Kpojiemɔ 6 - ŊMALƐ KRƆŊKRƆŊ LƐ

Naasɔomɔi lɛ

¹ Ni mina akɛ Toobi lɛ tse naasɔomɔi kpawo lɛ ekome; ni minu ni hiɛkãalɔi ejwɛ lɛ ateŋ mɔ kome kɛ gbee ni tamɔ nyɔŋmɔshimɔ gbee kɛɛ, “Ba!”

² Ni mikwɛ, ni naa, okpɔŋɔ yɛŋ, ni mɔ ni ta enɔ lɛ hiɛ gãi, ni ahã lɛ akekre, ni eje kpo tamɔ kunimyelɔ ni miiya eyaye kunim.

³ Ni be ni etse naasɔomɔ ni ji enyɔ lɛ, minu ni hiɛkãalɔ ni ji enyɔ lɛ kɛɛ, “Ba!”

⁴ Ni okpɔŋɔ kroko ni tsuɔ je kpo, ni mɔ ni ta enɔ lɛ, ahã lɛ hegbɛ ni ejie hejɔlɛ kɛjɛ shikpɔŋ lɛ nɔ koni mɛi agbegbee amɛhe, ni ahã lɛ klante kpeteŋkple ko.

⁵ Ni be ni etse naasɔomɔ ni ji etɛ̃ lɛ, minu ni hiɛkãalɔ ni ji etɛ̃ lɛ kɛɛ, “Ba!” Ni mikwɛ, ni naa, okpɔŋɔ diŋ ni mɔ ni ta enɔ lɛ hiɛ nsɛni yɛ edɛŋ.

⁶ Ni minu gbee ko yɛ hiɛkãalɔi ejwɛ lɛ ateŋ miikɛɛ, “Ŋmaa susumɔnɔ kome denario, ni abele susumɔnii etɛ̃ denario; ni mu kɛ wain lɛ kaata he!”

⁷ Ni be ni etse naasɔomɔ ni ji ejwɛ lɛ, minu hiɛkãalɔ ni ji ejwɛ lɛ gbee miikɛɛ, “Ba!”

⁸ Ni mikwɛ, ni naa, okpɔŋɔ lamlulamlu ni mɔ ni ta enɔ lɛ gbɛi ji Gbele, ni Gbohiiaje nyiɛ esɛɛ kpaakpa. Ni ahã amɛ hegbɛ yɛ shikpɔŋ lɛ mlijai ejwɛ mli ekome nɔ, akɛ amɛkɛ klante kɛ hɔ̃mɔ kɛ gbele hela kɛ shikpɔŋ lɛ nɔ kooloi awuyelɔi agbegbee amɛ.

⁹ Ni be ni etse naasɔomɔ ni ji enumɔ lɛ, mina mɛi ni agbe yɛ Nyɔŋmɔ wiemɔ lɛ kɛ odase ni amɛye lɛ hewɔ lɛ asusumai yɛ afɔleshãa latɛ lɛ shishi.

¹⁰ Ni amɛbolɔ kɛ gbee ni wa akɛ, “Nuŋtsɔ Nyɔŋmɔ, mɔ krɔŋkrɔŋ kɛ anɔkwafo, mɛɛ beyinɔ po oookojo ni oootɔ wɔla lɛ he owele yɛ mɛi ni yɔɔ shikpɔŋ lɛ nɔ lɛ anɔ?”

¹¹ Ni akɛ atade yɛŋ hã amɛteŋ mɔ fɛɛ mɔ, ni akɛɛ amɛ akɛ amɛjɔɔ amɛhe be fioo ko lolo, kɛyashi beyinɔ ni amɛnanemɛi tsuji lɛ kɛ amɛnyɛmimɛi lɛ hu ni abaagbe amɛ tamɔ bɔ ni agbe amɛ diɛŋtsɛ hu lɛ ayikulɛ lɛ aaashɛ.

¹² Ni mina be ni etse naasɔomɔ ni ji ekpaa lɛ, ni naa, shikpɔŋ hoso waa, ni hulu tsɔ ediŋ tamɔ kpekpe ni akɛ yitsɔi fee, ni nyɔɔŋtsere muu lɛ tsɔ̃ tamɔ lá;

¹³ ni ŋwɛi ŋulamii lɛ tserɛ shwie shikpɔŋ tamɔ bɔ ni agbãmitso yi agbãmii ŋmilikitii tserɛɔ shwieɔ shi kɛ kɔɔyɔɔ kpeteŋkple hoso agbãmitso lɛ.

¹⁴ Ni ŋwɛi tsi ehe kɛtee sɛɛ tamɔ wolo ni aakota; ni atsirɛ gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ kɛje egbɛhe.

¹⁵ Ni shikpɔŋ lɛ nɔ maŋtsɛmɛi lɛ kɛ mɛi ni ji lumɛi lɛ kɛ asafoiatsɛmɛi lɛ kɛ niiatsɛmɛi lɛ kɛ hewalɔi lɛ kɛ nyɔji fɛɛ kɛ mɛi krokomɛi fɛɛ yateetee amɛhe yɛ bui amli kɛ gɔji atɛsai amli,

¹⁶ ni amɛkɛɛ gɔji lɛ kɛ tɛsai lɛ akɛ, “Nyɛbagbea wɔnɔ ni nyɛtea wɔnɔ ni wɔkana mɔ ni ta maŋtsɛ sɛ̃i lɛ nɔ lɛ hiɛ kɛ Toobi lɛ mlifu lɛ!

¹⁷ Ejaakɛ emlifu gbi wulu lɛ eshɛ, ni namɔ aaanyɛ shi adamɔ?”