Kpojiemɔ 3 - ŊMALƐ KRƆŊKRƆŊ LƐ

Sarde asafo lɛ

¹ “Ni Sarde asafo lɛ bɔfo lɛ; ŋmaa oyahã lɛ akɛ, ‘Nii ni mɔ ni yɔɔ Nyɔŋmɔ mumɔi kpawo lɛ kɛ ŋulamii kpawo lɛ kɛɛ nɛ: Mile onitsumɔi lɛ; mile akɛ ohiɛ gbɛi akɛ ohiɛ kã, shi ogbo.

² Ohiɛ atsɛ̃, ni owaje nii ni eshwɛ ni heɔ agboi lɛ. Ejaakɛ minako onitsumɔi lɛ akɛ amɛye emuu yɛ miNyɔŋmɔ lɛ hiɛ.

³ No hewɔ lɛ, kaimɔ nɔ ni ona ni onu lɛ, ni oye nɔ, ni otsake otsui. Shi kɛ ohiɛ etsɛ̃ɛɛ lɛ, maba tamɔ julɔ, ni oleŋ nɔ ŋmɛlɛtswaa nɔ ni maba onɔ kwraa.

⁴ Shi kɛ̃lɛ oyɛ mɛi fioo ko yɛ Sarde, mɛi ni woko amɛtadei lɛ amuji; ni amɛkɛ mi baanyiɛ yɛ atadei yɛji amli, ejaakɛ amɛsa nakai.

⁵ Kunimyelɔ lɛ aaawo lɛ atadei yɛji, ni migbeŋ egbɛi yɛ wala wolo lɛ mli gbi ko gbi ko, ni magba mli matsi egbɛi tã yɛ miTsɛ hiɛ kɛ ebɔfoi lɛ ahiɛ.

⁶ “Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ.”

Filadelfia asafo lɛ

⁷ “Ni Filadelfia asafo lɛ bɔfo lɛ; ŋmaa oyahã lɛ akɛ, “Nii ni mɔ krɔŋkrɔŋ lɛ, anɔkwafo lɛ, mɔ ni hiɛ David samfee lɛ, mɔ ni gbeleɔ ni mɔ ko ŋaaa, ni eŋaa hu ni mɔ ko gbeleee lɛ kɛɛ nɛ,

⁸ Mile onitsumɔi lɛ; naa, mikɛ shinaa ni agbele ema ohiɛ ni mɔ ko nyɛŋ aŋa; ejaakɛ hewalɛ fioo oyɔɔ shi oye miwiemɔ lɛ nɔ, ni okwako migbɛi lɛ.

⁹ Naa, mikɛ mɛi ni jɛ Satan kpeehe lɛ ni kɛɔ akɛ Yudafoi ji amɛ shi ebɛ mli, shi malemɔ moŋ amɛmaleɔ lɛ aaaba ni amɛbakoto onaji anaa, ni amɛle akɛ mi lɛ miisumɔ bo.

¹⁰ Ejaakɛ oye miwiemɔ ni kɛɔ akɛ, ‘Miamɔ ohiɛ’ lɛ nɔ hewɔ lɛ, mi hu mato bo shweshweeshwe yɛ kaa ŋmɛlɛtswaa ni baaba jeŋ muu lɛ fɛɛ nɔ ni akɛbaaka mɛi ni yɔɔ shikpɔŋ lɛ nɔ lɛ mli.

¹¹ Naa, miiba nɔŋŋ; hiɛmɔ nɔ ni oyɔɔ lɛ mli ni awa, koni mɔ ko akashɔ̃ okekre lɛ!

¹² Kunimyelɔ lɛ, mafee lɛ akulashiŋ yɛ miNyɔŋmɔ lɛ Sɔlemɔtsu lɛ mli, ni ejeŋ kpo dɔŋŋ. Ni maŋma miNyɔŋmɔ lɛ gbɛi, kɛ miNyɔŋmɔ lɛ maŋ ni ji Yerusalɛm hee ni jɛɔ ŋwɛi kpelekeɔ shi kɛjɛɔ miNyɔŋmɔ lɛ ŋɔɔ lɛ gbɛi kɛ mi diɛŋtsɛ migbɛi hee lɛ yɛ enɔ.

¹³ Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ.”

Laodikea asafo lɛ

¹⁴ “Ni Laodikea asafo lɛ bɔfo lɛ; ŋmaa oyahã lɛ akɛ, “Nii ni Amen lɛ ni ji odasefonyo anɔkwafo lɛ kɛ anɔkwayelɔ lɛ kɛ Nyɔŋmɔ nibɔɔ lɛ shishijee lɛ kɛɛ nɛ,

¹⁵ Mile onitsumɔi lɛ; mile akɛ obɛ ŋanii ni obɛ klakla hu. Mina ni kulɛ ofee ŋanii loo ofee klakla!

¹⁶ Shi nɛkɛ nɛɛ, akɛni kulɔkulɔ oyɔɔ ni obɛ ŋanii ni obɛ klakla hu hewɔ lɛ, mibafɛ̃ bo yɛ midaaŋ mashwie.

¹⁷ Ejaakɛ okɛɔ akɛ, ‘Niiatsɛ ji mi ni miyɛ nii, ni nɔ ko nɔ ko he ehĩaaa mi.’ Ni oleee akɛ ohao ni onii hu yɛ mɔbɔ ni ohiafo kɛ shwilafo kɛ heyayaitsɛ ji bo.

¹⁸ Miiwo oŋaa akɛ ohe shika ni atsuu he yɛ la mli yɛ miŋɔɔ koni ona nii, kɛ atadei yɛji, koni owo ni oyayaiaŋ hiɛgbele lɛ akakã jaanɔ; ni ohe hiŋmɛi tsofa ni okɛfɔ ohiŋmɛii anɔ koni ona nii.

¹⁹ Mi lɛ, mɛi abɔ ni midɔɔ amɛhe lɛ, mikãa amɛ ni mitsɔseɔ amɛ; no hewɔ lɛ, ohiɛ adɔ ni otsake otsui.

²⁰ Naa, Midamɔ shinaa lɛ naa ni miishi; kɛji mɔ ko nu migbee ni egbele shinaa lɛ, maba eŋɔɔ ni mikɛ lɛ aaabaye nii, ni lɛ hu ekɛ mi aaaye.

²¹ Kunimyelɔ lɛ mahã ekɛ mi ata mimaŋtsɛ sɛi lɛ nɔ tamɔ bɔ nɔŋŋ ni mi hu miye kunim ni mikɛ miTsɛ ta emaŋtsɛ sɛi lɛ nɔ lɛ.

²² “Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ.”