔŋmɔ shiɔ nitsumɔi asɛɛ ebuɔ lɛ jalɔ lɛ,

⁷ “Ajɔɔ mɛi ni akɛ amɛmlatɔ̃mɔi lɛ efa amɛ, ni atsimɔ amɛhe eshai lɛ anɔ lɛ.

⁸ Ajɔɔ nuu ni Nuŋtsɔ lɛ ebuuu ehe esha lɛ ehãaa lɛ lɛ.”

⁹ Agbɛnɛ nɛkɛ jɔɔmɔ nɛɛ, mɛi ni afo amɛ ketia kɛkɛ anɔ ni, aloo foolɔi lɛ hu anɔ̃ŋ? Ejaakɛ wɔkɛɔ akɛ abu hemɔkɛyeli lɛ akɛ jalɛ ahã Abraham.

¹⁰ Agbɛnɛ te abu lɛ jalɛ ahã lɛ tɛŋŋ? Be ni afo lɛ ketia lɛ aloo be mli ni afoko lɛ ketia lɛ? Jeee be mli ni afo lɛ ketia, shi moŋ be ni eji foolɔ lɛ.

¹¹ Ni enine shɛ ketiafoo okadi lɛ nɔ akɛ jalɛ naasɔomɔnɔ ni akɛsɔo ehemɔkɛyeli ni ena be mli ni eji foolɔ beebe lɛ naa, ni efee mɛi fɛɛ ni heɔ yeɔ be ni amɛ ji foolɔi lɛ atsɛ, ni abu hemɔkɛyeli ahã amɛ hu akɛ jalɛ;

¹² ni asaŋ efee ketiafolɔi atsɛ hu ehã mɛi ni amɛjeee ketiafolɔi kɛkɛ, shi moŋ amɛkɔ wɔtsɛ Abraham, mɔ ni he ye be mli ni eji foolɔ beebe lɛ, nane.

Nyɔŋmɔ shiwoo ni anaa kɛtsɔ̃ɔ hemɔkɛyeli nɔ

¹³ Ejaakɛ jeee Mla nɔ ni Abraham ye hewɔ ni Nyɔŋmɔ wo lɛ loo eshwiei ashi akɛ je lɛ aaatsɔ̃ enɔ lɛ, shi moŋ akɛni ehe eye ni Nyɔŋmɔ bu lɛ akɛ jalɔ lɛ hewɔŋ.

¹⁴ Ejaakɛ kɛ Mla shishibii lɛ ji niyelɔi lɛ, belɛ hemɔkɛyeli lɛ efee yaka, ni shiwoo lɛ hu he bɛ sɛɛnamɔ dɔŋŋ.

¹⁵ Mla lɛ kɛ Nyɔŋmɔ mlifu baa, shi he ni mla bɛ lɛ, mlatɔ̃mɔ hu bɛ.

¹⁶ Enɛ hewɔ ejɛ hemɔkɛyeli mli lɛ, bɔ ni afee ni shiwoo lɛ afee dromɔ sane, ni ama shi shiŋŋ ahã eshwiei lɛ fɛɛ, ni jeee Mla shishibii lɛ kɛkɛ, shi moŋ mɛi ni jɛ Abraham, ni ji wɔ fɛɛ wɔtsɛ lɛ, hemɔkɛyeli lɛ mli lɛ hu;

¹⁷ tamɔ bɔ ni aŋma lɛ akɛ, “Mikɛ bo efee jeŋmaji pii atsɛ” yɛ Nyɔŋmɔ mɔ ni ehe eye lɛ hiɛ, mɔ hu ni tsiɛ̃ɔ gbohii ahiɛ, ni etsɛɔ nibii ni bɛ lɛ kɛbaa tamɔ nɔ ni amɛyɛ momo lɛ.

¹⁸ Ni he ni kulɛ hiɛnɔkãmɔ ko bɛ lɛ, ena hiɛnɔkãmɔ kɛ he ni ehe eye, mɔ ni etsɔ̃ jeŋmaji pii atsɛ, tamɔ bɔ ni akɛɛ lɛ akɛ, “Nakai oshwiei lɛ aaatamɔ.”

¹⁹ Ni ehemɔkɛyeli lɛ gbɔjɔɔɔ, ni ejwɛŋŋ lɛ diɛŋtsɛ egbɔmɔtso gbo ni egbo momo, akɛni eye aaafee afii oha lɛ, kɛ Sara fɔ ni efɔɔɔ lɛ he;

²⁰ ni eyiŋ efeee lɛ kɔshikɔshi yɛ Nyɔŋmɔ shiwoo lɛ he tamɔ akɛ eheee eyeee, shi moŋ ena hewalɛ yɛ hemɔkɛyeli mli, ni ewo Nyɔŋmɔ hiɛ nyam,

²¹ ni eyɛ hewalɛ yɛ nɔ jogbaŋŋ akɛ nɔ ni Nyɔŋmɔ ewo he shi lɛ, eeenyɛ efee hu.

²² No hewɔ hu ni abu no jalɛ ahã lɛ lɛ.

²³ Shi jeee lɛ kɛkɛ ehewɔ aŋma akɛ “abu no jalɛ ahã lɛ” lɛ,

²⁴ shi moŋ wɔ mɛi ni abaabu ahã wɔ lɛ hu hewɔ, wɔ mɛi ni wɔheɔ mɔ ni tee wɔNuŋtsɔ Yesu shi kɛjɛ gbohii ateŋ lɛ nɔ wɔyeɔ lɛ;

²⁵ shi akɛ lɛ hã yɛ wɔtɔ̃mɔi lɛ ahewɔ, ni atee lɛ shi ekoŋŋ yɛ wɔbembuu hewɔ.