Kpojiemɔ 2 - ŊMALƐ KRƆŊKRƆŊ LƐ

Efeso asafo lɛ

¹ “Efeso asafo lɛ bɔfo lɛ; ŋmaa oyaha lɛ akɛ, ‘Nii ni mɔ ni hiɛ ŋulamii kpawo lɛ yɛ eninejurɔ ni enyiɛɔ shika kanetsei kpawo lɛ ateŋ lɛ kɛɛ nɛ.

² Mile onitsumɔi lɛ kɛ odeŋmegbomɔ lɛ kɛ ohiɛmiamɔ lɛ, kɛ bɔ ni okpɛ̃lɛɛɛ mɛi fɔ̃ji lɛ; mile akɛ oka mɛi ni kɛɔ akɛ bɔfoi ji amɛ shi amɛjeee bɔfoi lɛ ni ona akɛ amalelɔi ji amɛ.

³ Ni ohiɛ mli, ni oŋmɛɔ otsui shi yɛ migbɛi lɛ hewɔ, ni etɔko bo.

⁴ Shi kɛ̃lɛ mikɛ bo yɛ sane, no ji akɛ, oŋmɛɛ otsutsu suɔmɔ lɛ he.

⁵ No hewɔ lɛ, kaimɔ he ni ojɛ ogbee shi lɛ, ni otsake otsui, ni otsu tsutsu nitsumɔi lɛ. Shi kɛ jeee nakai lɛ, maba onɔ oya ni matsi okanetso lɛ kɛaajɛ egbɛhe lɛ, belɛ ja oshwa ohe.

⁶ Shi kɛ̃lɛ oyɛ nɔ ko, ni no ji akɛ onyɛɔ Nikolaimɛi lɛ anitsumɔi lɛ ni mi hu minyɛɔ lɛ.

⁷ Mɔ ni yɔɔ toi ni akɛ nuɔ nii lɛ, enu nɔ ni Mumɔ lɛ kɛɔ asafoi lɛ. Mɔ ni yeɔ kunim lɛ, mahã lɛ hegbɛ ni eye walatso lɛ ni yɔɔ miNyɔŋmɔ lɛ Paradeiso lɛ mli lɛ nɔ yibii lɛ eko.’ ”

Smirna asafo lɛ

⁸ “Ni Smirna asafo lɛ bɔfo lɛ; ŋmaa oyahã lɛ akɛ, ‘Nii ni klɛŋklɛŋ mɔ lɛ kɛ naagbee mɔ lɛ, mɔ ni gbo ni ehiɛ kã ekoŋŋ lɛ kɛɛ nɛ:

⁹ Mile omanehulu lɛ kɛ ohia lɛ, shi kɛ̃lɛ niiatsɛ ji bo, ni mile mɛi ni kɛ oshekuyeli kɛɔ akɛ Yudafoi ji amɛ, yɛ be mli ni jeee nakai ni, shi moŋ amɛ ji Satan kpeehe lɛ mli bii.

¹⁰ Kaashe amanehulu ni obaana lɛ ekoeko gbeyei. Naa, abonsam baaŋɔ nyɛteŋ mɛi komɛi awo tsuŋ, koni akɛka nyɛ, ni nyɛaana amanehulu gbii nyɔŋma. Feemɔ anɔkwafo kɛyashi gbele mli, ni mahã bo wala akekre lɛ.

¹¹ Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ. Kunimyelɔ lɛ, gbele ni ji enyɔ lɛ efeŋ lɛ efɔŋ ko.’ ”

Pergamo asafo lɛ

¹² “Ni Pergamo asafo lɛ bɔfo lɛ; ŋmaa oyahã lɛ akɛ, Nii ni mɔ ni hiɛ tsi kɛ enaa nta ni naa ba lɛ kɛɛ nɛ:

¹³ Mile he ni oyɔɔ lɛ, he ni Satan maŋtsɛ sɛi yɔɔ lɛ; ni ohiɛ migbɛi lɛ mli, ni okwaaa minɔ hemɔkɛyeli lɛ be mli ni agbe Antipa, midasefonyo anɔkwafo lɛ yɛ nyɛteŋ yɛ Satan shihilɛhe lɛ.

¹⁴ Shi kɛ̃lɛ mikɛ bo yɛ sane fioo yɛ ohe, no ji akɛ oyɛ mɛi yɛ jɛi ni hiɛ Bileam tsɔ̃ɔmɔ lɛ mli; Bileam ni tsɔ̃ɔ Balak akɛ etsɔ̃ Israelbii lɛ atsɔ̃ne ni amɛye wɔji afɔleshãanii ni amɛbɔ ajwamãŋ lɛ.

¹⁵ Nakai nɔŋŋ hu oyɔɔ mɛi ni hiɛ Nikolaimɛi atsɔ̃ɔmɔ lɛ mli.

¹⁶ No hewɔ lɛ, tsakemɔ otsui! Shi kɛji jeee nakai lɛ, maba onɔ oya ni mikɛ amɛ aaabawu kɛ midaaŋ tsi lɛ.

¹⁷ Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ. Mɔ ni yeɔ kunim lɛ, mahã lɛ mana ni akɛtee lɛ eko, ni mahã lɛ tɛ yɛŋ, ni tɛ lɛ nɔ lɛ aŋma gbɛi hee ni mɔ ko leee akɛ ja mɔ ni náa lɛ.”

Tiatira asafo lɛ

¹⁸ “Ni Tiatira asafo lɛ bɔfo lɛ; ŋmaa oyahã lɛ akɛ, “Nii ni Nyɔŋmɔ Bi lɛ ni ehiŋmɛii tamɔ lalilɛi ni enaji tamɔ ayawa kaŋkaŋ lɛ kɛɛ nɛ.

¹⁹ Mile onitsumɔi lɛ kɛ osuɔmɔ lɛ kɛ ohemɔkɛyeli lɛ kɛ osɔ̃ɔmɔ lɛ kɛ ohiɛmiamɔ lɛ, ni mile onitsumɔi lɛ akɛ sɛɛkpee nii lɛ fe tsutsunii lɛ tete.

²⁰ Shi kɛ̃lɛ mikɛ bo yɛ sane ko, akɛ oŋmɛ yoo Isabel ni tsɛɔ ehe gbalɔ yoo lɛ gbɛ ni etsɔ̃ɔ mitsuji lɛ anii, ni elakaa amɛ ni amɛbɔ ajwamãŋ ni amɛye wɔji afɔleshãanii.

²¹ Ni mihã lɛ be koni ekɛtsake etsui, shi esumɔ̃ɔɔ akɛ etsake ni efɔ̃ɔ ejwamaŋbɔɔ lɛ.

²² Naa, mikɛ lɛ miifɔ̃ hela saa nɔ, ni mikɛ mɛi ni kɛ lɛ fite gbãlã lɛ hu miiwo amanehulu kpeteŋkple mli, belɛ ja amɛtsake amɛtsui ni amɛshi enitsumɔi lɛ.

²³ Ni ebii lɛ, gbe magbe amɛ; ni asafoi lɛ fɛɛ aaana ale akɛ mi ji mɔ ni taoɔ jwɛŋmɔi kɛ tsuii amli, ni mahã nyɛteŋ mɔ fɛɛ mɔ enyɔmɔwo bɔ ni nyɛnitsumɔi lɛ yɔɔ lɛ.

²⁴ “Shi miikɛɛ nyɛ, nyɛ mɛi ni eshwɛ yɛ Tiatira lɛ, mɛi abɔ ni ehiɛɛɛ tsɔ̃ɔmɔ nɛɛ mli ni amɛleee ‘Satan teemɔŋ nibii ni mli kwɔlɔ’, tamɔ bɔ ni amɛtsɛɔ lɛ lɛ, akɛ, Mikɛ jatsu kroko eŋmɛŋ nyɛnɔ;

²⁵ shi nɔ ni nyɛyɔɔ lɛ, nyɛhiɛa mli kɛyashi beyinɔ ni maba.

²⁶ Ni kunimyelɔ lɛ kɛ mɔ ni hiɛɔ minitsumɔi lɛ amli kɛyashiɔ naagbee lɛ, mahã lɛ hegbɛ yɛ jeŋmaji lɛ anɔ,

²⁷ tamɔ bɔ ni mi hu mina kɛjɛ miTsɛ ŋɔɔ lɛ, ni ekɛ dadetso aaakpala amɛ ni eeejwara amɛ tamɔ ajwaraa su gbɛi;

²⁸ ni maŋɔ tooloo lɛ mahã lɛ.

²⁹ Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ.”