Kpojiemɔ 20 - ŊMALƐ KRƆŊKRƆŊ LƐ

Afii Akpe Maŋtsɛyeli lɛ

¹ Ni mina bɔfo ko miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfee lɛ kɛ kɔsɔŋkɔsɔ kpeteŋkple ko yɛ edɛŋ.

² Ni emɔ drako lɛ, blema onufu lɛ ni ji abonsam kɛ Satan hu lɛ, ni efi lɛ afii akpe,

³ ni eshɛ́ lɛ efɔ̃ bu kwɔŋkwɔŋ lɛ mli, ni eŋa naa ni esɔo naa, koni ekashishiu jeŋmaji lɛ dɔŋŋ kɛyashi beyinɔ ni aaagbe afii akpe lɛ naa. Ni no sɛɛ lɛ ja afɛne lɛ be fioo ko.

⁴ Ni mina maŋtsɛ sɛ̃ii ni mɛi ni akɛ kojomɔ ehã amɛ lɛ tara nɔ. Ni mina mɛi ni afolɔ amɛyii yɛ Yesu he odaseyeli lɛ kɛ Nyɔŋmɔ wiemɔ lɛ hewɔ lɛ asusumai lɛ, kɛ mɛi ni jako kooloo lɛ loo emãgã lɛ ni amɛheko ekadi lɛ yɛ amɛhiɛŋtsei anɔ loo amɛdɛ̃ lɛ. Amɛtsɔ̃mɔ hiɛkãalɔi ekoŋŋ, ni amɛkɛ Kristo ye maŋtsɛ afii akpe.

⁵ Shi gbohii ni shwɛ lɛ ahiɛ etsɛ̃ɛɛ kɛyashi beyinɔ ni agbe afii akpe lɛ naa. Enɛ ji klɛŋklɛŋ shitee lɛ.

⁶ Mɔ ni naa gbɛ yɛ klɛŋklɛŋ shitee lɛ mli lɛ ajɔɔ lɛ ni mɔ krɔŋkrɔŋ ji lɛ. Gbele ni ji enyɔ lɛ bɛ hewalɛ ko yɛ nakai mɛi lɛ anɔ; moŋ amɛaatsɔ̃mɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.

Satan nɔ kunimyeli

⁷ Ni kɛji agbe afii akpe lɛ naa lɛ, aaafɛne Satan kɛaajɛ tsu lɛ mli,

⁸ ni ebaaje kpo ni eyashishiu jeŋmaji lɛ ni yɔɔ shikpɔŋ koji ejwɛ lɛ, Gog kɛ Magog, koni ebua amɛnaa kɛkpe ni amɛya ta. Amɛyifalɛ tamɔ ŋshɔ naa shia.

⁹ Ni amɛyiŋ kɛtee kɛyaha shikpɔŋ lɛ nɔ fɛɛ, ni amɛyabɔle mɛi krɔŋkrɔŋi lɛ ansra lɛ kɛ maŋ ni asumɔɔ lɛ kɛkpe. Ni la jɛ ŋwɛi, ni ebashã amɛ butuu.

¹⁰ Ni abonsam lɛ ni shishiuɔ amɛ lɛ, ashɛ lɛ afɔ̃ la kɛ swɔɔ kpaakpo lɛ mli, he ni kooloo lɛ kɛ amale gbalɔ lɛ hu yɔɔ lɛ, ni aaapiŋ amɛ nyɔɔŋ kɛ shwane kɛaatee naanɔi anaanɔ.

Naagbee kojomɔ lɛ

¹¹ Ni mina maŋtsɛ sɛ̃i yɛŋ ko ni da, kɛ mɔ ni ta nɔ lɛ, ni shikpɔŋ kɛ ŋwɛi jo foi yɛ ehiɛ, ni amɛbɛ gbɛhe dɔŋŋ.

¹² Ni mina gbohii lɛ, mɛi bibii kɛ mɛi wuji, damɔ maŋtsɛ sɛ̃i lɛ hiɛ, ni agbele woji anaa; ni agbele wolo kroko ni ji wala wolo lɛ hu naa. Ni adamɔ nibii ni aŋmala yɛ woji lɛ amli lɛ anɔ akojo gbohii lɛ yɛ amɛnitsumɔi lɛ anaa.

¹³ Ni ŋshɔ jie gbohii ni yɔɔ emli lɛ ehã, ni gbele kɛ gbohiiaje hu jie gbohii ni yɔɔ amɛmli lɛ amɛhã; ni akojo amɛ, mɔ fɛɛ mɔ yɛ enitsumɔi lɛ anaa.

¹⁴ Ni gbele kɛ gbohiiaje lɛ, ashɛrɛ amɛ ashwie la kpaakpo lɛ mli. Enɛ ji gbele ni ji enyɔ lɛ.

¹⁵ Ni kɛji mɔ ko yɛ ni anãaa akɛ aŋma egbɛi yɛ wala wolo lɛ mli lɛ, ashɛɔ lɛ afɔ̃ɔ la kpaakpo lɛ mli.