Kpojiemɔ 9 - ŊMALƐ KRƆŊKRƆŊ LƐ

Tɛtɛrɛmantɛrɛ ni ji enumɔ lɛ

¹ Ni bɔfo ni ji enumɔ lɛ kpã etɛtrɛmantrɛ lɛ, ni mina ŋulami ko jɛ ŋwɛi bagbee shikpɔŋ lɛ nɔ, ni akɛ bu kwɔŋkwɔŋ lɛ naa samfee lɛ hã lɛ.

² Ni egbele bu kwɔŋkwɔŋ lɛ naa, ni lasu te shi kɛjɛ bu lɛ mli tamɔ flɔɔnɔɔ kpeteŋkple mli lasu, ni hulu kɛ atatuiaŋ wo duŋ yɛ bu lɛ mli lasu lɛ hewɔ.

³ Ni baalabii jɛ lasu lɛ mli kɛba shikpɔŋ lɛ nɔ; ni ahã amɛ hewalɛ tamɔ hewalɛ ni shikpɔŋ nɔ nyɔŋmɔŋkrakroi yɔɔ lɛ;

⁴ ni akɛɛ amɛ akɛ amɛkafee shikpɔŋ lɛ nɔ jwɛi loo baaŋmɔŋ loo tso ko efɔŋ ko, akɛ ja gbɔmɛi ni bɛ Nyɔŋmɔ naasɔomɔnɔ lɛ okadi yɛ amɛhiɛŋtsei anɔ lɛ kɛkɛ.

⁵ Ni ahãaa amɛ hegbɛ akɛ amɛgbe amɛ, shi moŋ akɛ amɛpiŋ amɛ nyɔji enumɔ. Ni amɛnaajaramɔ tamɔ nyɔŋmɔŋkrakro naajaramɔ, kɛ etsɛ̃ mɔ lɛ.

⁶ Ni nakai gbii lɛ amli lɛ gbɔmɛi aaatao gbele, shi amɛnaŋ, ni amɛaashwe ni amɛgboi, shi gbele aaajo amɛnaa foi.

⁷ Ni baalabii lɛ asubaŋ tamɔ okpɔŋɔi ni asaa ahã ta, ni nibii komɛi fimɔ amɛyitsei tamɔ shika akekrei, ni amɛhiɛiaŋ tamɔ gbɔmɛi ahiɛiaŋ;

⁸ ni amɛyitsɔi tamɔ yei ayitsɔi, ni amɛnyanyɔji tamɔ jatai anɔ;

⁹ ni amɛwo damai tamɔ dade damai, ni amɛfijiaŋ gbɛɛmɔ tamɔ okpɔŋɔ kɛ shwiilii babaoo ni hiɛ foi kɛmiiya ta agbɛɛmɔ.

¹⁰ Ni amɛyɛ leii tamɔ nyɔŋmɔŋkrakroi aleii kɛ amɛnaa gãii, ni amɛyɛ hewalɛ yɛ amɛleii lɛ amli ni amɛkɛaafee gbɔmɛi efɔŋ nyɔji enumɔ.

¹¹ Ni amɛnɔ maŋtsɛ ji bu kwɔŋkwɔŋ lɛ bɔfo lɛ, ni atsɛɔ egbɛi yɛ Hebri wiemɔ lɛ mli akɛ Abadon, ni Hela wiemɔ lɛ mli lɛ atsɛɔ egbɛi akɛ Apolion.

¹² Kpoo kome eho; naa, kpoi enyɔ miiba lolo yɛ nii nɛɛ asɛɛ.

Tɛtɛrɛmantɛrɛ ni ji ekpaa lɛ

¹³ Ni bɔfo ni ji ekpaa lɛ kpã etɛtrɛmantrɛ lɛ, ni minu gbee ko kɛjɛ shika afɔleshãa latɛ ni ma Nyɔŋmɔ hiɛ lɛ akloŋtoi ejwɛ lɛ mli

¹⁴ ni miikɛɛ bɔfo ni ji ekpaa lɛ ni hiɛ tɛtɛrɛmantɛrɛ lɛ akɛ, “Fɛnemɔ bɔfoi ejwɛ lɛ ni afimɔ amɛ yɛ Eufrate Faa kpeteŋkple lɛ naa lɛ!”

¹⁵ Ni afɛne bɔfoi ejwɛ lɛ ni asaa ato ŋmɛlɛtswaa lɛ kɛ gbi lɛ kɛ nyɔŋ lɛ kɛ afi lɛ, koni amɛgbe gbɔmɛi amlijai etɛ̃ mli ekome.

¹⁶ Ni tabilɔi ni tara okpɔŋɔi anɔ lɛ ayibɔ ji akpe toi akpei ohai enyɔ; minu amɛyibɔ lɛ.

¹⁷ Ni bɔ ni mina okpɔŋɔi lɛ kɛ amɛnɔtaralɔi lɛ yɛ ninaa lɛ mli nɛ: amɛwo damai ni hiɛ là kɛ safiro kɛ swɔɔ su; ni okpɔŋɔi lɛ ayitsei tamɔ jatai ayitsei, ni là kɛ lasu kɛ swɔɔ fãa kɛjɛɔ amɛdaaŋ.

¹⁸ Nɛkɛ haomɔi etɛ̃ ni ji là kɛ lasu kɛ swɔɔ ni fãa kɛjɛɔ amɛdaaŋ nɛɛ, akɛgbe gbɔmɛi amlijai etɛ̃ mli ekome.

¹⁹ Ejaakɛ okpɔŋɔi lɛ ahewalɛ yɛ amɛdaaŋ kɛ amɛleii amli, ejaakɛ amɛleii lɛ tamɔ onufui aleii, ni yitsei yɛ he, ni nomɛi amɛkɛfeɔ efɔŋ.

²⁰ Ni gbɔmɛi ni shwɛ ni nɛkɛ haomɔi nɛɛ egbeee amɛ lɛ, amɛtsakeee amɛtsui yɛ amɛdiɛŋtsɛ amɛnine naa nitsumɔi lɛ ahe. Amɛfɔ̃ɔɔ mumɔi fɔ̃ji kɛ shika kɛ jwiɛtɛi kɛ ayawa kɛ tɛ kɛ tso amãgãi ni nyɛɛɛ amɛna nii loo amɛnu nii loo amɛnyiɛ lɛ ajamɔ.

²¹ Ni asaŋ amɛtsakeee amɛtsui yɛ amɛgbɔmɔgbee kɛ amɛsuu kɛ amɛjwamaŋbɔɔ kɛ amɛjuu lɛ ahe.