Kpojiemɔ 18 - ŊMALƐ KRƆŊKRƆŊ LƐ

Babilon shigbeemɔ

¹ Nii nɛɛ asɛɛ lɛ mina bɔfo kroko miikpeleke shi kɛmiijɛ ŋwɛi, ni eyɛ hegbɛ kpeteŋkple, ni enunyam lɛ hã shikpɔŋ lɛ nɔ tse;

² ni ekɛ̃ ehe shi ebo ekɛɛ, “Egbee shi, Babilon kpeteŋkple lɛ egbee shi, ni etsɔ̃ mumɔi fɔ̃ji ashihilɛhe, kɛ mumɔi ni he tseee fɛɛ atsu kɛ loofɔlɔ fɛɛ loofɔlɔ ni he tseee ni anyaŋeɔ hu tsu.

³ Ejaakɛ ehã jeŋmaji lɛ fɛɛ enu ejwamaŋbɔɔ dãa ni naa wa lɛ eko, ni shikpɔŋ lɛ nɔ maŋtsɛmɛi lɛ kɛ lɛ bɔ ajwamãŋ, ni shikpɔŋ lɛ nɔ jarayelɔi lɛ tsɔ̃mɔ niiatsɛmɛi yɛ enyɛnyɛŋtswibɔɔ lɛ hewalɛ naa.”

⁴ Ni minu gbee kroko kɛjɛ ŋwɛi miikɛɛ, “Nyɛjea emli, mimaŋ, koni nyɛkɛ lɛ akafea eshai ni efeɔ lɛ, ni nyɛkana ehaomɔi lɛ eko.

⁵ Ejaakɛ ehe eshai lɛ anɔ ekwɔ kɛshɛ ŋwɛi tɔ̃ɔ, ni Nyɔŋmɔ ekai enifɔɔji anii lɛ.

⁶ Nyɛwoa lɛ nyɔmɔ tamɔ bɔ ni lɛ hu ewo lɛ, ni nyɛkua nyɛbɔa he toi enyɔ nyɛhãa lɛ yɛ enitsumɔi lɛ anaa. Kpulu lɛ ni efutu dãa yɛ mli lɛ, nyɛfutua lɛ toi enyɔ nyɛwoa mli nyɛhãa lɛ.

⁷ Bɔ ni ewo lɛ diɛŋtsɛ ehiɛ nyam ni ebɔ nyɛnyɛŋtswi lɛ, nakai bɔ nɔŋŋ nyɛhãa epiŋmɔ kɛ ewerɛhoo lɛ afaa; ejaakɛ ekɛɔ yɛ etsui mli akɛ, ‘Mita shi akɛ maŋnyɛ, ni mijeee okulafo, ni minaŋ awerɛhoo.’

⁸ No hewɔ lɛ, gbi kome nɔ ehaomɔi lɛ aaaba, gbele kɛ awerɛhoo kɛ hɔ̃mɔ, ni akɛ la aaashã lɛ butuu, ejaakɛ Nuŋtsɔ Nyɔŋmɔ lɛ ni kojoɔ lɛ he wa.”

Shikpɔŋ lɛ nɔ bii lɛ ayarawoo yɛ Babilon hewɔ

⁹ Ni shikpɔŋ lɛ nɔ maŋtsɛmɛi ni kɛ lɛ bɔ ajwamãŋ ni amɛkɛ lɛ bɔ nyɛnyɛŋtswi lɛ aaafo lɛ, ni amɛaawo yara yɛ hewɔ, be ni amɛaana eshãa lɛ lasu lɛ.

¹⁰ Ni amɛaakɛɛ, “Ao! Ao! Maŋ kpeteŋkple lɛ, Babilon, maŋ ni he wa lɛ! Ejaakɛ ŋmɛlɛtswaa kome mli ni okojomɔ eba nɛɛ!”

¹¹ Ni shikpɔŋ lɛ nɔ jarayelɔi lɛ aaafo lɛ ni amɛaaye lɛ ŋkɔmɔ, ejaakɛ mɔ ko mɔ ko heee amɛguɔ nii lɛ dɔŋŋ:

¹² shika kɛ jwiɛtɛi, ojarawatɛi kɛ adiagbai, kɛ klala fɛɛfɛo kɛ mama afaseo diŋ, kɛ seda kɛ mama tsuru fɔɔ kɛ tso fɛɛ tso ni jeɔ ŋma kɛ shwuɔwu nibii fɛɛ kɛ nibii fɛɛ ni akɛ tso ni wa kɛ akɔɔble kɛ dade kɛ marmaratɛ fee,

¹³ kɛ sinamon kɛ mrɔŋo kɛ tsofaikɛŋmai kɛ mire kɛ ohɛ kɛ wain kɛ mu kɛ shikishaŋ kɛ ŋmaa, kɛ tsinai kɛ toi kɛ okpɔŋɔi kɛ shwiilii kɛ nyɔji kɛ gbɔmɛi asusumai.

¹⁴ Jarayelɔi lɛ kɛɛ, “Ni yibii ni baa otsine lɛ eje odaaŋ, ni ŋɔɔmɔ nibii fɛɛ kɛ nibii fɛɛ ni kpɛlɛɔ nyɛramnyɛram lɛ ebɔ bo, ni onaŋ amɛ kwraa dɔŋŋ.”

¹⁵ Ni nibii nɛɛ aguɔyelɔi ni etsɔ̃ maŋ nɛɛ nɔ etsɔ̃mɔ niiatsɛmɛi lɛ aaadamɔ sɛɛ flɛŋŋ yɛ epiŋmɔ lɛ gbeyeishemɔ lɛ hewɔ, ni amɛaafo ni amɛaaye ŋkɔmɔ

¹⁶ ni amɛaakɛɛ, “Ao! Ao! Maŋ kpeteŋkple ni buɔ klala fɛɛfɛo kɛ mama afaseo diŋ kɛ mama tsuru fɔɔ, ni ewulaa kɛ shika kɛ ojarawatɛi kɛ adiagbai lɛ!

¹⁷ Ejaakɛ ŋmɛlɛtswaa kome mli lɛ nɛkɛ nifalɛ babaoo nɛɛ fɛɛ ebɔ lɛ.” Ni lɛlɛ kudɔɔtsɛ fɛɛ kudɔɔtsɛ kɛ mɔ fɛɛ mɔ ni nyiɛɔ lɛlɛ mli kɛyaa he ko, kɛ amlãkui kɛ mɛi abɔ ni tsuɔ ŋshɔ hiɛ nii lɛ damɔ sɛɛ flɛŋŋ,

¹⁸ ni be ni amɛna eshãa lɛ lasu lɛ amɛbolɔ amɛkɛɛ, “Aso maŋ ko ehi shi pɛŋ ni da tamɔ maŋ kpeteŋkple nɛɛ?”

¹⁹ Ni amɛkɛ mlu wo amɛyiteaŋ, ni amɛkɛ yaafo kɛ ŋkɔmɔyeli bo amɛkɛɛ, “Ao! Ao! Maŋ kpeteŋkple lɛ ni emli mɛi fɛɛ ni yɔɔ lɛji yɛ ŋshɔ hiɛ lɛ tsɔ̃ eninamɔ lɛ nɔ amɛfee niiatsɛmɛi lɛ! Ejaakɛ ŋmɛlɛtswaa kome mli ni fɛɛ ebɔ lɛ nɛɛ!”

²⁰ Bo ŋwɛi, kɛ nyɛ krɔŋkrɔŋbii kɛ bɔfoi kɛ gbalɔi, nyɛnyaa yɛ ehewɔ, ejaakɛ Nyɔŋmɔ ekojo lɛ ehã nyɛ!

²¹ Ni bɔfo ko ni he wa wo tɛ ko ni tamɔ wiɛ wulu, ni eshɛ efɔ̃ ŋshɔŋ ni ekɛɛ, “Nɛkɛ aaatsi Babilon maŋ kpeteŋkple lɛ atswa shi waa, ni anaŋ lɛ kwraa dɔŋŋ.

²² Ni anuŋ saŋkutswalɔi kɛ lalatsɛmɛi kɛ blɛkpãlɔi kɛ tɛtɛrɛmantɛrɛkpãlɔi lɛ agbee kwraa dɔŋŋ yɛ omli, ni anaŋ ŋaalɔ ko ŋaalɔ ko ni le ŋaa ko kwraa dɔŋŋ yɛ omli, ni anuŋ wiɛ gbɛɛmɔ ko hu kwraa dɔŋŋ yɛ omli.

²³ Ni anaŋ kane la ko kwraa dɔŋŋ yɛ omli, ni anuŋ ayɛmforo wu kɛ ayɛmforo gbee kwraa dɔŋŋ yɛ omli; ejaakɛ ojarayelɔi lɛ ji shikpɔŋ lɛ nɔ gbɔmɛi wuji, ni okunyaayeli lɛ akɛshishiu jeŋmaji lɛ fɛɛ.”

²⁴ Ni emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ lɛ nɔ lɛ ala lɛ yɛ.