Romabii 3 - ŊMALƐ KRƆŊKRƆŊ LƐ

¹ Belɛ agbɛnɛ, mɛni Yudanyo kɛfe mɛi krokomɛi mɔ? Aloo mɛɛ sɛɛnamɔ yɔɔ ketiafoo mli?

² Efa yɛ gbɛ fɛɛ gbɛ nɔ. Klɛŋklɛŋ nɔ ji akɛ atu Nyɔŋmɔ wiemɔi lɛ awo amɛdɛŋ.

³ Shi kɛ mɛi komɛi heee yeee lɛ, mɛni? Ani he ni amɛheee amɛyeee lɛ aaahã Nyɔŋmɔ anɔkwayeli lɛ afee yaka?

⁴ Dabida! Nyɔŋmɔ lɛ, kɛ gbɔmɔ fɛɛ gbɔmɔ fee amalelɔ po, lɛ lɛ ja efee anɔkwafo tamɔ bɔ ni aŋma lɛ akɛ, “Bɔ ni afee ni ana akɛ osane ja yɛ owiemɔi lɛ amli, ni oye kunim yɛ okojomɔ lɛ mli.”

⁵ Shi kɛji wɔja ni wɔjaaa lɛ hãa Nyɔŋmɔ jalɛ lɛ jeɔ kpo lɛ, te wɔɔkɛɛ tɛŋŋ? Aso Nyɔŋmɔ nɔ ejaaa kɛji emlifu ba wɔnɔ lɛ? (Miiwie akɛ gbɔmɔ).

⁶ Dabida! Ejaakɛ kɛji nakai ni lɛ, te aaafee tɛŋŋ ni Nyɔŋmɔ aaakojo je lɛ?

⁷ Shi kɛ mimalemɔ lɛ hãa Nyɔŋmɔ anɔkwale lɛ faa kɛtekeɔ nɔ hã enunyam lɛ, mɛɛba mɔ ni akã he akojoɔ mi akɛ eshafeelɔ?

⁸ Ani jeee tamɔ bɔ ni afoɔ sane afɔ̃ɔ wɔnɔ ni mɛi komɛi kɛɔ yɛ wɔhe akɛ wɔkɛɛ akɛ, “Nyɛhãa wɔfea efɔŋ koni ekpakpa aba” lɛ? Nakai mɛi lɛ afɔbuu lɛ ja pɛ.

Jalɔ ko bɛ

⁹ Belɛ mɛni? Ani wɔ Yudafoi wɔhi fe mɛi krokomɛi? Jeee nakai kwraa; ejaakɛ wɔfolɔ Yudafoi kɛ Helabii fɛɛ anaa momo akɛ amɛfɛɛ amɛyɛ esha shishi,

¹⁰ tamɔ bɔ ni aŋma lɛ akɛ, “Jalɔ ko bɛ, mɔ kome folo bɛ;

¹¹ nilelɔ ko bɛ, mɔ ko mɔ ko bɛ ni taoɔ Nyɔŋmɔ sɛɛgbɛ.

¹² Amɛ fɛɛ amɛgba afã, amɛ blublu amɛhiii amɛhãaa nɔ ko; Mɔ ko mɔ ko bɛ ni feɔ ekpakpa, mɔ kome folo bɛ.

¹³ Gbonyobu ni agbele naa ji amɛsɛ̃ lɛ; amɛkɛ amɛlilɛii shishiuɔ mɔ, shikpãi anaa ebɔɔ yɛ amɛnaabu.

¹⁴ Loomɔ kɛ joomɔ eyi amɛdaaŋ obɔ̃.

¹⁵ Amɛhe yɛ oya kɛ láshishwiemɔ;

¹⁶ hiɛkpãtãmɔ kɛ awerɛhoo yɛ amɛgbɛi anɔ.

¹⁷ Ni hejɔlɛ gbɛ lɛ amɛleee.

¹⁸ Nyɔŋmɔ gbeyeishemɔ ko bɛ amɛhiɛ.”

¹⁹ Shi agbɛnɛ wɔle akɛ nibii fɛɛ ni Mla lɛ kɛɔ lɛ, mɛi ni yɔɔ Mla lɛ shishi lɛ ekɛwieɔ, koni mɔ ko mɔ ko akana naabu, ni jeŋ muu lɛ fɛɛ aye fɔ yɛ Nyɔŋmɔ hiɛ.

²⁰ Ejaakɛ adamɔŋ Mla lɛ nitsumɔ nɔ abuŋ gbɔmɔ ko gbɔmɔ ko bem yɛ ehiɛ; ejaakɛ Mla nɔ atsɔ̃ɔ aleɔ nɔ ni ji esha.

Jalɛ ni jɛ hemɔkɛyeli mli lɛ

²¹ Shi agbɛnɛ lɛ ashi Mla lɛ sɛɛ ajie Nyɔŋmɔ jalɛ lɛ kpo faŋŋ, ni no he odase Mla lɛ kɛ gbalɔi lɛ yeɔ;

²² no ji Nyɔŋmɔ jalɛ ni atsɔ̃ɔ Yesu Kristo nɔ hemɔkɛyeli nɔ akɛhãa mɛi fɛɛ ni heɔ yeɔ lɛ. Ejaakɛ srɔto ko bɛ;

²³ ejaakɛ mɛi fɛɛ efee esha, ni Nyɔŋmɔ anunyam lɛ ebɔ amɛ,

²⁴ ni akɛ edromɔ lɛ buɔ amɛ bem yaka kɛtsɔ̃ɔ kpɔ̃mɔ ni yɔɔ Kristo Yesu mli lɛ nɔ.

²⁵ Lɛ ji mɔ ni Nyɔŋmɔ jie to akɛ kpãtãmɔ nɔ kɛtsɔ̃ elá lɛ nɔ hemɔkɛyeli nɔ koni ekɛjie ejalɛ lɛ kpo, yɛ ehiɛ ni eku efɔ̃ eshai ni afee sa lɛ anɔ yɛ etsuishiŋmɛɛ mli lɛ hewɔ;

²⁶ koni ejie ejalɛ lɛ etsɔ̃ɔ yɛ benɛ be nɛɛ mli, ni eye bem ni ebu mɔ ni heɔ Yesu nɔ yeɔ lɛ hu bem.

²⁷ Agbɛnɛ mɛni nɔ wɔshwãa wɔfɔ̃ɔ? Nɔ ko bɛ. Mɛɛ Mla nɔ atsɔ̃? Nitsumɔi anɔ lɛ nɔ lo? Dabi, shi hemɔkɛyeli mla lɛ nɔ moŋ atsɔ̃.

²⁸ No hewɔ lɛ, wɔbuɔ akɛ hemɔkɛyeli nɔ atsɔ̃ɔ abuɔ gbɔmɔ bem, shi jeee Mla nitsumɔi anɔ.

²⁹ Aloo Nyɔŋmɔ lɛ Yudafoi kɛkɛ aNyɔŋmɔ ni? Ani jeee jeŋmaji lɛ hu aNyɔŋmɔ ni? Hɛɛ, jeŋmaji lɛ hu aNyɔŋmɔ

³⁰ akɛni Nyɔŋmɔ lɛ Nyɔŋmɔ kome ni, ni hemɔkɛyeli naa ebuɔ ketiafoo bem, ni esaa edamɔɔ hemɔkɛyeli nɔ ebuɔ foo bem lɛ.

³¹ Belɛ wɔmiitsɔ̃ hemɔkɛyeli nɔ wɔhã Mla lɛ afee yaka lo? Dabida, shi wɔkɛmiima Mla lɛ nɔ mi moŋ.