Romabii 15 - ŊMALƐ KRƆŊKRƆŊ LƐ

Nyɛfea nɔ ni aaasa nyɛnanemɛi ahiɛ

¹ Wɔ mɛi ni wɔyɔɔ hewalɛ lɛ, esa akɛ wɔkɛ mɛi ni bɛ hewalɛ lɛ agbɔjɔmɔi lɛ kpeɔ amɛ, ni wɔhe akasa wɔ diɛŋtsɛ wɔhiɛ.

² Wɔteŋ mɔ fɛɛ mɔ asa enaanyo hiɛ, koni ahi ahã lɛ ni enane amɔ shi.

³ Ejaakɛ Kristo hu hãaa ehe asa ehiɛ; shi moŋ tamɔ bɔ ni aŋma lɛ, “Mɛi ni bɔɔ bo ahora lɛ ahorabɔi lɛ ebakã minɔ.”

⁴ Ejaakɛ nibii abɔ ni aŋma ato momo lɛ, aŋma ni etsɔ̃ɔ wɔ nii, koni wɔkɛ hiɛmiamɔ kɛ ŋmalɛi lɛ amli miishɛjemɔ lɛ ana hiɛnɔkãmɔ.

⁵ Ni Nyɔŋmɔ ni hãa wɔnyɛɔ wɔhiɛ wɔmĩaa ni eshɛjeɔ wɔmii lɛ ahã nyɛna jwɛŋmɔ kome yɛ nyɛteŋ tamɔ Kristo Yesu,

⁶ koni nyɛkɛ jwɛŋmɔ kome kɛ naabu kome awo Nyɔŋmɔ, wɔNuŋtsɔ Yesu Kristo Tsɛ lɛ, hiɛ nyam.

Sanekpakpa lɛ yɛ hã Yudafoi kɛ jeŋmajiaŋbii fɛɛ

⁷ No hewɔ lɛ, nyɛhereherea nyɛhe, tamɔ bɔ ni Kristo ehere nyɛ kɛba Nyɔŋmɔ anunyam lɛ mli lɛ.

⁸ Shi miikɛɛ akɛ Yesu Kristo tsɔ̃ sɔ̃ɔlɔ ehã Yudafoi lɛ yɛ Nyɔŋmɔ anɔkwale lɛ hewɔ, koni ekɛmã shiwoi ni awo tsɛmɛi lɛ anɔ mi;

⁹ ni jeŋmaji lɛ awo Nyɔŋmɔ hiɛ nyam yɛ mɔbɔnalɛ hewɔ, tamɔ bɔ ni aŋma lɛ akɛ, “Enɛ hewɔ lɛ, majie oyi yɛ jeŋmaji ateŋ, ni matsi ogbɛi tã mala.”

¹⁰ Ni Ŋmalɛ lɛ saa kɛɛ, “Nyɛ jeŋmaji, nyɛ kɛ emaŋ lɛ mli afilia nyɛ!”

¹¹ Ni asaŋ, “Nyɛjiea Nuŋtsɔ lɛ yi, nyɛ jeŋmaji fɛɛ, ni nyɛkafoa lɛ, nyɛ maji fɛɛ!”

¹² Ni asaŋ Yesaia kɛɛ akɛ, “Ishai shishifã lɛ aaaba, mɔ hu ni aaate shi koni ebaye jeŋmaji lɛ anɔ lɛ; lɛ enɔ jeŋmaji lɛ kɛ amɛhiɛ aaafɔ̃.”

¹³ Shi Nyɔŋmɔ ni ji wɔhiɛnɔkãmɔ lɛ kɛ miishɛɛ kɛ hejɔlɛ fɛɛ awo nyɛ obɔ̃bɔ̃ɔbɔ̃ yɛ hemɔkɛyeli mli, koni nyɛna hiɛnɔkãmɔ ni ateke nɔ yɛ Mumɔ Krɔŋkrɔŋ hewalɛ mli.

Nɔ hewɔ ni Paulo kɛ ekãa ŋma wolo nɛɛ

¹⁴ Shi anyɛmimɛi, mi diɛŋtsɛ hu miheɔ miyeɔ krɛdɛɛ yɛ nyɛhe akɛ nyɛ diɛŋtsɛ hu nyɛyimɔ obɔ̃bɔ̃ɔbɔ̃ kɛ mlihilɛ; ni nilee fɛɛ eyimɔ nyɛ tɔ, ni nyɛnyɛɔ nyɛwieɔ nyɛtsɔ̃ɔ nyɛhe hu.

¹⁵ Shi, mikɛ ekãa pii ŋmala saji nɛɛ ekomɛi mihã nyɛ, koni mikɛkai nyɛ, yɛ dromɔ ni Nyɔŋmɔ kɛduro mi lɛ hewɔ;

¹⁶ koni mitsɔ̃ Yesu Kristo sɔ̃ɔlɔ mihã jeŋmaji lɛ, ni mitsu Nyɔŋmɔ Sanekpakpa lɛ he nii akɛ osɔfo, ni jeŋmaji lɛ atsɔ̃mɔ afɔle ni sa ehiɛ jogbaŋŋ ni atsuu he yɛ Mumɔ Krɔŋkrɔŋ mli.

¹⁷ No hewɔ lɛ, miyɛ shwãanɔ yɛ Kristo Yesu mli yɛ nii ni mitsuɔ mihãa Nyɔŋmɔ lɛ hewɔ;

¹⁸ ejaakɛ mikaŋ akɛ mawie nɔ ko akɛ ja nɔ ni Kristo tsɔ̃ minɔ etsu ehã jeŋmaji lɛ atoiboo yɛ wiemɔ kɛ nifeemɔnii amli,

¹⁹ yɛ okadii kɛ naakpɛɛnii ahewalɛ mli, yɛ Mumɔ hewalɛ mli; bɔ ni fee nɛ ni mijɛ Yerusalɛm mibɔle shi aahu kɛyashi Ilirikum ni mishiɛ Kristo Sanekpakpa lɛ migbe naa.

²⁰ Nɔ ni mikɛmã mihiɛ titri ji akɛ, he ni atsiko Kristo gbɛi tã yɛ lɛ, jɛi majaje Sanekpakpa lɛ yɛ, bɔ ni afee ni mikayatswa mɔ kroko shishitoo nɔ;

²¹ shi moŋ tamɔ bɔ ni aŋma lɛ akɛ, “Mɛi ni ajajeko ehe sane ko atsɔ̃ko amɛ lɛ, amɛaana, ni mɛi ni nuko lɛ, amɛaanu shishi.”

Paulo to eyiŋ akɛ eeeya Roma

²² Enɛ nɔŋŋ etsi mi gbɛ aahu ni mibako nyɛŋɔɔ lɛ.

²³ Shi agbɛnɛ akɛni mibɛ nɔ ko tsumɔ yɛ biɛ niiaŋ dɔŋŋ, ni misaa mije afii pii miitao akɛ mibaa nyɛŋɔɔ hewɔ lɛ,

²⁴ be fɛɛ be ni mafã gbɛ kɛaatee Tarshish lɛ, maba nyɛŋɔɔ; ejaakɛ mihiɛ kã nɔ akɛ, kɛ miiho lɛ, mabakwɛ nyɛhiɛ, koni, kɛji mina miishɛɛ fioo yɛ nyɛŋɔɔ tswɛm lɛ, nyɛyajie mi gbɛ kɛya jɛi.

²⁵ Shi amrɔ nɛɛ mifã gbɛ kɛmiiya Yerusalɛm ni miyasɔ̃mɔ krɔŋkrɔŋbii lɛ.

²⁶ Ejaakɛ Makedonia kɛ Akaia fɛɛ kɛ tsuijurɔ etsu onia ko kɛhã krɔŋkrɔŋbii ni yɔɔ Yerusalɛm lɛ ateŋ ohiafoi lɛ.

²⁷ Tsuijurɔ naa amɛfee yɛ lɛɛlɛŋ moŋ, shi asaŋ amɛhiɛ amɛ nyɔmɔ. Ejaakɛ kɛ jeŋmaji lɛ ena amɛmumɔŋ nikpakpai lɛ eko lɛ, belɛ esa akɛ amɛ hu amɛkɛ heloo nikpakpai lɛ eko asɔ̃mɔ amɛ.

²⁸ No hewɔ lɛ, kɛ mina migbe enɛ naa ni misɔo nɛkɛ yibii nɛɛ anaa mihã amɛ lɛ, mabatsɔ̃ nyɛŋɔɔ kɛya Tarshish.

²⁹ Ni mile akɛ, kɛ miba nyɛŋɔɔ lɛ, Kristo Sanekpakpa lɛ mli jɔɔmɔ falɛ mli maba yɛ.

³⁰ Shi miikpa nyɛ fai, anyɛmimɛi, yɛ wɔNuŋtsɔ Yesu Kristo hewɔ kɛ Mumɔ lɛ suɔmɔ lɛ hewɔ, akɛ nyɛfata mihe kɛpele yɛ nyɛsɔlemɔi ni nyɛsɔleɔ nyɛhãa mi yɛ Nyɔŋmɔ hiɛ lɛ amli,

³¹ koni ajie mi yɛ mɛi ni heee yeee ni yɔɔ Yudea lɛ adɛŋ, ni misɔ̃ɔmɔ ni miyaa miyasɔ̃mɔ yɛ Yerusalɛm lɛ asa mɛi krɔŋkrɔŋi lɛ ahiɛ jogbaŋŋ;

³² koni, yɛ Nyɔŋmɔ suɔmɔ naa lɛ, mikɛ miishɛɛ aba nyɛŋɔɔ, ni mabawo mitsui yɛ nyɛŋɔɔ.

³³ Hejɔlɛ Nyɔŋmɔ lɛ kɛ nyɛ fɛɛ ahi shi. Amen!