Kpojiemɔ 4 - ŊMALƐ KRƆŊKRƆŊ LƐ

Jamɔ yɛ ŋwɛi

¹ Nii nɛɛ asɛɛ lɛ mikwɛ, ni naa, shinaa ko ni agbele yɛ ŋwɛi; ni klɛŋklɛŋ gbee ni minu ni tamɔ tɛtɛrɛmantɛrɛ ni kɛ mi wie lɛ kɛɛ, “Kwɔɔ kɛba biɛ nɛɛ, ni matsɔ̃ɔ bo nii ni sa akɛ aba mli yɛ nii nɛɛ asɛɛ.”

² Kɛkɛ lɛ amrɔ lɛ mumɔ lɛ yi minɔ; ni naa, maŋtsɛ sɛ̃i ko ma shi yɛ ŋwɛi, ni mɔ ko ta maŋtsɛ sɛ̃i lɛ nɔ.

³ Ni mɔ ni ta nɔ lɛ, kɛ aakwɛ lɛ lɛ, etamɔ yaspi kɛ sardio, ni kwaabuɛtɛ ebɔle maŋtsɛ sɛ̃i lɛ, ni kɛ aakwɛ lɛ, etamɔ smaragdo.

⁴ Ni maŋtsɛ sɛ̃i lɛ he lɛ maŋtsɛ sɛ̃ii nyɔŋmai enyɔ kɛ ejwɛ mamɔ shi kɛkpe, ni onukpai nyɔŋmai enyɔ kɛ ejwɛ tara sɛ̃ii lɛ anɔ; amɛwo atadei yɛji, ni shika akekrei fimɔ amɛyitsei.

⁵ Ni srawai kɛ gbɛɛmɔi kɛ nyɔŋmɔshimɔi jɛ maŋtsɛ sɛ̃i lɛ mli, ni la hai kpawo ni tsoɔ ni ji Nyɔŋmɔ mumɔi kpawo lɛ yɛ maŋtsɛ sɛ̃i lɛ hiɛ.

⁶ Ni nɔ ko tamɔ ashwishwɛ ŋshɔ ni tamɔ kristalo yɛ maŋtsɛ sɛ̃i lɛ hiɛ. Ni hiɛkãalɔi ejwɛ ni hiŋmɛii eyimɔ amɛhiɛ kɛ amɛsɛɛ obɔ̃bɔ̃ yɛ maŋtsɛ sɛ̃i lɛ hiɛ kɛ ehewɔ.

⁷ Klɛŋklɛŋ hiɛkãalɔ lɛ tamɔ jata, ni hiɛkãalɔ ni ji enyɔ lɛ tamɔ tsina, ni hiɛkãalɔ ni ji etɛ̃ lɛ hiɛ tamɔ gbɔmɔ, ni hiɛkãalɔ ni ji ejwɛ lɛ tamɔ okropɔŋ ni miifiliki.

⁸ Ni hiɛkãalɔi ejwɛ lɛ ateŋ mɔ fɛɛ mɔ yɛ fiji ekpaa, ni amɛhewɔ kɛ amɛmli eyimɔ obɔ̃bɔ̃ kɛ hiŋmɛii, ni amɛjɔɔɔ amɛhe nyɔɔŋ kɛ shwane ni amɛkɛɔ akɛ, “Krɔŋkrɔŋ, krɔŋkrɔŋ, krɔŋkrɔŋ ji Nuŋtsɔ Nyɔŋmɔ Ofe lɛ, mɔ ni yɛ momo lɛ kɛ mɔ ni yɔɔ lɛ kɛ mɔ ni baaba lɛ.”

⁹ Ni be ni hiɛkãalɔi lɛ ŋɔɔ anunyam kɛ agbojee kɛ shidaa amɛhãa mɔ ni ta maŋtsɛ sɛ̃i lɛ nɔ ni ehiɛ kã kɛyaa naanɔi anaanɔ lɛ,

¹⁰ onukpai nyɔŋmai enyɔ kɛ ejwɛ lɛ hoɔ gbeɔ shi yɛ mɔ ni ta maŋtsɛ sɛ̃i lɛ nɔ lɛ hiɛ, ni amɛjaa mɔ ni hiɛ kã kɛyaa naanɔi anaanɔ lɛ, ni amɛshɛrɛɔ amɛkekrei lɛ amɛshwieɔ maŋtsɛ sɛ̃i lɛ hiɛ amɛkɛɔ akɛ,

¹¹ “WɔNuŋtsɔ kɛ wɔNyɔŋmɔ, osa akɛ oŋɔ anunyam kɛ woo kɛ hewalɛ lɛ, ejaakɛ bo obɔ nii fɛɛ, ni osuɔmɔ naa abɔ amɛ ni amɛyɔɔ wala.”