Romabii 2 - ŊMALƐ KRƆŊKRƆŊ LƐ

Nyɔŋmɔ jalɛ kojomɔ lɛ

¹ No hewɔ lɛ, bo, mɔ fɛɛ mɔ ni kojoɔ lɛ, obɛ naajiemɔ ko; ejaakɛ be mli ni okojoɔ mɔ kroko lɛ, oobu bo diɛŋtsɛ ohe fɔ; ejaakɛ bo ni okojoɔ lɛ otsuɔ nakai nii lɛ nɔŋŋ.

² Shi wɔle akɛ Nyɔŋmɔ kojomɔ ni baa mɛi ni tsuɔ nakai nii lɛ anɔ lɛ ja.

³ Bo gbɔmɔ ni okojoɔ mɛi ni tsuɔ nɛkɛ nii nɛɛ ni ofeɔ nakai nɔŋŋ lɛ, ani osusuɔ akɛ bo lɛ ohe aaaje Nyɔŋmɔ kojomɔ lɛ mli?

⁴ Aloo obuuu emlihilɛ kɛ eyishiŋmɛɛ kɛ etsuishitoo babaoo lɛ, ni oleee akɛ Nyɔŋmɔ mlihilɛ lɛ gbɛ etsɔ̃ɔ bo kɛya tsuitsakemɔ mli?

⁵ Shi okɛ otsuiwalɛ kɛ ohe ni oshwaaa lɛ miitĩa mlifu naa ohã ohe oto Nyɔŋmɔ mlifu gbi lɛ, nɔ nɔ ni ebaatsɔ̃ ejie ejalɛ kojomɔ lɛ kpo lɛ;

⁶ lɛ ebaawo mɔ fɛɛ mɔ nyɔ̃mɔ bɔ ni sa enitsumɔi lɛ:

⁷ mɛi ni kɛ tsuishiŋmɛɛ hiɛɔ ekpakpafeemɔ mli ni amɛtaoɔ anunyam kɛ woo kɛ shihilɛ ni fiteŋ lɛ, eeehã amɛ naanɔ wala;

⁸ shi mɛi ni sumɔɔ bei ni amɛbooo anɔkwale lɛ toi, shi amɛboɔ nii ni ejaaa moŋ toi lɛ, amɛnɔ ji mlifu kɛ mlila.

⁹ Amanehulu kɛ hejaramɔ aaaba gbɔmɔ fɛɛ gbɔmɔ ni tsuɔ nifɔɔjianii lɛ susuma nɔ, Yudanyo tsutsu kɛ Helanyo hu;

¹⁰ shi anunyam kɛ woo kɛ hejɔlɛ aaaba mɔ fɛɛ mɔ ni tsuɔ nikpakpai anii lɛ nɔ, Yudanyo tsutsu kɛ Helanyo hu.

¹¹ Ejaakɛ Nyɔŋmɔ kwɛɛɛ gbɔmɛi ahiɛiaŋ.

¹² Ejaakɛ mɛi abɔ ni bɛ Mla lɛ ni amɛfee esha lɛ amɛaalaaje akɛ mɛi ni bɛ Mla; ni mɛi abɔ ni yɔɔ Mla lɛ shishi ni amɛfee esha lɛ, Mla lɛ nɔŋŋ akɛaakojo amɛ.

¹³ Ejaakɛ jeee Mla lɛ nulɔi ji jalɔi yɛ Nyɔŋmɔ hiɛ, shi moŋ Mla lɛ nɔyelɔi ji mɛi ni aaabu amɛ akɛ jalɔi.

¹⁴ Ejaakɛ kɛ jeŋmajiaŋbii ni bɛ Mla lɛ kɛ amɛfɔmɔŋ su lɛ tsuɔ Mla lɛ naanii lɛ, amɛ ni amɛbɛ Mla lɛ amɛ ji mla hã amɛ diɛŋtsɛ amɛhe.

¹⁵ Amɛnifeemɔnii tsɔ̃ɔ akɛ aŋma Mla lɛ nitsumɔ lɛ yɛ amɛtsuii amli, ni amɛhenilee hu yeɔ odase, ni amɛjwɛŋmɔ folɔɔ amɛnaa kɛ amɛfee nɔ ni ehiii aloo ejieɔ amɛnaa kɛ amɛfee nɔ ni hi.

¹⁶ Enɛ baaba mli gbi nɔ ni Nyɔŋmɔ aaatsɔ̃ Yesu Kristo nɔ akojo gbɔmɛi ateemɔŋnii lɛ yɛ misanekpakpa lɛ naa lɛ.

Yudafoi kɛ Mla lɛ

¹⁷ Shi kɛji bo lɛ atsɛɔ bo Yudanyo, ni okɛ ohe fɔ̃ɔ Mla lɛ nɔ, ni oshwãa ofɔ̃ɔ Nyɔŋmɔ nɔ,

¹⁸ ni ole esuɔmɔnaanii lɛ, ni ole nii ni hi, ejaakɛ ajɛ Mla lɛ mli atsɔ̃ɔ bo,

¹⁹ ni obuɔ ohe akɛ oji shwilafoi agbɛtsɔ̃ɔlɔ kɛ mɛi ni yɔɔ duŋ mli lɛ ala,

²⁰ kɛ mɛi ni leee nii atsɔselɔ kɛ abifabii atsɔ̃ɔlɔ, ejaakɛ oyɛ nilee kɛ anɔkwale he mfoniri kɛjɛ Mla lɛ mli,

²¹ bo ni otsɔ̃ɔ mɛi krokomɛi anii lɛ, otsɔ̃ɔɔ bo diɛŋtsɛ ohe nii? Oshiɛɔ akɛ akaju, shi ojuɔ;

²² okɛɔ akɛ akafite gbãlã, shi ofiteɔ gbãlã; ohiɔ amãgãi, shi ojuɔ Sɔlemɔ we lɛ nii.

²³ Bo ni okɛ Mla lɛ shwãa lɛ okɛ Mla lɛ nɔtɔmɔ lɛ gbeɔ Nyɔŋmɔ he guɔ.

²⁴ Ejaakɛ aŋma akɛ, “Nyɛhewɔ lɛ awieɔ Nyɔŋmɔ gbɛi lɛ he musubɔɔ wiemɔi yɛ jeŋmaji lɛ ateŋ.”

²⁵ Shi kɛ oyeɔ Mla lɛ nɔ lɛ, kulɛ ketiafoo he yɛ sɛɛnamɔ; shi kɛ ofee ohe Mla lɛ nɔtɔ̃lɔ lɛ, oketiafoo lɛ etsɔ̃ foo.

²⁶ Shi kɛji foolɔ lɛ yeɔ Mla lɛ gbɛnai lɛ anɔ lɛ, ani abuŋ efoo lɛ akɛ ketiafoo?

²⁷ Ni heloo gbɛfaŋ foolɔ lɛ ni yeɔ Mla lɛ nɔ lɛ, aaakojo bo ni ohiɛ Mla ni aŋma lɛ ni afo bo ketia hu ni ofee ohe mlatɔ̃lɔ lɛ.

²⁸ Ejaakɛ jeee mɔ ni anaa lɛ yɛ kpo nɔ gbɛ akɛ Yudanyo doo ji Yudanyo, ni asaŋ jeee nɔ ni anaa yɛ kpo nɔ gbɛ yɛ gbɔmɔtso he ji ketiafoo;

²⁹ shi moŋ mɔ ni ji Yudanyo yɛ mligbɛ lɛ ji Yudanyo, ni tsui mli ketiafoo ji nɔ ni atsɔ̃ Mumɔ lɛ nɔ afo, shi jeee Mla lɛ nɔ, ni eyijiemɔ lɛ jɛɛɛ gbɔmɛi aŋɔɔ, shi moŋ Nyɔŋmɔ ŋɔɔ ejɛɔ.