Kpojiemɔ 16 - ŊMALƐ KRƆŊKRƆŊ LƐ

Nyɔŋmɔ mlifu tɔi kpawo lɛ

¹ Ni minu gbee ni wa ni jɛ Sɔlemɔtsu lɛ mli miikɛɛ bɔfoi kpawo lɛ akɛ, “Nyɛyaa ni nyɛyafɔsea Nyɔŋmɔ mlifu tɔi kpawo lɛ nyɛshwiea shikpɔŋ lɛ nɔ.”

² Ni klɛŋklɛŋ bɔfo lɛ yi mli etee, ni eyafɔse etɔ lɛ mli nii lɛ eshwie shikpɔŋ lɛ nɔ; ni mɛi ni kooloo lɛ okadi yɔɔ amɛhe lɛ kɛ mɛi ni jaa emãgã lɛ famɔ faji fɔ̃ji ni waa mɔ he.

³ Ni bɔfo ni ji enyɔ lɛ fɔse etɔ lɛ mli nii lɛ ewo ŋshɔ mli; ni etsɔ̃ tamɔ gbonyo lá, ni nɔ fɛɛ nɔ ni hiɛ kã yɛ ŋshɔ lɛ mli lɛ gbo.

⁴ Ni bɔfo ni ji etɛ̃ lɛ fɔse etɔ lɛ mli nii lɛ ewo fai kɛ nuhiŋmɛii lɛ amli, ni nu lɛ tsɔ̃ lá.

⁵ Ni minu nui lɛ anɔ bɔfo lɛ miikɛɛ, “Jalɔ ji bo, bo ni oyɔɔ, ni oyɛ, ni oji Mɔ krɔŋkrɔŋ lɛ, akɛni okojo nɛkɛ nɛɛ.

⁶ Ejaakɛ amɛshwie krɔŋkrɔŋbii lɛ kɛ gbalɔi lɛ alá shi. Ni lá nɔŋŋ ohã amɛ ni amɛnu; esa amɛ nakai!”

⁷ Ni minu afɔleshãa latɛ lɛ miikɛɛ, “Hɛɛ, Nuŋtsɔ Nyɔŋmɔ Ofe, anɔkwa kɛ jalɛ ji okojomɔi lɛ!”

⁸ Ni bɔfo ni ji ejwɛ lɛ fɔse etɔ lɛ mli nii lɛ eshwie hulu nɔ; ni ahã lɛ hewalɛ ni ekɛ la ashã gbɔmɛi.

⁹ Ni la dɔlɛ ni naa wa lɛ shã gbɔmɛi, ni amɛwie musubɔɔ wiemɔi amɛshi Nyɔŋmɔ ni yɔɔ hewalɛ yɛ nɛkɛ haomɔi nɛɛ anɔ lɛ gbɛi lɛ, ni amɛtsakeee amɛtsui ni amɛwo ehiɛ nyam.

¹⁰ Ni bɔfo ni ji enumɔ lɛ fɔse etɔ lɛ mli nii lɛ eshwie kooloo lɛ maŋtsɛ sɛ̃i lɛ nɔ, ni emaŋtsɛyeli lɛ wo duŋ, ni gbɔmɛi kɔ̃mɔ amɛlilɛii yɛ nɔnaa lɛ hewɔ.

¹¹ Ni amɛwie musubɔɔ wiemɔi amɛshi ŋwɛi Nyɔŋmɔ lɛ yɛ nɔnai lɛ kɛ amɛfaji lɛ ahewɔ, ni amɛtsakeee amɛtsui yɛ amɛnitsumɔi fɔ̃ji lɛ ahe.

¹² Ni bɔfo ni ji ekpaa lɛ fɔse etɔ lɛ mli nii lɛ ewo Eufrate Faa agbo lɛ mli. Ni emli nu lɛ gbi, koni akɛsaa gbɛ ahã maŋtsɛmɛi ni jɛ hulu shiteehe lɛ.

¹³ Ni mina mumɔi etɛ̃ ni he tseee ni tamɔ kɔkɔdenei miije kpo kɛmiijɛ drako lɛ daaŋ kɛ kooloo lɛ daaŋ kɛ amalegbalɔ lɛ daaŋ.

¹⁴ Ejaakɛ mumɔi fɔ̃ji amumɔi ni, ni amɛfeɔ okadii, ni amɛyaa maŋtsɛmɛi ni yɔɔ jeŋ muu lɛ fɛɛ lɛ aŋɔɔ, koni amɛyabua amɛnaa amɛhã Nyɔŋmɔ Ofe lɛ gbi wulu lɛ nɔ ta lɛ.

¹⁵ “Naa, miiba tamɔ julɔ. Ajɔɔ mɔ ni saraa ni ekwɛɔ etadei lɛ anɔ lɛ, koni ekanyiɛ yayai ni ana ehiɛgbele lɛ.”

¹⁶ Ni mumɔi lɛ bua maŋtsɛmɛi lɛ anaa kɛtee he ko ni atsɛɔ jɛi yɛ Hebri wiemɔ mli akɛ Harmagedon lɛ.

¹⁷ Ni bɔfo ni ji kpawo lɛ fɔse etɔ lɛ mli nii lɛ ewo kɔɔyɔɔ mli ni gbee ni wa ko jɛ maŋtsɛ sɛ̃i lɛ mli yɛ Sɔlemɔtsu lɛ mli kɛɛ akɛ, “Agbe naa!”

¹⁸ Ni srawai gbala kɛ gbɛɛmɔ, ni nyɔŋmɔ shimɔ, ni shikpɔŋ hoso waa diɛŋtsɛ; nɛkɛ shikpɔŋ hosomɔ gbeyeigbeyei nɛɛ, asonɔkwa, anako eko dã kɛjɛ beyinɔ ni abɔ gbɔmɔ adesa kɛba shikpɔŋ lɛ nɔ nɛɛ.

¹⁹ Ni maŋ kpeteŋkple lɛ mli gbala etɛ̃, ni jeŋmaji lɛ amaji lɛ fɛɛ wule, ni akai Babilon kpeteŋkple lɛ yɛ Nyɔŋmɔ hiɛ, koni akɛ emlifu ni naa wa lɛ dãa kpulu lɛ ahã lɛ.

²⁰ Ni ŋshɔkpɔ fɛɛ ŋshɔkpɔ laaje, ni gɔji lɛ anãaa dɔŋŋ.

²¹ Ni nyɔŋmɔŋtɛi agboi ni amɛtsiimɔ tamɔ talenta jɛ ŋwɛi bashwie gbɔmɛi anɔ, ni gbɔmɛi lɛ wie musubɔɔ wiemɔi amɛshi Nyɔŋmɔ yɛ nyɔŋmɔŋtɛi lɛ ahaomɔ lɛ hewɔ, ejaakɛ haomɔ ni nyɔŋmɔŋtɛi nɛɛ kɛba lɛ yɛ gbeyei po ni ehiii.