Romabii 11 - ŊMALƐ KRƆŊKRƆŊ LƐ

Nyɔŋmɔ mɔbɔnalɛ yɛ ha Israel lolo

¹ Agbɛnɛ miibi akɛ, “Belɛ Nyɔŋmɔ eshɛ emaŋ lɛ efɔ̃?” Dabida! Ejaakɛ mi hu Israelnyo ji mi, ni mijɛ Abraham shwiei kɛ Benyamin akutso lɛ mli.

² Nyɔŋmɔ shɛko emaŋ ni ele eto momo lɛ efɔ̃ko. Aloo nyɛleee nɔ ni ŋmalɛ lɛ kɛɛ yɛ Elia yi nɔ lɛ, be ni edamɔ Nyɔŋmɔ hiɛ ni efolɔɔ Israel naa akɛ,

³ “Nuŋtsɔ, ogbalɔi lɛ, amɛgbe amɛ, ni ofɔleshãalatɛi lɛ, amɛwule amɛshwie shi, ni eshwɛ mi kome too, ni amɛmiitao mi amɛgbe.”

⁴ Shi mɛɛ hetoo Nyɔŋmɔ hã lɛ? “Mishwɛ hii akpei kpawo ni kɛ amɛnakutsei kulako shi hãko Baal mihã mihe.”

⁵ Nakai nɔŋŋ kɛ̃ amrɔ nɛɛ hu eshwɛ mɛi komɛi yɛ dromɔ halamɔ naa.

⁶ Shi kɛji dromɔ lɛ naa ni lɛ, belɛ jeee nitsumɔi anaa ni dɔŋŋ; ejaakɛ no lɛ dromɔ lɛ jeee dromɔ dɔŋŋ.

⁷ Belɛ te tɛŋŋ? Nɔ ni Israel taoɔ lɛ enine shɛɛɛ nɔ; shi mɛi ni ahala lɛ anine shɛ nɔ, ni mɛi ni eshwɛ lɛ, awaje amɛtsui,

⁸ tamɔ bɔ ni aŋma akɛ, “Nyɔŋmɔ ehã amɛ shɔ̃ɔfeemɔ ko, hiŋmɛii ni amɛkɛnaaa nii, kɛ toii ni amɛkɛnuuu nii kɛbashi ŋmɛnɛ gbi nɛɛ nɔ.”

⁹ Ni David kɛɛ akɛ, “Hã amɛkpɔlɔ lɛ atsɔ̃ akpa kɛ loofɔlɔduu tsɔne kɛ tɛmɔnɔ kɛ toigbalamɔ ahã amɛ.

¹⁰ Hã amɛhiɛ awo duŋ, ni amɛkana nii, ni ohã amɛdɔ kɔmɔɔ daa.”

¹¹ Agbɛnɛ miibi akɛ, “Belɛ amɛtɛrɛ koni amɛgbee shi?” Dabida! Shi moŋ atsɔ̃ amɛshigbeemɔ lɛ nɔ ahere jeŋmaji lɛ ayi wala, koni Israel aye awuŋã.

¹² Shi kɛ amɛshigbeemɔ lɛ tsɔ̃ je lɛ ninamɔ, ni amɛnɔgbɔmɔ lɛ hu tsɔ̃ jeŋmaji aninamɔ lɛ, belɛ amɛyifalɛ lɛ te eeehã ninamɔ lɛ afee tɛŋŋ?

Jeŋmajiaŋbii lɛ ayiwalaheremɔ

¹³ Agbɛnɛ nyɛ ni nyɛ ji jeŋmajiabii lɛ, miikɛɛ nyɛ akɛ, “Gbii abɔ ni mi mi ji jeŋmaji abɔfo lɛ, mawo misɔ̃ɔmɔ lɛ hiɛ nyam,

¹⁴ akɛ aleenɔ mikɛaahã mijakubii lɛ aye awuŋã, ni mahere amɛteŋ mɛi komɛi ayiwala lo.

¹⁵ Ejaakɛ kɛ amɛshɛmɔkɛfɔ̃ɔ lɛ ehã Nyɔŋmɔ kɛ je lɛ ekpãtã lɛ, belɛ amɛheremɔ lɛ, ani jeee wala ni jɛ gbohii ateŋ ni?

¹⁶ “Shi kɛji fioo ni ajie ahã Nyɔŋmɔ lɛ yɛ krɔŋkrɔŋ lɛ, belɛ nakai masui lɛ fɛɛ hu yɔɔ; ni kɛ tso shishifã lɛ yɛ krɔŋkrɔŋ lɛ, belɛ nakai niji lɛ hu yɔɔ.

¹⁷ Shi kɛji akumɔ tso niji lɛ ekomɛi, ni abatɛo bo ni oji ŋaŋmutso lɛ yɛ amɛnajiaŋ, ni ona mutso lɛ shishifã lɛ kɛ emlinu lɛ eko lɛ,

¹⁸ kaashwã yɛ niji lɛ anɔ; shi kɛji oshwã yɛ amɛnɔ lɛ, naa, jeee bo ohiɛ shishifã lɛ, shi shishifã lɛ moŋ hiɛ bo.”

¹⁹ Agbɛnɛ ekolɛ oookɛɛ akɛ, “Kuumɔ akumɔ niji lɛ, bɔ ni afee ni atɛo mi awo tso lɛ mli.”

²⁰ Ojogbaŋŋ! He ni amɛheee amɛyeee hewɔ akumɔ amɛ; ni bo lɛ, hemɔkɛyeli okɛdamɔ shi lɛ. Kaawo ohe nɔ, shi moŋ she ohe gbeyei;

²¹ ejaakɛ, kɛ Nyɔŋmɔ ebaaa tso lɛ diɛŋtsɛ niji lɛ ayi lɛ, bo hu ebaaŋ oyi.

²² No hewɔ lɛ, kwɛmɔ Nyɔŋmɔ mlihilɛ kɛ bɔ ni ekɛ mɔ yeɔ waa hu, ekɛ mɛi ni egbee shi lɛ yeɔ waa, shi bo lɛ, emli hi yɛ onɔ kɛji ohi emlihilɛ lɛ mli lɛ; kɛjeee nakai lɛ, bo hu aaafo bo ashɛ afɔ̃.

²³ Ni amɛ hu, kɛji amɛhiɛɛɛ he ni amɛheee amɛyeee lɛ mli lɛ, aaatɛo amɛ awo mli; ejaakɛ Nyɔŋmɔ aaanyɛ atɛo amɛ awo mli ekoŋŋ.

²⁴ Ejaakɛ, kɛji bo lɛ, fo afo bo yɛ tso ni yɛ bɔɔsu naa lɛ ŋaŋmutso ni lɛ he, ni atɛo bo awo mutso kpakpa lɛ mli, ni jeee adebɔɔ gbɛ ni lɛ, mɛnɛɛmɛi ni ji tso lɛ diɛŋtsɛ niji lɛ, enyiɛ nɔŋŋ ni atɛoŋ amɛ awoŋ amɛ diɛŋtsɛ amɛmutso lɛ mli!

Nyɔŋmɔ kɛ Israel baawo egbɛhe ekoŋŋ

²⁵ Ejaakɛ misumɔɔɔ akɛ mishiuɔ nyɛ nɛkɛ teemɔ sane nɛɛ nɔ, anyɛmimɛi, koni nyɛkabu nyɛhe oleetei, akɛ, wajemɔ awaje Israel tsui fã kɛ fã kɛyashi beyinɔ ni jeŋmaji lɛ fɛɛ aaaba mli.

²⁶ Ni nɛkɛ gbɛ nɔ aaatsɔ̃ ahere Israel fɛɛ yiwala, tamɔ bɔ ni aŋma lɛ akɛ, “Jielɔ lɛ aaajɛ Zion aba ni eeebajie nɔshafeemɔ yɛ Yakob he eshɛ efɔ̃;

²⁷ ni enɛ ji mi kɛ amɛ teŋ kpãŋmɔ lɛ, akɛ majie amɛhe eshai lɛ kɛaatee.”

²⁸ Yɛ Sanekpakpa lɛ gbɛfaŋ lɛ henyɛlɔi ji amɛ yɛ nyɛhewɔ; shi yɛ halamɔ lɛ gbɛfaŋ lɛ asumɔɔ amɛ yɛ tsɛmɛi lɛ ahewɔ.

²⁹ Ejaakɛ Nyɔŋmɔ shwaaa ehe yɛ edromɔ nii lɛ kɛ etsɛmɔ lɛ he.

³⁰ Ejaakɛ tamɔ bɔ ni sa lɛ nyɛ hu nyɛbooo Nyɔŋmɔ toi, shi agbɛnɛ ana nyɛ mɔbɔ yɛ amɛtoigbele lɛ hewɔ lɛ,

³¹ nakai nɔŋŋ kɛ̃ amɛ hu agbɛnɛ amɛtoi egbo, koni bɔ ni ana nyɛ mɔbɔ lɛ, amɛ hu ana amɛ mɔbɔ.

³² Ejaakɛ Nyɔŋmɔ eŋamɔ mɛi fɛɛ ayi ewo toigbele mli, bɔ ni afee ni ena amɛ fɛɛ mɔbɔ.

Nyɔŋmɔ yijiemɔ

³³ Ao, Nyɔŋmɔ nifalɛ kɛ ŋaa kɛ nilee mlikwɔlɛ! Ekojomɔi lɛ anyɛɛɛ shishi ana, ni egbɛi lɛ hu anyɛɛɛ sɛɛ mo aja!

³⁴ Ejaakɛ “Namɔ le Nuŋtsɔ lɛ jwɛŋmɔ lɛ, Aloo namɔ ewo lɛ ŋaa pɛŋ?

³⁵ Aloo namɔ etsɔ̃ hiɛ ehã lɛ nɔ ko, ni kulɛ aaato lɛ najiaŋ?”

³⁶ Ejaakɛ edɛŋ nii fɛɛ jɛ, ni enɔ amɛtsɔ̃ kɛba, ni lɛ nɔŋŋ amɛyɔɔ amɛhã. Lɛ aaaŋɔ anunyam ahã kɛya naanɔ. Amen!