Romabii 12 - ŊMALƐ KRƆŊKRƆŊ LƐ

Wala hee yɛ Kristo mli

¹ No hewɔ lɛ, anyɛmimɛi, mikɛ Nyɔŋmɔ mlitsɔlɛ miikpa nyɛ fai akɛ nyɛŋɔ nyɛgbɔmɔtsei lɛ nyɛdamɔ shi akɛ afɔle ni hiɛ kã ni he tse ni sa Nyɔŋmɔ hiɛ; enɛ ji jamɔ ni sa.

² Ni nyɛkabaa nyɛjeŋ tamɔ jeŋbii, shi moŋ nyɛkɛ nyɛjwɛŋmɔ ni etsɔ̃ ehee lɛ afea nyɛhe gbɔmɛi hei, koni nyɛyoo nii ni ji Nyɔŋmɔ suɔmɔnaanii kpakpai ni sa ehiɛ jogbaŋŋ ni hi kɛwula shi lɛ.

³ Shi miitsɔ̃ dromɔ ni akɛduro mi lɛ nɔ miikɛɛ nyɛteŋ mɔ fɛɛ mɔ akɛ, ekabu lɛ diɛŋtsɛ ehe tuutu fe bɔ ni sa; shi moŋ ejwɛŋ kɛ hiɛshikãmɔ, mɔ fɛɛ mɔ lɛ yɛ hemɔkɛyeli bɔ ni Nyɔŋmɔ ehã lɛ lɛ naa.

⁴ Ejaakɛ tamɔ bɔ nɔŋŋ ni gbɔmɔtso kome he lɛ wɔyɛ henii pii, shi henii lɛ fɛɛ tsuuu nitsumɔ kome lɛ,

⁵ nakai nɔŋŋ wɔyi pii nɛɛ gbɔmɔtso kome ji wɔ yɛ Kristo mli, ni wɔteŋ mɔ fɛɛ mɔ lɛ enaanyohenɔ ji lɛ,

⁶ ni dromɔ ni akɛhã wɔ lɛ naa lɛ, wɔyɛ dromɔ keenii srɔtoi, mɔ fɛɛ mɔ kɛ enɔ; kɛji mɔ ko nɔ ji akɛ egba lɛ, egba yɛ hemɔkɛyeli bɔ ni akɛhã lɛ lɛ naa;

⁷ kɛji sɔ̃ɔmɔ ni lɛ, ehiɛ sɔ̃ɔmɔ lɛ mli; kɛ tsɔɔlɔ ji mɔ lɛ, ehiɛ nitsɔɔmɔ lɛ mli;

⁸ mɔ ni wieɔ tsɔ̃ɔ mɛi lɛ, ehiɛ wiemɔ kɛ tsɔ̃ɔmɔ lɛ mli; mɔ ni kɛ enii feɔ ejurɔ lɛ, efee kɛ tsui krɔŋŋ; mɔ ni yeɔ onukpa lɛ, ebɔ mɔdɛŋ; mɔ ni naa mɔbɔ lɛ, efee kɛ tsuijurɔ.

Jeŋba ni sa Nyɔŋmɔ hiɛ

⁹ Suɔmɔ lɛ osato akahi mli. Nyɛhia efɔŋ kwraa; nyɛ kpɛtɛa ekpakpa he;

¹⁰ nyɛkɛ nyɛmimɛi asuɔmɔ ni mli wa asumɔsumɔa nyɛhe; mɔ fɛɛ mɔ atsɔ̃ hiɛ ekɛ woo ahã enaanyo.

¹¹ Nyɛmɔdɛŋbɔɔ lɛ naa akabaa shi; nyɛmumɔ lɛ he adɔa la; nyɛsɔ̃mɔa Nuŋtsɔ lɛ.

¹² Nyɛnyãa yɛ hiɛnɔkãmɔ mli; nyɛmiaa nyɛhiɛ yɛ amanehulu mli; nyɛhiɛa sɔlemɔ mli daa.

¹³ Nyɛhãa mɛi krɔŋkrɔŋi lɛ ahiamɔ lɛ afea nyɛ hu nyɛhiamɔ; nyɛbɔa gbɔfeemɔ he mɔdɛŋ.

¹⁴ Nyɛjɔa mɛi ni waa nyɛ yi lɛ, nyɛjɔa ni nyɛkalomɔa.

¹⁵ Nyɛkɛ mɛi ni nyãa lɛ anyãa, ni nyɛkɛ mɛi ni foɔ lɛ afoa.

¹⁶ Nyɛjwɛŋjwɛŋa nyɛhe jwɛŋmɔ kome; nyɛkajwɛŋa henɔwomɔ jwɛŋmɔ, shi moŋ nyɛkɛ heshibalɔi lɛ abɔa. Nyɛkabua nyɛhe nilelɔi.

¹⁷ Nyɛkɛ efɔŋ akatoa mɔ ko mɔ ko efɔŋ najiaŋ; nyɛjwɛŋa nɔ ni yɔɔ fɛo yɛ gbɔmɛi fɛɛ ahiɛ nyɛtoa.

¹⁸ Kɛ aaaho lɛ nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.

¹⁹ Suɔlɔi, nyɛkatɔa nyɛ diɛŋtsɛ nyɛhe owele, shi moŋ nyɛŋmɛa Nyɔŋmɔ mlifu lɛ gbɛ; ejaakɛ aŋma akɛ, “Minɔ ji oweletɔɔ, mi mato najiaŋ, Nuŋtsɔ lɛ kɛɛ.”

²⁰ No hewɔ lɛ, kɛji hɔ̃mɔ miiye ohenyɛlɔ lɛ, hã lɛ nii eye; kɛji kumai miiye lɛ lɛ, hã lɛ nu enu; ejaakɛ kɛ ofee nakai lɛ, obaabua ŋai kɛ la naa oshwie eyiteŋ.

²¹ Kaahã efɔŋ miiye onɔ kunim, shi moŋ okɛ ekpakpafeemɔ aye efɔŋ nɔ kunim.