Kpojiemɔ 19 - ŊMALƐ KRƆŊKRƆŊ LƐ

Nyamɔ yɛ ŋwɛi

¹ Nii nɛɛ asɛɛ lɛ, minu gbee ni wa ni tamɔ asafo babaoo gbee yɛ ŋwɛi ni miikɛɛ, “Haleluya! Yiwalaheremɔ kɛ anunyam kɛ hewalɛ lɛ ji wɔNyɔŋmɔ lɛ nɔ!

² Ejaakɛ anɔkwa kɛ jalɛ ji ekojomɔi lɛ, akɛni ekojo ajwamãŋ kpeteŋkple lɛ ni kɛ ejwamaŋbɔɔ lɛ efite shikpɔŋ lɛ ni etɔ etsuji lɛ ala lɛ he owele yɛ enɔ lɛ.”

³ Ni amɛkɛɛ nɔ ni ji shii enyɔ akɛ, “Haleluya! Ni la ni shãa maŋ lɛ lasu lɛ teɔ shi kɛyaa naanɔi anaanɔ!”

⁴ Ni onukpai nyɔŋmai enyɔ kɛ ejwɛ lɛ kɛ hiɛkãalɔi ejwɛ lɛ ho gbee shi ni amɛja Nyɔŋmɔ ni ta maŋtsɛ sɛ̃i lɛ nɔ lɛ, ni amɛkɛɛ, “Amen! Haleluya!”

⁵ Ni gbee ko jɛ maŋtsɛ sɛ̃i lɛ mli kɛɛ, “Nyɛjiea wɔNyɔŋmɔ lɛ yi, nyɛ mɛi ni ji etsuji lɛ fɛɛ kɛ nyɛ mɛi ni nyɛsheɔ lɛ gbeyei, mɛi bibii kɛ mɛi wuji lɛ fɛɛ!”

⁶ Ni minu gbee ko tamɔ asafo kpeteŋkple gbee kɛ nui babaoo kɛ nyɔŋmɔshiimɔi ni naa wa agbɛɛmɔ miikɛɛ, “Haleluya! Ejaakɛ Nuŋtsɔ, wɔNyɔŋmɔ Ofe lɛ miiye maŋtsɛ!”

Toobi lɛ Yookpeemɔ lɛ

⁷ “Nyɛhãa wɔmii ashɛa ni wɔmli afilia wɔ ni wɔwo ehiɛ nyam! Ejaakɛ Toobi lɛ yookpeemɔ lɛ eshɛ, ni eŋa lɛ esaa ehe eto.

⁸ Ni ahã lɛ hegbɛ akɛ ewo klala ni hetse ni kpɛlɛɔ nyɛramnyɛram.” Ejaakɛ klala lɛ ji krɔŋkrɔŋbii lɛ ajalɛnii lɛ.

⁹ Ni ekɛɛ mi akɛ, “Ŋmaa, Ajɔɔ mɛi ni atsɛ amɛ kɛba Toobi lɛ yookpeemɔ okplɔ̃ lɛ he lɛ.” Ni ekɛɛ mi akɛ, “Nyɔŋmɔ anɔkwa wiemɔi nɛ.”

¹⁰ Ni miho migbee enaji anaa koni maja lɛ. Ni ekɛɛ mi akɛ, “Kwɛ, kaafee nakai! Bo kɛ onyɛmimɛi lɛ ni hiɛ Yesu odase lɛ mli lɛ anaanyo tsulɔ ji mi. Já Nyɔŋmɔ!” Ejaakɛ Yesu he odase lɛ ji gbalɛ mumɔ lɛ.

Tatsɛ ni ta okpɔŋɔ yɛŋ nɔ lɛ

¹¹ Ni mina ni agbele ŋwɛi naa, ni mina okpɔŋɔ yɛŋ, ni mɔ ni ta nɔ lɛ atsɛɔ lɛ akɛ Anɔkwafo kɛ Anɔkwayelɔ; ni jalɛ naa ekojoɔ ni ewuɔ ta yɛ.

¹² Ni ehiŋmɛii tamɔ lalilɛi, ni maŋtsɛ faii pii bumɔ eyitso, ni aŋma gbɛi ko yɛ he ni mɔ ko mɔ ko leee akɛ ja lɛ diɛŋtsɛ;

¹³ ni ewo atade ni akɛtsɔ lá mli; ni atsɛɔ egbɛi akɛ, “Nyɔŋmɔ Wiemɔ lɛ.”

¹⁴ Ni tai ni yɔɔ ŋwɛi lɛ tara okpɔŋɔi yɛji anɔ kɛnyiɛ esɛɛ, ni amɛwo klala yɛŋ futaa ni he tse.

¹⁵ Ni tsi ni naa ba jɛɔ edaaŋ, koni ekɛ no atswia jeŋmajiaŋbii lɛ anii; ni ekɛ dadetso aaakpala amɛ. Ni eeenaanaa Nyɔŋmɔ Ofe lɛ mlifu ni naa wa lɛ wainŋaanɔ lɛ nɔ.

¹⁶ Ni aŋma gbɛi ko yɛ etade kɛ egboŋ nɔ akɛ, “Maŋtsɛmɛi aMaŋtsɛ kɛ Nuŋtsɔmɛi aNuŋtsɔ.”

Harmagedon Ta lɛ

¹⁷ Ni mina bɔfo ko damɔ hulu mli, ni ebo kɛ gbee ni wa ekɛɛ loofɔji ni filikiɔ yɛ ŋwɛi teŋ lɛ fɛɛ akɛ, “Nyɛbaa ni nyɛbabuaa nyɛhe naa yɛ Nyɔŋmɔ okplɔ̃ kpeteŋkple lɛ he,

¹⁸ koni nyɛbaye maŋtsɛmɛi aloo kɛ asafoiatsɛmɛi aloo kɛ hewalɔi aloo kɛ okpɔŋɔi aloo kɛ mɛi ni tara amɛnɔ lɛ aloo kɛ odehei kɛ nyɔji kɛ mɛi bibii kɛ mɛi wuji fɛɛ aloo.”

¹⁹ Ni mina kooloo lɛ kɛ shikpɔŋ lɛ nɔ maŋtsɛmɛi lɛ kɛ amɛtai lɛ ni abua amɛnaa ni amɛkɛ mɔ ni ta okpɔŋɔ lɛ nɔ lɛ kɛ eta lɛ ayawu.

²⁰ Ni amɔ kooloo lɛ, ni amɔ amalegbalɔ lɛ afata ehe, amalegbalɔ lɛ ni fee okadii yɛ ehiɛ ni ekɛshishiu mɛi ni ŋɔ kooloo lɛ okadi lɛ kɛ mɛi ni jaa emãgã lɛ. Ni aŋɔ kooloo lɛ kɛ amale gbalɔ lɛ ni akɛ mɛi enyɔ nɛɛ fɛɛ wo la kpaakpo lɛ ni tsoɔ kɛ swɔɔ lɛ mli ni amɛhiɛ kãmɔ.

²¹ Ni mɛi ni shwɛ lɛ, akɛ mɔ ni ta okpɔŋɔ lɛ nɔ lɛ tsi ni jɛɔ edaaŋ lɛ gbe amɛ, ni loofɔji fɛɛ ye amɛloo lɛ amɛtɔrɔ.