Kpojiemɔ 22 - ŊMALƐ KRƆŊKRƆŊ LƐ

Walanu Faa lɛ kɛ Walatso lɛ

¹ Ni etsɔ̃ɔ mi walanu faa ni hiɛ kpɛlɛɔ tamɔ kristalo ni jɛ Nyɔŋmɔ kɛ Toobi lɛ maŋtsɛ sɛ̃i lɛ mli.

² Ni eblohu lɛ teŋ kɛ faa lɛ biɛ kɛ biɛ lɛ walatso ma shi, ni ewoɔ yibii nyɔŋma kɛ enyɔ, ekome nyɔŋ fɛɛ nyɔŋ nɔ, ni tso lɛ yibai lɛ akɛtsaa jeŋmaji lɛ.

³ Ni musu ko musu ko bɛ dɔŋŋ. Ni Nyɔŋmɔ kɛ Toobi lɛ maŋtsɛ sɛ̃i lɛ aaama maŋ lɛ mli; ni etsuji lɛ aaasɔ̃mɔ lɛ;

⁴ ni amɛaana ehiɛ, ni egbɛi lɛ aaahi amɛhiɛŋtsei anɔ.

⁵ Ni nyɔɔŋ bɛ jɛi, ni kane la loo hulu la he ehiaŋ amɛ, ejaakɛ Nuŋtsɔ Nyɔŋmɔ lɛ aaatso ahã amɛ, ni amɛaaye maŋtsɛ kɛaatee naanɔi anaanɔ.

Yesu baa ni ji enyɔ lɛ

⁶ Ni bɔfo lɛ kɛɛ mi akɛ, “Wiemɔi nɛɛ anɔkwa ni, ni amɛyɛ mli. Ni Nuŋtsɔ ni ji gbalɔi amumɔi lɛ aNyɔŋmɔ lɛ tsu ebɔfo lɛ ni ebatsɔ̃ɔ etsuji nii ni sa akɛ aba nɔŋŋ.”

⁷ “Naa, miiba nɔŋŋ. Ajɔɔ mɔ ni yeɔ nɛkɛ wolo nɛɛ mli gbalɛ wiemɔi lɛ anɔ lɛ.”

⁸ Ni mi, Yohane, ji mɔ ni nu ni na nii nɛɛ. Ni be ni minu ni mina lɛ miho mibu shi ni maja yɛ bɔfo lɛ ni tsɔ̃ɔ mi nii nɛɛ lɛ naji anaa.

⁹ Ni ekɛɛ mi akɛ, “Kwɛ, kaafee nakai! Ejaakɛ bo kɛ onyɛmimɛi lɛ kɛ gbalɔi lɛ kɛ mɛi ni yeɔ nɛkɛ wolo nɛɛ mli wiemɔi lɛ anɔ lɛ anaanyo tsulɔ ji mi. Já Nyɔŋmɔ!”

¹⁰ Ni ekɛɛ mi akɛ, “Kaasɔo nɛkɛ wolo nɛɛ mli gbalɛ wiemɔi lɛ anaa, ejaakɛ be lɛ ebɛŋkɛ.

¹¹ Mɔ ni ejaaa lɛ, eya nɔ efee nii ni ejaaa lɛ; ni mɔ ni ji mujiatsɛ lɛ, eya nɔ ewo ehe muji lɛ; ni mɔ ni ji jalɔ lɛ, eya nɔ efee jalɛnii, ni mɔ ni ji mɔ krɔŋkrɔŋ lɛ, eya nɔ ehi krɔŋkrɔŋ.”

¹² “Naa, miiba nɔŋŋ, ni mihiɛ minyɔmɔwo lɛ kɛmiiba, ni mawo mɔ fɛɛ mɔ nyɔmɔ bɔ ni sa enitsumɔ lɛ.

¹³ Mi ji Alfa lɛ kɛ Omega lɛ, shishijee lɛ kɛ naagbee lɛ, klɛŋklɛŋ mɔ lɛ kɛ naagbee mɔ lɛ.”

¹⁴ Ajɔɔ mɛi ni fɔɔ amɛtadei lɛ ahe, koni amɛna hegbɛ yɛ walatso lɛ he ní amɛtsɔ̃ agboi lɛ amli kɛbote maŋ lɛ mli lɛ.

¹⁵ Shi maŋ lɛ sɛɛ lɛ gbei lɛ kɛ sulɔi lɛ kɛ ajwamãŋbɔlɔi lɛ kɛ gbɔmɔgbelɔi lɛ kɛ amãgãjalɔi lɛ kɛ mɔ fɛɛ mɔ ni sumɔɔ amale ni emaleɔ yɔɔ jɛi.

¹⁶ “Mi Yesu, mitsu mibɔfo lɛ koni ebaye nii nɛɛ ahe odase etsɔ̃ɔ nyɛ yɛ asafoi lɛ amli. Mi ji David shishifã lɛ kɛ eshwie lɛ, tooloo ni kpɛɔ lɛ.”

¹⁷ Ni Mumɔ lɛ kɛ Ayɛmforo lɛ kɛɔ akɛ, “Ba!” Ni mɔ ni nuɔ lɛ, ekɛɛ akɛ, “Ba!” Ni mɔ ni kumai yeɔ lɛ lɛ, eba, ni mɔ ni sumɔɔ lɛ, ebahe wala nu lɛ yaka.

Naagbee

¹⁸ Mi miiye odase miitsɔ̃ɔ mɔ fɛɛ mɔ ni nuɔ nɛkɛ wolo nɛɛ mli gbalɛ wiemɔi lɛ akɛ, “Kɛji mɔ ko kɛ nɔ ko fata nii nɛɛ ahe lɛ, Nyɔŋmɔ aaaŋɔ haomɔi ni aŋma yɛ nɛkɛ wolo nɛɛ mli lɛ afata he ahã lɛ.

¹⁹ Ni kɛji mɔ ko jie nɔ ko kɛjɛ nɛkɛ gbalɛ wolo nɛɛ mli wiemɔi lɛ amli lɛ, Nyɔŋmɔ aaajie egbɛnaa kɛaajɛ wala wolo lɛ kɛ maŋ krɔŋkrɔŋ lɛ kɛ nii ni aŋma yɛ nɛkɛ wolo nɛɛ mli lɛ amli.

²⁰ Mɔ ni yeɔ nɛkɛ nii nɛɛ he odase lɛ miikɛɛ akɛ, ‘Hɛɛ, miiba nɔŋŋ!’ ” Amen! Ba, Nuŋtsɔ Yesu!

²¹ WɔNuŋtsɔ Yesu dromɔ lɛ kɛ nyɛ fɛɛ ahi shi. Amen!