Kpojiemɔ 7 - ŊMALƐ KRƆŊKRƆŊ LƐ

Israelbii akpei oha kɛ nyɔŋmai ejwɛ kɛ ejwɛ lɛ

¹ Nii nɛɛ asɛɛ lɛ mina ŋwɛi bɔfoi ejwɛ damɔ shikpɔŋ koji ejwɛ lɛ anɔ, ni amɛhiɛ shikpɔŋ lɛ nɔ kɔɔyɔi ejwɛ lɛ amli, koni kɔɔyɔɔ ko akatswa yɛ shikpɔŋ lɛ nɔ loo ŋshɔ nɔ loo tso ko nɔ.

² Ni mina bɔfo kroko miikwɔ kɛmiijɛ hulu shiteehe kɛmiiba, ni ehiɛ Nyɔŋmɔ hiɛkãalɔ lɛ naasɔomɔnɔ, ni ebo kɛ gbee ni wa ekɛɛ bɔfoi ejwɛ lɛ ni ahã amɛ hegbɛ akɛ amɛfee shikpɔŋ lɛ kɛ ŋshɔ lɛ efɔŋ lɛ

³ akɛ, “Nyɛkafea shikpɔŋ lɛ loo ŋshɔ lɛ loo tsei lɛ efɔŋ ko kɛyashi beyinɔ ni wɔkɛ naasɔomɔnɔ aaakadi wɔNyɔŋmɔ lɛ tsuji lɛ ahiɛŋtsei anɔ dã.”

⁴ Ni minu mɛi ni akɛ naasɔomɔnɔ lɛ ekadi amɛ lɛ ayibɔ: Mɛi akpei oha kɛ nyɔŋmai ejwɛ kɛ ejwɛ ni akɛ naasɔomɔnɔ ekadi amɛ kɛjɛ Israelbii lɛ akutso fɛɛ akutso mli:

⁵ Yuda akutso lɛ mli lɛ akɛ naasɔomɔnɔ lɛ kadi mɛi akpei nyɔŋma kɛ enyɔ; Ruben akutso lɛ mli lɛ mɛi akpei nyɔŋma kɛ enyɔ; Gad akutso lɛ mli lɛ mɛi akpei nyɔŋma kɛ enyɔ;

⁶ Asher akutso lɛ mli lɛ mɛi akpei nyɔŋma kɛ enyɔ; Naftali akutso lɛ mli lɛ mɛi akpei nyɔŋma kɛ enyɔ; Manase akutso lɛ mli lɛ mɛi akpei nyɔŋma kɛ enyɔ;

⁷ Simeon akutso lɛ mli lɛ mɛi akpei nyɔŋma kɛ enyɔ; Levi akutso lɛ mli lɛ mɛi akpei nyɔŋma kɛ enyɔ; Isakar akutso lɛ mli lɛ mɛi akpei nyɔŋma kɛ enyɔ;

⁸ Zebulon akutso lɛ mli lɛ mɛi akpei nyɔŋma kɛ enyɔ; Yosef akutso lɛ mli lɛ mɛi akpei nyɔŋma kɛ enyɔ; Benyamin akutso lɛ mli lɛ mɛi akpei nyɔŋma kɛ enyɔ.

Asafo kpele lɛ

⁹ Nii nɛɛ asɛɛ lɛ mikwɛ, ni naa, asafo kpele ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ maji anɔ wiemɔi amli damɔ maŋtsɛ sɛ̃i lɛ hiɛ kɛ Toobi lɛ hiɛ, ni amɛwo atadei yɛji, ni amɛhiɛ blɛoi yɛ amɛdɛŋ,

¹⁰ ni amɛbolɔ kɛ gbee ni wa amɛkɛɛ, “Yiwalaheremɔ lɛ ji wɔNyɔŋmɔ ni ta maŋtsɛ sɛ̃i lɛ nɔ lɛ, kɛ Toobi lɛ nɔ!”

¹¹ Ni bɔfoi lɛ fɛɛ damɔ maŋtsɛ sɛ̃i lɛ kɛ onukpai lɛ kɛ hiɛkãalɔi ejwɛ lɛ ahe kɛkpe, ni amɛja Nyɔŋmɔ

¹² amɛkɛɛ, “Amen! Jɔɔmɔ kɛ anunyam kɛ nilee kɛ shidaa kɛ woo kɛ hewalɛ kɛ nyɛmɔ ahã wɔNyɔŋmɔ lɛ kɛya naanɔi anaanɔ. Amen!”

¹³ Ni onukpai lɛ ateŋ mɔ kome bi mi akɛ, “Mɛi ni wo atadei yɛji nɛɛ, namɛi ni, ni nɛgbɛ amɛjɛ?”

¹⁴ Ni mikɛɛ lɛ akɛ, “Minuŋtsɔ, bo ole” Ni ekɛɛ mi akɛ, “Mɛnɛɛmɛi ji mɛi ni jɛ amanehulu kpeteŋkple lɛ mli lɛ, ni amɛfɔ amɛtadei lɛ ahe, ni amɛhã eyɛ futaa yɛ Toobi lɛ lá lɛ mli.

¹⁵ No hewɔ ni amɛyɔɔ Nyɔŋmɔ maŋtsɛ sɛ̃i lɛ hiɛ, ni amɛjaa lɛ nyɔɔŋ kɛ shwane yɛ eSɔlemɔtsu lɛ mli lɛ; ni mɔ ni ta maŋtsɛsɛi lɛ nɔ lɛ aaashi ebuu lɛ eto amɛnɔ.

¹⁶ Hɔ̃mɔ yeŋ amɛ dɔŋŋ, ni kumai hu yeŋ amɛ dɔŋŋ, ni asaŋ hulu eshaŋ amɛ ni latsaa ko etsaŋ amɛ dɔŋŋ;

¹⁷ ejaakɛ Toobi lɛ ni yɔɔ maŋtsɛ sɛ̃i lɛ teŋ lɛ aaalɛ amɛ, ni eeetsɔ̃ɔ amɛ gbɛ kɛaatee wala nubui ahe. Ni Nyɔŋmɔ aaatsumɔ amɛhiɛiaŋ yaafonui fɛɛ.”