Romabii 14 - ŊMALƐ KRƆŊKRƆŊ LƐ

Kaakojo onyɛmi

¹ Mɔ ni ji gbedelɔ yɛ hemɔkɛyeli mli lɛ nyɛherea lɛ atuu; shi nyɛkɛ lɛ akakojoa yɛ esusumɔi ahe.

² Mɔ ko yɛ hemɔkɛyeli ni ekɛyeɔ nɔ fɛɛ nɔ; shi mɔ ni egbede lɛ, shwie kɛkɛ eyeɔ.

³ Mɔ ni yeɔ lɛ akagbe mɔ ni yeee lɛ he guɔ, ni mɔ ni yeee lɛ akakojo mɔ ni yeɔ lɛ; ejaakɛ Nyɔŋmɔ ehere lɛ atuu.

⁴ Namɔ ji bo ni okojoɔ mɔ kroko wenuu? Edamɔ shi jio, egbee shi jio, lɛ diɛŋtsɛ enuŋtsɔ sane ni; shi eeedamɔ shi, ejaakɛ Nyɔŋmɔ yɛ hewalɛ ni eeehã edamɔ shi.

⁵ Mɔ ko buɔ gbi ko fe gbi kroko, ni mɔ ko hu buɔ gbi fɛɛ gbi pɛpɛɛpɛ. Mɔ fɛɛ mɔ ale nɔ krɛdɛɛ ni ji lɛ diɛŋtsɛ ejwɛŋmɔ yɛ enɛ he.

⁶ Mɔ ni buɔ gbi titri ko lɛ, Nuŋtsɔ lɛ hewɔ efeɔ. Mɔ ni yeɔ nii lɛ, Nuŋtsɔ lɛ hewɔ eyeɔ, ejaakɛ edaa Nyɔŋmɔ shi; ni mɔ ni yeee nii lɛ, Nuŋtsɔ lɛ hewɔ eyeee, ni lɛ hu edaa Nyɔŋmɔ shi.

⁷ Ejaakɛ wɔteŋ mɔ ko hiɛ kãaa hãaa lɛ diɛŋtsɛ ehe, ni mɔ ko gbooo hu hãaa lɛ diɛŋtsɛ ehe.

⁸ Shi kɛji wɔhiɛ kã lɛ, Nuŋtsɔ lɛ wɔhiɛ kã wɔhã; ni kɛji wɔgboi hu, Nuŋtsɔ lɛ wɔgboi wɔhã. No hewɔ lɛ, wɔhiɛ kã jio, wɔgboi jio, Nuŋtsɔ lɛ nii ji wɔ.

⁹ Ejaakɛ enɛ hewɔ Kristo gbo ni ete shi ni ehiɛ kã bɔ ni afee ni etsɔ̃ gbohii kɛ hiɛkãalɔi fɛɛ aNuŋtsɔ.

¹⁰ Shi bo, mɛɛba okojoɔ onyɛmi? Aloo bo hu, mɛɛba ogbeɔ onyɛmi he guɔ? Ejaakɛ wɔ fɛɛ wɔbaadamɔ Nyɔŋmɔ kojomɔ sɛi lɛ hiɛ.

¹¹ Ejaakɛ aŋma akɛ, “Nuŋtsɔ lɛ kɛɛ, ‘Akɛni mihiɛ kã nɛɛ nakutso fɛɛ nakutso aaakula shi ahã mi, ni lilɛi fɛɛ lilɛi aaajaje Nyɔŋmɔ atsɔ̃ɔ.’ ”

¹² No hewɔ lɛ, wɔteŋ mɔ fɛɛ mɔ baabu lɛ diɛŋtsɛ ehe akɔntaa ehã Nyɔŋmɔ.

Kaato onyɛmi pampi

¹³ No hewɔ lɛ, nyɛkahãa wɔkojokojoa wɔhe dɔŋŋ; shi enɛ moŋ nyɛkojoa, akɛ mɔ ko kɛ tɛmɔnɔ ko akama enyɛmi gbɛ nɔ aloo eto lɛ pampi.

¹⁴ Mile ni misaa miyɛ hewalɛ yɛ nɔ yɛ Nuŋtsɔ Yesu mli akɛ nɔ ko nɔ ko bɛ ni eji bulemɔnɔ lɛ diɛŋtsɛ. Mɔ ni buɔ nɔ ko akɛ bulemɔnɔ ni lɛ, lɛ etsɔ̃ɔ bulemɔnɔ ehãa.

¹⁵ Shi kɛji nɔ ko ni oyeɔ lɛ gbaa onyɛmi naa lɛ, belɛ jeee suɔmɔ naa obaa ojeŋ yɛ lɛ dɔŋŋ. Okɛ oniyenii lɛ akakpãtã mɔ ni Kristo gbo hã lɛ lɛ hiɛ.

¹⁶ No hewɔ lɛ, nyɛkahãa awiea nyɛnɔ kpakpa lɛ he efɔŋ.

¹⁷ Ejaakɛ Nyɔŋmɔ maŋtsɛyeli lɛ jeee niyeli kɛ ninumɔ ni, shi moŋ jalɛ kɛ hejɔlɛ kɛ Mumɔ Krɔŋkrɔŋ mli miishɛɛ ni;

¹⁸ ni mɔ ni sɔ̃mɔɔ Kristo yɛ enɛɛmɛi amli lɛ, Nyɔŋmɔ naa ehe tsuijurɔ ni esa gbɔmɛi ahiɛ hu.

¹⁹ No hewɔ lɛ, agbɛnɛ nyɛhãa wɔtiua hejɔlɛ nibii kɛ nibii ni wɔkɛhã wɔnanemɛi anane amɔ shi moŋ sɛɛ.

²⁰ Kaafite Nyɔŋmɔ nitsumɔ lɛ yɛ niyenii ko hewɔ. Nibii fɛɛ he tse nɛ, shi kɛ̃lɛ eji efɔŋ hã gbɔmɔ ni yeɔ ekɛtoɔ pampi lɛ.

²¹ Ehi akɛ okaye loo ni asaŋ okanu wain loo nɔ ko ni aaato onyɛmi pampi.

²² Bo lɛ oyɛ hemɔkɛyeli? Okɛto oha bo diɛŋtsɛ ohe yɛ Nyɔŋmɔ hiɛ. Ajɔɔ mɔ ni ekojooo lɛ diɛŋtsɛ ehe yɛ nɔ ni ebuɔ akɛ ehi lɛ mli lɛ.

²³ Shi mɔ ni yiŋ etɛ̃ɛɛ lɛ lɛ, kɛji eye lɛ, eyeɔ fɔ yɛ Nyɔŋmɔ hiɛ, ejaakɛ ejɛɛɛ hemɔkɛyeli mli eyeee; ni nɔ fɛɛ nɔ ni jɛɛɛ hemɔkɛyeli mli lɛ esha ni.