Kpojiemɔ 21 - ŊMALƐ KRƆŊKRƆŊ LƐ

Ŋwɛi Hee kɛ Shikpɔŋ Hee lɛ

¹ Ni mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee, ni ŋshɔ bɛ dɔŋŋ.

² Ni mina Maŋ Krɔŋkrɔŋ lɛ ni ji Yerusalɛm hee lɛ jɛ Nyɔŋmɔ ŋɔɔ yɛ ŋwɛi miikpeleke shi, ni asaa lɛ ato tamɔ ayɛmforo ni awula lɛ ahã ewu.

³ Ni minu gbee kpeteŋkple ko jɛ maŋtsɛ sɛ̃i lɛ mli kɛɛ, “Naa, Nyɔŋmɔ shihilɛhe lɛ yɛ gbɔmɛi ateŋ, ni eeehi shi yɛ amɛteŋ, ni amɛaatsɔ̃ emaŋ, ni Nyɔŋmɔ diɛŋtsɛ kɛ amɛ aaahi shi.

⁴ Ni Nyɔŋmɔ aaatsumɔ amɛhiɛiaŋ yafonui fɛɛ. Gbele bɛ dɔŋŋ, ni ŋkɔmɔyeli loo bolɔmɔ loo nɔnaa ko hu bɛ dɔŋŋ; ejaakɛ tsutsunii lɛ eho etee.”

⁵ Ni mɔ ni ta maŋtsɛ sɛi lɛ nɔ lɛ kɛɛ, “Naa, miifee nii fɛɛ ehee.” Ni ekɛɛ mi akɛ, “Ŋmaa, ejaakɛ wiemɔi nɛɛ anɔkwa ni, ni amɛyɛ mli.”

⁶ Ni ekɛɛ mi akɛ, “Agbe naa. Mi ji Alfa lɛ kɛ Omega lɛ, shishijee lɛ kɛ naagbee lɛ. Mɔ ni kumai yeɔ lɛ lɛ, mahã lɛ wala nubu lɛ mli nu lɛ eko yaka.

⁷ Kunimyelɔ lɛ aaatsɔ̃ nɛkɛ nii nɛɛ fɛɛ yelɔ, ni matsɔ eNyɔŋmɔ ni lɛ hu eeetsɔ̃ mibi.

⁸ Shi gbeyelɔi kɛ mɛi ni heee yeee kɛ mɛi ni feɔ nihiinii kɛ gbɔmɔgbelɔi kɛ ajwamãŋbɔlɔi kɛ sulɔi kɛ wɔŋjalɔi kɛ amalelɔi fɛɛ lɛ, amɛna amɛgbɛhe yɛ kpaakpo lɛ ni tsoɔ kɛ la kɛ swɔɔ lɛ mli. Enɛ ji gbele ni ji enyɔ lɛ.”

Yerusalɛm Hee lɛ

⁹ Ni bɔfoi kpawo ni hiɛ tɔi kpawo ni eyimɔ obɔ̃bɔ̃ kɛ naagbee haomɔi kpawo lɛ ateŋ mɔ kome ba miŋɔɔ ni ekɛ mi bawie ekɛɛ, “Ba, ni matsɔ̃ bo ayɛmforo lɛ ni ji Toobi lɛ ŋa lɛ.”

¹⁰ Ni eŋɔ mi yɛ mumɔ mli kɛtee gɔŋ kpele ni kwɔ ko nɔ, ni etsɔ̃ɔ mi maŋ kpeteŋkple ni ji Yerusalɛm krɔŋkrɔŋ lɛ ni ejɛ Nyɔŋmɔ ŋɔɔ yɛ ŋwɛi eekpleke shi,

¹¹ ni ehiɛ Nyɔŋmɔ anunyam lɛ ni ekpɛɔ tamɔ tɛ ni jara wa waa, tamɔ yaspi ni mli tse akɛ kristalo.

¹² Eyɛ gbogbo kpeteŋkple ni kwɔ kɛ agboi nyɔŋma kɛ enyɔ ni bɔfoi nyɔŋma kɛ enyɔ damɔ agboi lɛ anaa, ni aŋmala gbɛii ni ji Israelbii lɛ akutsei nyɔŋma kɛ enyɔ lɛ agbɛii yɛ nɔ.

¹³ Agboi etɛ̃ yɛ bokãgbɛ ni agboi etɛ̃ yɛ kooyigbɛ, ni agboi etɛ̃ yɛ wuoyigbɛ, ni agboi etɛ̃ yɛ anaigbɛ.

¹⁴ Ni maŋ lɛ gbogbo lɛ yɛ shishitoi nyɔŋma kɛ enyɔ, ni Toobi lɛ bɔfoi nyɔŋma kɛ enyɔ lɛ agbɛii yɛ amɛnɔ.

¹⁵ Ni bɔfo ni kɛ mi wie lɛ hiɛ shika susumɔtso koni ekɛsusu maŋ lɛ kɛ egboi lɛ kɛ egbogbo lɛ.

¹⁶ Ni maŋ lɛ kã shi koji ejwɛ, ni ekɛlɛ tamɔ elɛɛmɔ nɔŋŋ. Ni ekɛ susumɔtso lɛ susu maŋ lɛ, ni efee shitoi akpe kome kɛ ohai enumɔ. Ekɛlɛ kɛ elɛɛmɔ kɛ ekwɔlɛ ye egbɔ.

¹⁷ Ni esusu egbogbo lɛ efee ninetalɔi oha kɛ nyɔŋmai ejwɛ kɛ ejwɛ yɛ gbɔmɔ nisusumɔtso naa, ni ji bɔfo lɛ tso lɛ.

¹⁸ Ni nɔ ni akɛtswa gbogbo lɛ ji yaspi, ni maŋ lɛ shika ŋmiiŋmi ni tamɔ ashwishwɛ krɔŋŋ ni.

¹⁹ Ni maŋ lɛ gbogbo lɛ shishitoo lɛ awula amɛ kɛ tɛi ni jara wa srɔtoi fɛɛ. Klɛŋklɛŋ shishitoo lɛ yaspi, nɔ ni ji enyɔ lɛ safiro, nɔ ni ji etɛ̃ lɛ kalkedɔn, nɔ ni ji ejwɛ smaragdo,

²⁰ nɔ ni ji enumɔ lɛ sardonike, nɔ ni ji ekpaa lɛ sardio, nɔ ni ji kpawo lɛ krisolito, nɔ ni ji kpaanyɔ lɛ berilo, nɔ ni ji nɛɛhu lɛ topasiɔn, nɔ ni ji nyɔŋma lɛ krisopraso, nɔ ni ji nyɔŋma kɛ ekome lɛ hiakinto, nɔ ni ji nyɔŋma kɛ enyɔ lɛ amɛtisto.

²¹ Ni agboi nyɔŋma kɛ enyɔ lɛ adiagbai nyɔŋma kɛ enyɔ ni, agbo kome lɛ adiagba kome akɛfee. Ni maŋ lɛ blohu lɛ shika ŋmiiŋmi ni, ni emli tse tamɔ ashwishwɛ.

²² Ni minaaa Sɔlemɔtsu yɛ mli, ejaakɛ Nuŋtsɔ Nyɔŋmɔ Ofe lɛ kɛ Toobi lɛ ji eSɔlemɔtsu.

²³ Ni hulu loo nyɔɔŋtsere kpɛmɔ he ehĩaaa maŋ lɛ, ejaakɛ Nyɔŋmɔ anunyam lɛ kpɛɔ yɛ mli, ni Toobi lɛ ji ela.

²⁴ Ni jeŋmaji lɛ aaanyiɛ yɛ ela lɛ mli, ni shikpɔŋ lɛ nɔ maŋtsɛmɛi lɛ aaaŋɔ amɛnunyam lɛ kɛaaba mli.

²⁵ Ni egboi lɛ aŋamɔŋ kwraa shwane, ejaakɛ nyɔɔŋ bɛ jɛi.

²⁶ Ni akɛ jeŋmaji lɛ anunyam lɛ kɛ amɛwoo lɛ aaaba mli.

²⁷ Ni nɔ ko nɔ ko ni he tseee kɛ mɔ ni feɔ nihiinii kɛ mɔ ni maleɔ boteŋ mli kwraa akɛ ja mɛi ni aŋma amɛgbɛi yɛ Toobi lɛ wala wolo lɛ mli lɛ kɛkɛ.