Kpojiemɔ 17 - ŊMALƐ KRƆŊKRƆŊ LƐ

Ajwamãŋ kpeteŋkple lɛ

¹ Bɔfoi kpawo lɛ ni hiɛ tɔi kpawo lɛ ateŋ mɔ kome ba, ni ekɛ mi bawie ekɛɛ, “Ba ni matsɔ̃ɔ bo ajwamãŋ kpeteŋkple lɛ ni ta nui babaoo lɛ anɔ lɛ kojomɔ lɛ.

² Shikpɔŋ lɛ nɔ maŋtsɛmɛi lɛ kɛ lɛ bɔ ajwamãŋ, ni ejwamaŋbɔɔ dãa lɛ hã mɛi ni yɔɔ shikpɔŋ lɛ nɔ lɛ tɔrɔ dãa.”

³ Ni bɔfo lɛ kpala mi yɛ mumɔ mli kɛtee ŋa nɔ. Ni mina yoo ko ta kooloo tsuru fɔɔ ko nɔ ni kooloo nɛɛ he fɛɛ lɛ musubɔɔ gbɛii sɔŋŋ, ni eyɛ yitsei kpawo kɛ akloŋtoi nyɔŋma.

⁴ Yoo lɛ wo atade afaseo diŋ kɛ etsuru fɔɔ, ni akɛ shika kɛ tɛi ni jara wa kɛ adiagbai ewula lɛ, ni ehiɛ shika kpulu yɛ edɛŋ ni eyi obɔ̃ kɛ ejwamaŋbɔɔ lɛ mli nihiinii kɛ mujinii.

⁵ Ni aŋma gbɛi ko ni ji teemɔ sane yɛ ehiɛŋtso nɔ, “Babilon kpeteŋkple lɛ, shikpɔŋ lɛ nɔ ajwamãŋi lɛ kɛ nihiinii lɛ anyɛ lɛ.”

⁶ Ni mina yoo lɛ akɛ krɔŋkrɔŋbii lɛ alá lɛ kɛ Yesu he odasefoi lɛ alá lɛ etɔ lɛ dãa. Be ni mina lɛ lɛ, minaa kpɛ mihe naakpa.

⁷ Ni bɔfo lɛ kɛɛ mi akɛ, “Mɛɛ hewɔ onaa ekpɛ ohe? Mibagba bo yoo lɛ kɛ kooloo ni eta nɔ ni yɔɔ yitsei kpawo kɛ akloŋtoi nyɔŋma lɛ ahe teemɔ sane lɛ.

⁸ Kooloo lɛ ni ona lɛ be ko mli lɛ eyɛ, shi amrɔ nɛɛ ebɛ, ni ebaajɛ bu kwɔŋkwɔŋ lɛ mli eje kpo kɛya hiɛkpãtãmɔ mli. Ni mɛi ni yɔɔ shikpɔŋ lɛ nɔ ni aŋmako amɛgbɛii yɛ wala wolo lɛ mli kɛjɛ jeŋ shishijee lɛ anaa aaakpɛ amɛhe kɛ amɛna kooloo lɛ akɛ be ko mli lɛ, eyɛ shi amrɔ nɛɛ ebɛ, ni ebaaba lɛ.

⁹ “Biɛ jwɛŋmɔ ni nilee yɔɔ mli he ehĩa yɛ. Yitsei kpawo lɛ ji gɔji kpawo ni yoo lɛ ta nɔ lɛ, ni asaŋ maŋtsɛmɛi kpawo hu ni.

¹⁰ Amɛteŋ mɛi enumɔ egbee shi, mɔ kome yɛ, ni mɔ kome lɛ nako aba, ni kɛ eba lɛ, ja ehi shi fioo.

¹¹ Ni kooloo lɛ ni be ko mli lɛ eyɛ shi amrɔ nɛɛ ebɛ lɛ, lɛ ji mɔ ni ji kpaanyɔ, ni ejɛ mɛi kpawo lɛ amli, ni eeya hiɛkpãtãmɔ mli.”

¹² “Ni akloŋtoi nyɔŋma lɛ ni ona lɛ, maŋtsɛmɛi nyɔŋma ni, mɛi ni maŋtsɛyeli shɛko amɛdɛŋ, shi kɛ̃lɛ amɛbaana hegbɛ amɛye maŋtsɛ ŋmɛlɛtswaa kome kɛ kooloo lɛ.

¹³ Amɛhiɛ jwɛŋmɔ kome, ni amɛkɛ amɛhewalɛ kɛ amɛhegbɛ lɛ hãa kooloo lɛ.

¹⁴ Amɛkɛ Toobi lɛ baawu, shi Toobi lɛ baaye amɛnɔ kunim, ejaakɛ lɛ ji Nuŋtsɔmɛi aNuŋtsɔ kɛ maŋtsɛmɛi aMaŋtsɛ lɛ, ni mɛi ni kɛ lɛ yɔɔ lɛ ji mɛi ni atsɛ kɛ mɛi ni ahala kɛ mɛi ni heɔ yeɔ lɛ.”

¹⁵ Ni bɔfo lɛ kɛɛ mi akɛ, “Nui lɛ ni ona ni yoo ajwamãŋ lɛ ta nɔ lɛ ji maji kɛ asafoi kɛ jeŋmaji kɛ maji anɔ wiemɔi.

¹⁶ Ni akloŋtoi nyɔŋma ni ona lɛ kɛ kooloo lɛ amɛaanyɛ ajwamãŋ lɛ, ni amɛafee lɛ amaŋfɔ̃ ni amɛkɛ la aaashã lɛ kɛmɔ shi.

¹⁷ Ejaakɛ Nyɔŋmɔ kɛwo amɛtsuii amli koni amɛfee eyiŋtoonii lɛ ni amɛhiɛ jwɛŋmɔ kome ni amɛkɛ amɛmaŋtsɛyeli lɛ ahã kooloo lɛ kɛyashi beyinɔ ni Nyɔŋmɔ wiemɔi lɛ aaaba mli.”

¹⁸ “Ni yoo lɛ ni ona lɛ ji maŋ kpeteŋkple ni yeɔ shikpɔŋ lɛ nɔ maŋtsɛmɛi lɛ anɔ lɛ.”