Kpojiemɔ 5 - ŊMALƐ KRƆŊKRƆŊ LƐ

Wolo ni asɔo naa lɛ

¹ Ni mina wolo ko yɛ mɔ ni ta maŋtsɛ sɛi lɛ nɔ lɛ ninejurɔ, ni aŋma nii yɛ emli kɛ esɛɛ fɛɛ, ni asɔo naa kɛ naasɔomɔi kpawo.

² Ni mina bɔfo hewalɔ ko miishiɛ kɛ gbee wulu akɛ, “Namɔ ji mɔ ni sa akɛ egbele wolo lɛ naa ni etserɛ enaasɔomɔi lɛ?”

³ Ni anãaa mɔ ko mɔ ko yɛ ŋwɛi loo shikpɔŋ lɛ nɔ loo shikpɔŋ lɛ shishi ni aaanyɛ wolo lɛ naa agbele loo mli akwɛ.

⁴ Ni mifo aahu, ejaakɛ anãaa mɔ ko mɔ ko ni sa akɛ egbele wolo lɛ naa loo ekwɛ mli.

⁵ Ni onukpai lɛ ateŋ mɔ kome kɛɛ mi akɛ, “Kaafo! Naa, jata lɛ ni jɛ Yuda akutso lɛ mli lɛ, mɔ ni ji David shishifã lɛ, eye kunim ni ebaanyɛ egbele wolo lɛ naa ní etserɛ enaasɔomɔi kpawo lɛ.”

⁶ Ni mikwɛ, ni naa, maŋtsɛ sɛ̃i lɛ kɛ hiɛkãalɔi ejwɛ lɛ teŋ kɛ onukpai nyɔŋmai enyɔ kɛ ejwɛ lɛ teŋ lɛ, Toobi ko damɔ shi tamɔ nɔ ni agbe lɛ, ni eyɛ akloŋtoi kpawo kɛ hiŋmɛii kpawo ni ji Nyɔŋmɔ mumɔi kpawo lɛ ni atsu kɛtee shikpɔŋ lɛ fɛɛ nɔ lɛ.

⁷ Ni eba ni ebahe wolo lɛ yɛ mɔ ni ta maŋtsɛ sɛ̃i lɛ nɔ lɛ ninejurɔ.

Mɛi ni akpɔ̃ amɛ lɛ alala hee

⁸ Ni be ni ehe wolo lɛ, hiɛkãalɔi ejwɛ lɛ kɛ onukpai nyɔŋmai enyɔ kɛ ejwɛ lɛ ho gbee shi yɛ Toobi lɛ hiɛ, ni amɛteŋ mɔ fɛɛ mɔ hiɛ saŋku kɛ shika tɔi kɛ amɛmli tsofaikɛŋma obɔ̃bɔ̃ ni ji krɔŋkrɔŋbii lɛ asɔlemɔi lɛ.

⁹ Ni amɛla lala hee ko amɛkɛɛ, “Osa akɛ oheɔ wolo lɛ ni otserɛɔ enaasɔomɔi lɛ, ejaakɛ agbe bo, ni okɛ olá lɛ ekpɔ̃ mɛi ehã Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ jeŋmaŋ fɛɛ jeŋmaŋ mli.

¹⁰ Ni okɛ amɛ efee maŋtsɛmɛi kɛ osɔfoi ohã wɔNyɔŋmɔ lɛ, ni amɛaaye maŋtsɛ yɛ shikpɔŋ lɛ nɔ.”

Ŋwɛi asafo muu lɛ fɛɛ lala

¹¹ Ni mikwɛ, ni minu bɔfoi pii ni ebɔle maŋtsɛ sɛ̃i lɛ kɛ hiɛkãalɔi lɛ kɛ onukpai lɛ kɛkpe lɛ agbee, ni amɛyibɔ huuhai abɔ kɛ akpe toi abɔ

¹² ni amɛkɛ gbee wulu kɛɛ akɛ, “Toobi ni agbe lɛ sa hewalɛ kɛ nifalɛ kɛ nilee kɛ nyɛmɔ kɛ woo kɛ anunyam kɛ jɔɔmɔ.”

¹³ Ni minu ni bɔɔnii fɛɛ ni yɔɔ ŋwɛi kɛ shikpɔŋ lɛ nɔ kɛ shikpɔŋ lɛ shishi kɛ ŋshɔ hiɛ kɛ nii fɛɛ ni yɔɔ amɛmli lɛ kɛɛ akɛ, “Jɔɔmɔ kɛ woo kɛ anunyam kɛ nɔyeli ahã mɔ ni ta maŋtsɛ sɛi lɛ nɔ lɛ kɛ Toobi lɛ kɛya naanɔi anaanɔ!”

¹⁴ Ni hiɛkãalɔi ejwɛ lɛ kɛɛ “Amen!” Ni onukpai lɛ ho gbee shi, ni amɛja.