Romabii 16 - ŊMALƐ KRƆŊKRƆŊ LƐ

Ŋamɔi kɛ kɔkɔbɔi

¹ Miijie wɔnyɛmi yoo Foibe ni ji Kenkrea asafo lɛ sɔ̃ɔlɔ lɛ yi mahã nyɛ,

² koni nyɛhere lɛ hiɛmɛɛ yɛ Nuŋtsɔ lɛ mli, bɔ ni sa mɛi krɔŋkrɔŋi lɛ, ni nyɛfata ehe yɛ nitsumɔ fɛɛ nitsumɔ ni nyɛhe hiaa lɛ yɛ mli lɛ mli; ejaakɛ lɛ diɛŋtsɛ hu eji mɛi pii kɛ mi diɛŋtsɛ hu miyelikɛbualɔ.

³ Nyɛŋaa Priskila kɛ Akwila, ni ji minanemɛi nitsulɔi yɛ Kristo Yesu mli lɛ, nyɛhãa mi;

⁴ amɛkɛ amɛhe wo gbele mli yɛ miyiwala hewɔ, ni jeee mi kɛkɛ midaa amɛ shi, shi moŋ jeŋmaji lɛ amli asafoi lɛ fɛɛ hu daa amɛ shi.

⁵ Nyɛŋaa asafo ni yɔɔ amɛwe lɛ hu. Nyɛŋaa misuɔlɔ Epaineto ni ji mɔ klɛŋklɛŋ ni jɛ Asia ni kɛ ehe hã Kristo lɛ.

⁶ Nyɛŋaa Maria ni gba ehe naa pii yɛ nyɛhewɔ lɛ.

⁷ Nyɛŋaa Androniko kɛ Yunia, miwekumɛi ni awo mi kɛ amɛ tsuŋ ni amɛyɔɔ gbɛi yɛ bɔfoi lɛ ateŋ ni amɛtsɔ̃ mihiɛ yɛ Kristo mli lɛ.

⁸ Nyɛŋaa Amplia mɔ ni misumɔɔ yɛ Nuŋtsɔ lɛ mli lɛ.

⁹ Nyɛŋaa Urbano ni ji wɔnaanyo nitsulɔ yɛ Kristo mli lɛ, kɛ misuɔlɔ Staki.

¹⁰ Nyɛŋaa Apele mɔ ni he emɔ shi yɛ Kristo mli lɛ. Nyɛŋaa mɛi ni jɛ Aristobulo shĩabii lɛ ateŋ lɛ.

¹¹ Nyɛŋaa miwekunyo Herodion lɛ. Nyɛŋaa mɛi ni jɛ Narkiso shĩabii lɛ ateŋ ni amɛyɔɔ Nuŋtsɔ lɛ mli lɛ.

¹² Nyɛŋaa Trifaina kɛ Trifosa ni bɔɔ mɔdɛŋ yɛ Nuŋtsɔ lɛ mli lɛ. Nyɛŋaa Persi mɔ ni asumɔɔ ni etsu nii pii yɛ Nuŋtsɔ lɛ mli lɛ.

¹³ Nyɛŋaa Rufo mɔ ni ahala lɛ yɛ Nuŋtsɔ lɛ mli lɛ, kɛ enyɛ ni ji nyɛ hã mi hu lɛ.

¹⁴ Nyɛŋaa Asinkrito, Flegon, Herme, Patroba, Herma kɛ nyɛmimɛi ni kɛ amɛ yɔɔ lɛ.

¹⁵ Nyɛŋaa Filologo kɛ Yulia, Nerea kɛ enyɛmi yoo lɛ, kɛ Olimpa kɛ mɛi krɔŋkrɔŋi lɛ ni kɛ amɛ yɔɔ lɛ fɛɛ.

¹⁶ Nyɛkɛ naashwɔmɔ krɔŋkrɔŋ aŋaŋaa nyɛhe. Kristo asafoi lɛ fɛɛ miibi nyɛ.

¹⁷ Shi anyɛmimɛi, miikpa nyɛ fai ni nyɛhiɛ akã mɛi ni jeɔ tsɔ̃ɔmɔ ni nyɛkase lɛ sɛɛ ni amɛkɛ mligbalamɔi kɛ pampitoo baa lɛ ahe, ni nyɛtsi nyɛhe kɛje amɛhe.

¹⁸ Ejaakɛ mɛi ni yɔɔ nɛkɛ lɛ, jeee wɔ Nuŋtsɔ Yesu Kristo amɛsɔ̃mɔɔ, shi moŋ amɛ diɛŋtsɛ amɛmusu; ni amɛkɛ naaŋɔ̃ɔmɔ kɛ naadɔkɔmɔ wiemɔi lakaa mɛi ni leee efɔŋ lɛ.

¹⁹ Shi nyɛtoiboo lɛ mɛi fɛɛ enu he; no hewɔ lɛ, mina nyɛhe miishɛɛ; shi miisumɔ akɛ nyɛfee nyɛhe nilelɔi yɛ ekpakpa gbɛfãŋ; shi efɔŋ gbɛfaŋ lɛ, mɛi ni leee nɔ ko.

²⁰ Shi etsɛŋ ni hejɔlɛ Nyɔŋmɔ lɛ aaanaanaa Satan nɔ kwraa yɛ nyɛnajiashi. WɔNuŋtsɔ Yesu Kristo dromɔ lɛ kɛ nyɛ ahi shi.

²¹ Minaanyo nitsulɔ Timoteo kɛ miwekumɛi Lukio kɛ Yason kɛ Sosipatre miibi nyɛ.

²² Mi Tertio ni miŋma nɛkɛ wolo nɛɛ, miibi nyɛ yɛ Nuŋtsɔ lɛ mli.

²³ Gaio ni ji mi kɛ asafo lɛ fɛɛ shĩatsɛ lɛ miibi nyɛ. Erasto ni ji maŋ shikatolɔ lɛ, kɛ wɔnyɛmi Kwarto miibi nyɛ. [

²⁴ WɔNuŋtsɔ Yesu Kristo dromɔ lɛ kɛ nyɛ fɛɛ ahi shi! Amen.]

Nyɔŋmɔ yijiemɔ

²⁵ Shi mɔ ni aaanyɛ ahã nyɛfi shi shiŋŋ yɛ misanekpakpa lɛ kɛ Yesu Kristo shiɛmɔ lɛ naa, yɛ teemɔ sane ni akɛtee kɛjɛ naanɔ beebe lɛ kpojiemɔ naa,

²⁶ teemɔ sane ni agbɛnɛ ajie atsɔ̃ɔ faŋŋ yɛ naanɔ Nyɔŋmɔ lɛ famɔ naa, ni atsɔ̃ gbalɔi lɛ aŋmalɛi lɛ anɔ atsi tã atsɔ̃ɔ jeŋmaji lɛ fɛɛ koni amɛbo hemɔkɛyeli lɛ toi lɛ naa lɛ,

²⁷ lɛ Nyɔŋmɔ ni ji nilelɔ kometoo lɛ, aŋɔ anunyam ahã lɛ, yɛ Yesu Kristo mli kɛyashi naanɔ. Amen!