Romabii 13 - ŊMALƐ KRƆŊKRƆŊ LƐ

Heshibaa hã maŋnɔyelɔi

¹ Mɔ fɛɛ mɔ aba ehe shi ahã hegbɛi ni yeɔ nɔ lɛ. Ejaakɛ hegbɛ ko bɛ ni jeee Nyɔŋmɔ ŋɔɔ ejɛ; hegbɛi ni yɔɔ lɛ, Nyɔŋmɔ to.

² No hewɔ lɛ, mɔ fɛɛ mɔ ni kuɔ hegbɛ lɛ naa lɛ, Nyɔŋmɔ gbɛjianɔtoo lɛ eteɔ shi eshiɔ lɛ; ni mɛi ni teɔ shi nakai lɛ aaana amɛkojomɔ.

³ Ejaakɛ lumɛi lɛ, amɛhe bɛ gbeyei hã mɔ ni feɔ ekpakpa, shi hã mɔ ni feɔ efɔŋ moŋ; shi kɛji otaooo akɛ nɔyelɔ lɛ he ahi gbeyei ahã bo lɛ, feemɔ ekpakpa, ni ooona yijiemɔ yɛ edɛŋ;

⁴ ejaakɛ Nyɔŋmɔ sɔ̃ɔlɔ ji lɛ yɛ ohewɔ, koni ahi ahã bo. Shi kɛji ofee efɔŋ lɛ, she gbeyei; ejaakɛ jeee yaka ehiɛ tsi lɛ; shi eji Nyɔŋmɔ sɔ̃ɔlɔ kɛ oweletɔlɔ ni hãa Nyɔŋmɔ mlifu baa mɔ ni tsuɔ nifɔɔjianii lɛ nɔ.

⁵ No hewɔ lɛ, sa akɛ abaa he shi, jeee yɛ Nyɔŋmɔ mlifu lɛ kɛkɛ hewɔ, shi moŋ henilee hewɔ hu.

⁶ Enɛ hewɔ ni nyɛtsuɔ onia hu lɛ; ejaakɛ Nyɔŋmɔ tsuji ji amɛ, ni nɛkɛ sɔ̃ɔmɔ nɛɛ nɔŋŋ he amɛyɔɔ.

⁷ Bɔ ni ji mɔ fɛɛ mɔ gbɛnaa lɛ, nyɛfea nyɛhãa lɛ. Mɔ nɔ ni ji onia lɛ, nyɛtsua onia; mɔ nɔ ni ji tóo lɛ, tóo; mɔ nɔ ni ji gbeyeishemɔ lɛ, gbeyeishemɔ; mɔ nɔ ni ji woo lɛ, woo.

Suɔmɔ ji Mla lɛ nɔyeli

⁸ Nyɛkahiɛa mɔ ko mɔ ko nyɔmɔ, akɛ ja suɔmɔ ni nyɛkɛaasumɔsumɔ nyɛhe lɛ; ejaakɛ mɔ ni sumɔɔ enaanyo lɛ eye Mla lɛ nɔ kɛwula shi.

⁹ Ejaakɛ kɛji akɛɛ akɛ, “Kaafite gbãlã! Kaaju! Ohiɛ akakɔ̃ nɔ ko nɔ!” Ni kɛ kitã kroko hu yɛ lɛ, fɛɛ hɔ nɛkɛ wiemɔ nɛɛ ni ji “Suɔmɔ onaanyo tamɔ bɔ ni osumɔɔ bo diɛŋtsɛ ohe” lɛ mli.

¹⁰ Suɔmɔ efeee enaanyo efɔŋ ko, hewɔ lɛ suɔmɔ pɛ ji Mla lɛ fɛɛ nɔyeli.

Ŋmɛlɛtswaa lɛ ebɛŋkɛ

¹¹ Ni nyɛle enɛ hu, no ji be lɛ, akɛ ŋmɛlɛtswaa ni nyɛkɛaate shi kɛjɛ wɔ mli lɛ eshɛ; ejaakɛ wɔyiwalaheremɔ lɛ ebɛŋkɛ agbɛnɛ fe tsutsu be ni wɔhe wɔye lɛ.

¹² Nyɔɔŋ lɛ eho etã, ni jetsɛremɔ ebɛŋkɛ; no hewɔ lɛ, nyɛhãa wɔjiea duŋ mli nitsumɔi lɛ wɔshwiea, ni wɔwo la tawuunii lɛ.

¹³ Nyɛhãa wɔnyiɛa fɛɛfɛo bɔ ni sa shwane, jeee yɛ dãanumɔ mli basabasafeemɔ kɛ dãatɔɔ mli; jeee ajwamãŋbɔɔ kɛ nyɛnyɛŋtswibɔɔ mli, jeee bei kɛ awuŋayeli mli;

¹⁴ shi moŋ nyɛwoa Nuŋtsɔ Yesu Kristo tamɔ dama, ni nyɛkahãa heloo lɛ nɔ jwɛŋmɔ lɛ miitsɔ̃ heloo lɛ sɛɛdii.