Kpojiemɔ 8 - ŊMALƐ KRƆŊKRƆŊ LƐ

Naasɔomɔnɔ ni ji kpawo lɛ

¹ Ni be ni etse naasɔomɔnɔ ni ji kpawo lɛ, afee diŋŋ yɛ ŋwɛi aaafee ŋmɛlɛtswaa fã.

² Ni mina bɔfoi kpawo lɛ ni damɔ Nyɔŋmɔ hiɛ lɛ, ni akɛ tɛtrɛmantrɛi kpawo hã amɛ.

³ Ni bɔfo kroko ba ni ebadamɔ afɔleshãa latɛ lɛ he, ni ehiɛ shika tsofakɛŋma shãanɔ, ni akɛ tsofakɛŋma babaoo hã lɛ, koni ekɛfata krɔŋkrɔŋbii lɛ fɛɛ asɔlemɔi lɛ ahe yɛ shika afɔleshãa latɛ lɛ ni ma maŋtsɛ sɛ̃i lɛ hiɛ lɛ nɔ.

⁴ Ni tsofakɛŋma lɛ lasu lɛ te shi yɛ Nyɔŋmɔ hiɛ kɛjɛ bɔfo lɛ dɛŋ, ni krɔŋkrɔŋbii lɛ asɔlemɔi lɛ fata he.

⁵ Ni bɔfo lɛ kɔ tsofakɛŋma shãanɔ lɛ, ni eje efɔleshãa latɛ lɛ nɔ la lɛ eko ewo lɛ obɔ̃, ni etsi eshwie shikpɔŋ lɛ nɔ, ni nyɔŋmɔshiimɔi kɛ gbɛɛmɔi kɛ srawagbalamɔi kɛ shikpɔŋhosomɔ ba.

Tɛtɛrɛmantɛrɛi ejwɛ lɛ

⁶ Ni bɔfoi kpawo lɛ ni hiɛ tɛtɛrɛmantɛrɛi kpawo lɛ saa amɛhe koni amɛkpã.

⁷ Ni klɛŋklɛŋ bɔfo lɛ kpã etɛtrɛmantrɛ, ni nyɔŋmɔŋtɛ kɛ la ni lá futu mli ba ni ebashwie shikpɔŋ lɛ nɔ, ni shikpɔŋ lɛ mlijai etɛ̃ mli ekome shã, ni tsei amlijaa etɛ̃ mli ekome shã, ni jwɛi fɔ fɛɛ shã.

⁸ Ni bɔfo ni ji enyɔ lɛ kpã etɛtrɛmantrɛ, ni ashɛ nɔ ko ni tamɔ gɔŋ kpeteŋkple ni shãa kɛ la afɔ̃ ŋshɔŋ, ni ŋshɔ lɛ mlijai etɛ̃ mli ekome tsɔ̃ lá.

⁹ Ni ŋshɔ lɛ mli bɔɔnii ni yɔɔ wala lɛ amlijai etɛ̃ mli ekome gboi, ni lɛji lɛ amlijai etɛ̃ mli ekome fite.

¹⁰ Ni bɔfo ni ji etɛ̃ lɛ kpã etɛtrɛmantrɛ, ni ŋulami kpeteŋkple ni tsoɔ tamɔ haa jɛ ŋwɛi bagbee shi, ni egbee fai lɛ amlijai etɛ̃ mli ekome kɛ nubui lɛ anɔ.

¹¹ Ni ŋulami lɛ gbɛi ji taatso, ni nui lɛ amlijai etɛ̃ mli ekome tsɔ̃ taatso ni gbɔmɛi pii gboi yɛ nui lɛ ahewɔ, ejaakɛ amɛmiijoo.

¹² Ni bɔfo ni ji ejwɛ lɛ kpã etrɛtrɛmantrɛ, ni atswa hulu mlijai etɛ̃ mli ekome kɛ nyɔɔŋtsere mlijai etɛ̃ mli ekome kɛ ŋulamii amlijai etɛ̃ mli ekome nɔ, amɛmlijai etɛ̃ mli ekomekome lɛ wo duŋ, ni shwane mlijai etɛ̃ mli ekome lɛ jeŋ tseee ni nyɔɔŋ hu nakai nɔŋŋ.

¹³ Ni mikwɛ, ni minu okropɔŋ ko miifiliki yɛ ŋwɛi kɛ shikpɔŋ teŋ, ni ekɛ gbee ni wa kɛɛ, “Kpoo! Kpoo! Kpoo hã mɛi ni yɔɔ shikpɔŋ lɛ nɔ lɛ yɛ bɔfoi etɛ̃ ni eshwɛ lɛ atɛtrɛmantrɛi ni amɛbaakpã lɛ agbɛɛmɔi lɛ ahewɔ!”